ကနီမှာ တိုက်ပွဲဖြစ်ပွားပြီး ရဲ ၃ ဦးသေဆုံးကာ သေနတ် ၁ လက်သိမ်းဆည်းရရှိ...
စစ်တပ်က လက်နက်ကြီးနဲ့ ပစ်ခတ်မှုကြောင့် ပြည်သူ ၁ ဦးသေဆုံး...
++++++++++++++
ဇွန် ၂၀
စစ်ကိုင်းတိုင်း၊ ကနီမြို့နယ်မှာ တိုက်ပွဲဖြစ်ပွားပြီး ရဲ ၃ ဦးသေဆုံးကာ သေနတ် ၁ လက် သိမ်းဆည်းရရှိခဲ့တယ်လို့ ယင်းမာပင်ခရိုင် တပ်ရင်း အမှတ် ၃၀ DRPA ဆီက သိရပါတယ်။
ဇွန်လ ၁၉ ရက်နေ့ မနက် ၇ နာရီခန့်က ကနီမြို့နယ်၊ရပ်ကွက် ၃ သုံးဒေါင့်ကျွန်၊ ကြို့ပင်လှအရပ်မှာ ကင်းလှည့်နေတဲ့ အင်အား ၁၇ ဦးခန့်ပါ ရဲများနဲ့ ယင်းမာပင်ခရိုင်တပ်ရင်းအမှတ် ၃၀ တို့ တိုက်ပွဲဖြစ်ပွားပြီး ရဲ ၃ ဦးသေဆုံးခဲ့တယ်လို့ သိရပါတယ်။
"တိုက်ပွဲမှာ ရဲ ၃ ဦးသေတာကတော့ လုံးဝသေချာတယ်။ ရဲ ၁ ဦး အလောင်းနဲ့ သေနတ် ၁ လက် ကတော့ ရလိုက်တယ်။ ၂ ဦးကတော့ သူတို့ပြန်ပြီး ဆွဲခေါ်သွားတာပေါ့။ နေရာမှာတင် အခြေအနေမကောင်းမှန်းသိတယ် ဒါပေမယ့် ဆေးရုံမှာ သေသွားတယ်ဆိုတာ အတည်ပြုနိုင်တယ်။ တကယ်တမ်း ကျန်တော်တို့ စီစဥ်ထားတာက အဲ ရဲ ၁၇ ကောင်ကင်းလှည့်ထားတာကို ရပ်ကွက် ၃ မြို့ထဲထိကို လိုက်ပစ်ဖို့ ရနိုင်သမျှ လက်နက်ပါသိမ်းမယ်ပေါ့ အဲလိုစီစဥ်ထားတာပေါ့ ဒါပေမယ့် ဟိုဘက်က မမျှော်လင့်ထားတဲ့ တိုက်ပွဲနဲ့ မဆိုင်တဲ့ နေရာကို စစ်ခွေးတွေက လက်နက်ကြီးနဲ့ ပစ်လို့ ပြည်သူ ၂ ဦးထိသွားလို့ ပြန်ဆုတ်ခဲ့ရတယ်။ ထိသွားတဲ့ ပြည်သူ ၂ ဦးကိုတော့ ကျွန်တော်တို့ တပ်ရင်းက NUG ဆေးရုံ ဆေးခန်းတွေကို ပို့တယ်ပေါ့။ ပို့တဲ့အခါမှာ ၁ ဦးကကျတော့ လက်ပါ ပြတ်သွားတဲ့ အနေအထားဆိုတော့ သွေးထွက် လွန်ပြီးဆုံးသွားတယ်။ နောက် တစ်ဦးကတော့ ကုသမှု ခံယူနေတယ်" လို့ ယင်းမာပင်ခရိုင် တပ်ရင်း အမှတ် ၃၀ DRPA ရဲ့ တာဝန်ရှိသူက ပြောပါတယ်။
တိုက်ပွဲအတွင်း သေဆုံးသွားတဲ့ ရဲများဆီက G3 အမျိုးအစား မောင်းပြန် ၁ လက်၊ G3 ကျည်အတောင့် ၉ဝ၊ G3 ကျည်ဘောက် ၃ ခု၊ ဖုန်း ၁ လုံး၊ စကားပြောစက် ၁ လုံးစာရွက်စာတမ်းများ၊ ငွေကျပ် ၂ သိန်းနဲ့ ကျည်ကာ ၂ ထည် တို့ကို သိမ်းဆည်းရမိခဲ့ပြီး မနက် ၈ နာရီ ၁၅ မိန၀်ခန့်မှာ တော်လှန်ရေး ရဲဘော်များ ပြန်လည်ဆုတ်ခွာခဲ့တယ်လို့ သိရပါတယ်။
အဲ့ဒီ ထိတွေ့ တိုက်ပွဲ အတွင်း ကနီမြို့နယ်မှာ တပ်စွဲထားတဲ့ စစ်သားများက တိုက်ပွဲနဲ့ မသက်ဆိုင်တဲ့ ယာကြီးကျေးရွာဘက်ကို အကြောင်းမဲ့ လက်နက်ကြီးများနဲ့ ပစ်ခတ်ခဲ့တာကြောင့် ပြည်သူ ၁ ဦး လက်နက်ကြီးထိမှန် သေဆုံးပြီး ၁ ဦးဒဏ်ရာ အပြင်းအထန်ရရှိခဲ့တယ်လို့ သိရပါတယ်။
No comments:
Post a Comment