လက်နက်ဂိုဒေါင်လိုက် သိမ်းစည်းရရှိခြင်း

 လက်နက်ဂိုဒေါင်လိုက် သိမ်းစည်းရရှိခြင်း

—————————————————————

 

ဒီရက်ပိုင်းမှာ အကြမ်းဖက် စစ်တပ်ရဲ့ လက်နက်ဂိုဒေါင်တွေ၊ ခဲယမ်းပို့ စစ်ကြောင်းတွေကို ‌တော်လှန်ရေး အင်အားစုတွေ သိမ်းပိုက်နိုင်တာတွေ၊ လက်နက်ခဲယမ်း အများအပြား သိမ်းပိုက် ရရှိတဲ့ တိုက်ပွဲတွေ ကို အများအပြား တွေ့ရှိလာရပါတယ်။

🔺 အသိသာဆုံးကတော့ ထိုင်း-မြန်မာ နယ်စပ် ကရင်နီ ပြည်နယ် မှာ ခမရ (၅၁၉)၊ ခမရ (၃၃၄) ခဲယမ်းပို့ ရိက္ခာ စစ်ကြောင်းကို ကရင်နီ တပ်မတော်က တိုက်ခိုက်ပြီး ငါးကြင်းမြီး စက်သေနတ် (၁) လက်၊ မော်တာ (၄) လက်၊ လက်နက်ငယ် (၁၆) လက်၊ ကျည်မျိုးစုံ ၁၂ ၀၀၀ ကျော် သိမ်းစည်းရရှိမှု ဖြစ်စဥ် ဖြစ်ပါတယ်။ 

🔺 နောက်ထပ် ထူးခြား ဖြစ်စဥ်ကတော့ ချင်း ပြည်နယ် ဖလမ်း မြို့မှာရှိတဲ့ ခလရ (၂၆၈) တပ်ရင်း ဌာနချုပ်ကို ချင်း အမျိုးသား တပ်မတာ် နဲ့ ချင်းကာကွယ်ရေး တပ်ဖွဲ့တွေ တိုက်ခိုက်မှု အတွင်း လက်နက် တိုက်ထိ ဝင်ရောက်ခဲ့ကာ လေယာဥ်ပစ် ပွိုင့်-၅ စက်သေနက်ကြီး နဲ့ ကျည်များ၊ ငါးကြင်းမြီး စက်သေနတ် (၁) လက်၊ မော်တာ (၃) လက်၊ အာပီဂျီ (၂) လက်၊ လက်နက်ငယ် (၂) လက်တို့ သိမ်းယူနိုင်ခဲ့ပါတယ်။ 

🔺 အလားတူ ကရင်နီ ပြည်နယ်မှာဆိုရင်လဲ စစ်ကောင်စီရဲ့ ၁၂၀ မမ မော်တာ တွေ၊ ၁၂၀ မမ မော်တာ ကျည်တွေကိုပါ ကရင်နီ တပ်မတော် နဲ့ မဟာမိတ် တော်လှန်ရေး အင်အားစုတွေ သိမ်းယူနိုင်ခဲ့ပါတယ်။ 

🔺 မြဝတီ လက်ခတ်တောင် တိုက်ပွဲမှာ မော်တာ (၁) လက်၊ လက်နက်ငယ် (၁၂) လက်၊ ကျည်မျိုးစုံ (၇ ၀၀၀) ကျော် သိမ်းယူရရှိထားပါတယ်။ 

🔺 ယင်းမာပင် တာဝါတိုင် ကုန်းတိုက်ပွဲမှာ လက်နက်ငယ် (၁၅) လက်၊ ကျည်မျိုးစုံ (၉ ၀၀၀) ကျော် သိမ်းယူနိုင်ခဲ့ပါတယ်။ 

🔺ကျောက်တံခါး မြို့နယ် သမင်အင်းကုန်းတိုက်ပွဲမှာ လက်နက်ငယ် (၁၁) လက် နဲ့ စက်သေနက် (၁) လက် သိမ်းယူနိုင်ခဲ့သလို နံဇ တိုက်ပွဲမှာ လက်နက်ငယ် (၆) လက် ကို သိမ်းယူနိုင်ခဲ့ပါတယ်။

🔺 ရှမ်းမြောက် မူဆယ် မြို့နယ် ဆယ်လန့် ကျေးရွာ ဘက်မှာလည်း တအာင်း အမျိုးသား လွတ်မြောက်ရေး တပ်မတော် နဲ့ တိုက်ပွဲဖြစ်ပြီး စစ်ကောင်စီဘက်က စက်သေနက် (၁) လက်၊ လက်နက်ငယ် (၃) လက်၊ ကျည် (၅၀၀၀) သိမ်းယူနိုင်ခဲ့ပါတယ်။ 

🔺 နောက် ညောင်ပင်ကြီး စခန်းသိမ်းတိုက်ပွဲ၊ ဖားဆောင်း-ဒီမော့ဆို တိုက်ပွဲ၊ နေပြည်တော် ဘိုမသံတောင် တိုက်ပွဲ များမှာလည်း လက်နက်များစွာ သိမ်းယူရရှိခဲ့ပါတယ်။  

