စစ်ရေးပိုမို ပူးပေါင်းနိုင်ရန် CNA နှင့် ယော PDF နားလည်မှုစာချွန်လွှာ ရေးထိုး
ဧရာဝတီ ၊ မတ် ၂၂ ၊ ၂၀၂၃
အာဏာသိမ်းစစ်ကောင်စီကို တိုက်ခိုက်ရာ၌ စစ်ရေး ပိုမို ပူးပေါင်းဆောင်ရွက်နိုင်ရန် ချင်းပြည်နယ်အခြေစိုက် ချင်းအမျိုးသားတပ် (CNA) နှင့် ယောဒေသပြည်သူ့ကာကွယ်ရေးတပ် (YPDF) တို့အကြား နားလည်မှုစာချွန်လွှာ (MOU) တစောင်ကို ယမန်နေ့က လက်မှတ်ရေးထိုးလိုက်ကြောင်း YPDF ထံမှ သိရသည်။
ချင်းအမျိုးသားတပ်ဦး (CNF) ၏ လက်နက်ကိုင်တပ်ဖြစ်သည့် CNA နှင့် YPDF တို့အကြား နွေဦးတော်လှန်ရေး အစပိုင်း ကတည်းက ပူးပေါင်းဆောင်ရွက်မှုများ ရှိခဲ့သော်လည်း ပိုမိုခိုင်မာစေရန် ယခုကဲ့သို့ တရားဝင် MOU ရေးထိုးလိုက်ခြင်းဖြစ်ကြောင်း YPDF ဘက်က ဆိုသည်။
YPDF ၏ ဗဟိုဦးဆောင်ကော်မတီ ဥက္ကဌ ရဲဘော်ယောလေးက “နယ်မြေချင်းကလည်း ထိစပ်နေတယ်။ ဘယ်လိုပဲဖြစ်ဖြစ် တပ်ဖွဲ့ချင်းကလည်း ရင်းနှီးနေတာဖြစ်တဲ့အတွက် ပူးပေါင်း ဆောင်ရွက်မှပဲ ရနိုင်မယ်ပေါ့။ အထူးသဖြင့် မြေအနေအထား တွေမှာ အတွေ့အကြုံရှိတဲ့ ERO တခုနဲ့ပူးပေါင်းဆောင်ရွက်မှပဲ ရမယ်ဆိုတဲ့ အနေအထားဖြစ်လာတယ်။ အဲဒါကြောင့် သူတို့နဲ့ ယုံယုံကြည်ကြည် လက်တွဲပြီးတော့ ဆောင်ရွက်ဖို့ လက်မှတ်ထိုးလိုက်တာပါ” ဟု ဆိုသည်။
MOU ကို CNA ထိန်းချုပ်နယ်မြေတနေရာတွင် လက်မှတ်ထိုးလိုက်ခြင်းဖြစ်ပြီး CNA ဘက်က ကာကွယ်ရေးဌာန အကြီးအကဲများ တက်ရောက်သလို YPDF ဘက်က ဗဟိုဦးဆောင်ကော်မတီဥက္ကဌနှင့် တပ်ပိုင်းဆိုင်ရာမှ တာဝန်ရှိသူများ တက်ရောက်ခဲ့ကြောင်း YPDF ထံမှသိရသည်။
YPDF နှင့် CNA တို့ MOU ထိုးလိုက်သဖြင့် မကွေးတိုင်းနှင့် ချင်းပြည်နယ်အစပ်ရှိ ယောဒေသတွင် CNA က ကြီးကြပ်ကွပ်ကဲ သည့် စစ်ရေးလှုပ်ရှားမှုများ ပိုမိုတွေ့မြင်လာရဖွယ်ရှိကြောင်း စစ်ရေးလေ့လာသူများက ဆိုကြသည်။
YPDF သည်ဂန့်ဂေါမြို့နယ်တွင် အခြေစိုက်လှုပ်ရှားပြီး အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန၏ ကွပ်ကဲမှုအောက်တွင် မရှိပေ။YPDF သည် မကြာသေးသည့် မတ်လ ၁၉ ရက်က စစ်ကောင်စီ၏ အမှတ် (၅၀) ခြေလျင် တပ်ရင်းမှ စစ်ကား ၄ စီးအား ဂန့်ဂေါမြို့တောင်ဘက်ရှိ ရှောက်ပင်ရွာနှင့် ခေါက်ခူရွာအနီးတွင် မိုင်းဆွဲ တိုက်ခိုက်ခဲ့ရာ စစ်ကောင်စီတပ်ဘက်က အရာရှိအချို့အပါအဝင် တပ်ဖွဲ့ဝင် ၇ ဦးသေဆုံးခဲ့ကြောင်း YPDFထံမှသိရသည်။
ဓာတ်ပုံ-Yaw Revolution Army
#WhatsHappeningInMyanmar
#RejectMilitaryCoup
No comments:
Post a Comment