ကန်ပိုက်တီမြို့သိမ်းတိုက်ပွဲ လက်နက် ၁၀၀ကျော် KIAသိမ်းရ

 ကန်ပိုက်တီမြို့သိမ်းတိုက်ပွဲ လက်နက် ၁၀၀ကျော် KIAသိမ်းရ

ဟန်နွေ/People’s Spring

ကချင်လွတ်လပ်ရေးတပ်မတော်(KIA)က ကန်ပိုက်တီမြို့ တိုက်ခိုက်သိမ်းပိုက်ရာတွင် စစ်ကောင်စီတပ်နှင့် ပြည်သူ့စစ်များထံမှ လက်နက် ၁၀၀ကျော်သိမ်းပိုက်ရရှိခဲ့ကြောင်း ကချင်သတင်းရင်းမြစ်အချို့က အသိပေးသည်။

နိုဝင်ဘာ ၂၀ရက်ညနေပိုင်းတွင် ကန်ပိုက်တီမြို့ကို KIAက သိမ်းပိုက်ပြီးနောက် ယနေ့ (နိုဝင်ဘာ ၂၁ရက်)တွင် ကန်ပိုက်တီမြို့သိမ်းတိုက်ပွဲအတွင်း KIA ရရှိခဲ့သည့် လက်နက်ခဲယမ်းများ စုပုံထားသည့် ရုပ်သံကို ကချင်သတင်းရင်းမြစ်အချို့က အသိပေးဖော်ပြလာခြင်းဖြစ်သည်။

" ကန်ပိုက်တီက လက်နက် ၁၀၀ကျော်ရတယ်"ဟုလည်း ကချင်စစ်ရေးသတင်းရင်းမြစ်က ပြောပြသည်။

ထို့ပြင် သတင်းရင်းမြစ်အချို့ဖော်ပြလာသည့် ရုပ်သံ၌ပင် လက်နက်ငယ် အလက် ၈၀ဝန်းကျင် နှင့် ကျည်များ၊ RPG ကျည်များစုပုံထားသည်ကို တွေ့ရသည်။

KIAသည် ကန်ပိုက်တီမြို့သိမ်းတိုက်ပွဲကို ယမန်နေ့ နံနက်ကစတင်ခဲ့ရာ နောက်တစ်ရက်တွင် အောင်မြင်မှုရခဲ့ခြင်းဖြစ်သည်။ 

မြို့သိမ်းတိုက်ပွဲအတွင်း စစ်ကောင်စီတပ်နှင့် ပြည်သူ့စစ်များ တရုတ်ဘက်ထွက်ပြေးသွားခြင်းဖြစ်သည်ဟု စစ်ရေးသတင်းရင်းမြစ်က ပြောပြသည်။

ကန်ပိုက်တီမြို့သိမ်းပိုက်နိုင်မှုအပါအဝင် စစ်ရေး အခြေအနေများ မေးမြန်းရန် KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံဆက်သွယ်ထားဆဲဖြစ်သည်။ 

KIA အနေဖြင့်တိုက်ပွဲအတွင်း လက်နက်ခဲယမ်းရရှိမှု ထိခိုက်ကျဆုံးနှင့် စစ်သုံ့ပန်းဖမ်းဆီးရရှိမှု အခြေအနေများကို အသေးစိတ် သတင်းထုတ် ပြန်လေ့မရှိပေ။

(ကန်ပိုက်တီမြို့သိမ်းတိုက်ပွဲအတွင်း KIAသိမ်းရသော လက်နက်ခဲယမ်းများ။ ဓာတ်ပုံ - ကချင်တောင်တန်း)