အထက်ပါ ဖြစ်စဥ်များ အတွင်း လက်နက်ငယ် (၈၀) နီးပါး၊ စက်သေနက် (၅) လက်၊ ကျည်မျိုးစုံ (၃၃ ၀၀၀) ကျော်၊ ၁၂၀ မမ မော်တာ အပါအဝင် မော်တာ မျိုးစုံ၊ လက်နက်ကြီးခဲယမ်း မျိုးစုံ ကို သိမ်းယူရရှိခဲ့ပါတယ်။

လက်နက်တပ်ဆင်ရေးနဲ့ ပတ်သတ်ပြီး အဓိက ရင်းမြစ် (၃) ခု ရှိတယ်လို့ အမျိုးသား ညီညွတ်ရေး အစိုးရ ကာကွယ်ရေး ဝန်ကြီးက ပြောကြားထားပါတယ်။ လက်နက်ဝယ်ယူမှု၊ ကိုယ်တိုင် လက်နက်ထုတ်လုပ်မှု နဲ့ ရန်သူ့ လက်နက် သိမ်းစည်း ရရှိမှု ဆိုတဲ့ ရင်းမြစ် (၃) ခု ပါ။ အထက်ဖော်ပြပါ လက်နက် အမြောက်အမြား သိမ်းစည်းမှု ဖြစ်စဥ် တချို့မှာတင် လက်နက်ငယ် (၈၀) နီးပါး နဲ့ ကျည်မျိုးစုံ (၃၀ ၀၀၀) ကျော် သိမ်းယူနိုင်ခဲ့ပါတယ်။ မော်တာတွေ၊ စက်သေနက်တွေ၊ ဆက်သွယ်ရေး စက်တွေ၊ မိုင်းတွေ ပါဝင်ပါတယ်။ အဆိုပါ လက်နက်ပမာဏ က မြို့နယ် (၂) မြို့နယ်မှာ ပြောက်ကျား စစ်ရေး လှုပ်ရှားမှုတွေ ဖော်ဆောင်ဖို့ ကောင်းမွန်စွာ လုံလောက်တဲ့ ပမာဏ ဖြစ်ပါတယ်။ ဒီ စုစည်းမှုထဲမှာ လက်နက် (၂) လက်၊ (၃) လက် သိမ်းစည်း ရရှိမှု ဖြစ်စဥ်တွေ ထည့်မထားဘဲ လက်နက် ရရှိမှု ဖြစ်စဥ် အားလုံးပေါင်းရင် သိမ်းစည်း ရရှိမှု လက်နက်ငယ် ပမာဏဟာ ရာဂဏန်း ထိ ရှိနိုင်ပြီး သိမ်းစည်းရရှိတဲ့ ကျည် ပမာဏဟာ သိန်းဂဏန်း နီးပါး ရှိနိုင်ပါတယ်။

 

လက်နက် ရရှိရာ မြို့နယ်တွေကတော့ ချင်းပြည်နယ်၊ ကရင်နီ ပြည်နယ် တို့ မှာ အဓိက သိမ်းစည်း ရရှိနေပြီး စစ်တောင်း မြစ်ဝှမ်း ဒေသ မြို့နယ်တွေမှာလည်း ရရှိနေပါတယ်။ အဲဒီ အချက်ကို ကြည့်ရင် ချင်း၊ ကရင်နီ နဲ့ စစ်တောင်း မြစ်ဝှမ်း ဒေသတွေမှာ ရန်သူ ကို အလုံးအရင်း နဲ့ ချေမှုန်း နိုင်နေပြီ ဆိုတဲ့ သုံးသပ်ချက်ကို ကောက်ယူနိုင်ပါတယ်။

သိမ်းပိုက် ရရှိခဲ့တဲ့ လက်နက်တွေထဲမှာ လေယာဥ်ပစ် ပွိုင့်-၅ စက်သေနက်ကြီးတွေ၊ ၁၂၀ မမ မော်တာ လို ဗျူဟာ အဆင့် လက်နက်တွေ ပါ သိမ်းယူနိုင်ခဲ့ပါတယ်။ ဒါ့အပြင် လက်နက်တိုက်တွေ၊ ခဲယမ်းပို့ စစ်ကြောင်းတွေကိုပါ တိုက်ခိုက်နိုင်လာပြီ ဆိုတာ တွေ့နိုင်ပါတယ်။ ဒီ့အတွက်ကြောင့် ပြည်သူ့ ခုခံစစ်ဟာ တပ်စိတ်၊ တပ်စု အဆင့် ချေမှုန်းရေးသာမကဘူး စစ်ကြောင်း၊ တပ်ရင်းအဆင့် ချေမှုန်းရေး၊ တပ်ရင်းဌာနချုပ်များတွင်းသို့ ထိုးဖောက် တိုက်ခိုက်ရေးထိ တိုးတက်လာတာကို တွေ့နိုင်ပါတယ်။ ပြည်သူ့ ခုခံ တော်လှန် စစ် အရှိန်မြှင့်လာလေ ရန်သူ့ လက်နက် အမြောက်အများ သိမ်းစည်းရရှိမှု များပြားလာလေ ဖြစ်ပြီး လက်နက်တပ်ဆင်မှု ပိုမို အားကောင်းလာနိုင်တာကို တွေ့နေရပါတယ်။

လက်ရှိစစ်ရေးအခြေအနေကို ခြုံငုံနားလည်စေဖို့ PDF Insight ကို ဖတ်ရှုပါ။

#PDFInsight