ဖက်ဆစ်ရွေးကောက်ပွဲကို တိုက်ဖျက် ဖက်ဒရယ်ဒီမိုကရေစီပဋိညာဉ် ကိုင်စွဲချီတက်

 ❝ ဖက်ဆစ်ရွေးကောက်ပွဲကို တိုက်ဖျက်

ဖက်ဒရယ်ဒီမိုကရေစီပဋိညာဉ် ကိုင်စွဲချီတက် ❞

▬▬▬▬▬▬▬▬▬▬▬▬▬▬▬▬

အခု ကျနော်တို့ ပြည်သူတစ်ရပ်လုံး ပါဝင်ဆင်နွှဲနေကြတဲ့ ပြည်သူ့နွေဦးတော်လှန်ရေးကြီးရဲ့ အဆုံးသတ်ပန်းတိုင်ဟာ အာဏာရှင်စနစ်ဟူသမျှ ချုပ်ငြိမ်းပြီး စစ်မှန်တဲ့ ဖက်ဒရယ်ဒီမိုကရေစီပြည်ထောင်စုသစ် တည်ဆောက်ရေး ဖြစ်ပါတယ်။ ဖွဲ့စည်းပုံအခြေခံဥပဒေ (၂၀၀၈) ဆိုတဲ့ တစ်နိုင်ငံလုံးကို ရာသက်ပန် စစ်ကျွန်ဖြစ်အောင် ရေးဆွဲထားတဲ့ စစ်ကျွန်ခြေ/ဥကြီးကိုလည်း ကျနော်တို့ ပြည်သူ့ဆန္ဒ၊ ပြည်သူ့အားနဲ့ အပြီးတိုင် ဖျက်သိမ်းခဲ့ကြပြီးပြီပဲ ဖြစ်ပါတယ်။

ကျနော်တို့တွေ အပါအဝင် လူထုဟာ ဒီတော်လှန်ခရီး၊ ဒီပန်းတိုင်ဆီကို ချီတက်ကြရာမှာ အခက်အခဲတွေ တင်းကြမ်း၊ အရင်းအနှီးတွေ ကြီးမား၊ ဆုံးရှုံးမှုတွေ များပြားတယ်ဆိုတာကိုလည်း ကောင်းကောင်းကြီး သဘောပေါက် နားလည်ကြပြီးသားပါ။ သို့သော် ဒီတော်လှန်ရေးမှတစ်ပါး အခြားမရှိ၊ တော်လှန်အောင်ပွဲမှသည် ဖက်ဒရယ်စနစ်သစ် တည်ကြမယ်ဆိုတဲ့ ဆုံးဖြတ်ချက်က ပြတ်သားခိုင်မာကြပြီး ဖြစ်ပါတယ်။

လက်ရှိ စစ်ရေး၊ နိုင်ငံရေး၊ စီးပွားရေး၊ သံခင်းတမန်ခင်းစတဲ့ စစ်မျက်နှာစာတိုင်းမှာ ချွတ်ခြုံကျ၊ အရေးမလှဖြစ်နေတဲ့ အကြမ်းဖက်စစ်အုပ်စုဟာ ပြောရရင် အသက်ရှုပေါက် အငမ်းမရ လိုနေပါတယ်၊ ထွက်ပေါက် ရှာချင်နေပါတယ်။ ဒင်းတို့ဟာ လက်နက်အားကိုးပြီး အာဏာသိမ်းခဲ့ပေမယ့် လူထုအားကို အများကြီး လျော့တွက်ခဲ့တာကိုး။ အဲ့ဒီလို ဒင်းတို့ ရှာနေတဲ့ အသက်ရှုပေါက်ထဲမှာ “တရားမဝင်၊ အတုအယောင် ရွေးကောက်ပွဲ” က အဓိက အားကိုးရာကြီးပါပဲ။ စစ်အုပ်စုဟာ ဒီအတုအယောင် ရွေးကောက်ပွဲကို ဟန်ပြ လုပ်ပြီးတော့ အာဆီယံအပါအဝင် နိုင်ငံတကာကို မျက်လှည့်ပြချင်တာပါ။ တရှိန်ထိုး တက်နေတဲ့ ပြည်သူ့တော်လှန်ရေးကြီးအရှိန်အဟုန်ကို ဆွဲချချင်တာပဲ။ ဒီလှည့်ကွက်၊ တနည်း လုပ်ပွဲကို ကျနော်တို့ ပြည်သူတရပ်လုံးက ရှင်းရှင်းလင်းလင်း နားလည်သဘောပေါက်ထားကြပြီးလည်း ဖြစ်ပါတယ်။ ဒါ့ကြောင့် ဖက်ဆစ် အကြမ်းဖက်စစ်အုပ်စုရဲ့ “တရားမဝင်၊ အတုအယောင် ရွေးကောက်ပွဲ”၊ ဖက်ဆစ်ရွေးကောက်ပွဲ တစ်နည်း လုပ်ပွဲကို ပြည်သူတစ်ရပ်လုံးက အကြွင်းမဲ့ ဆန့်ကျင်၊ တိုက်ဖျက်သွားကြမှာလည်း ဖြစ်ပါတယ်။

ဒီနေရာမှာ ပြောစရာတစ်ခု အရေးတကြီး ရှိလာပါတယ်။ စစ်အုပ်စုဆီမှာ နိုင်ငံရေးပါတီအဖြစ် ပြန်လည်မှတ်ပုံတင်ကြတဲ့၊ အတုအယောင်ရွေးကောက်ပွဲမှာ အိမ်ဖြည့်အဖြစ် ဝင်ရောက်အသုံးတော်ခံကြမယ့် နိုင်ငံရေးပါတီတွေ၊ နိုင်ငံရေးသမားတွေနဲ့ ပတ်သတ်ပြီးတော့ပါ။ ဒီတော်လှန်ရေးကာလမှာ ကျနော်တို့ ပြည်သူတွေကြား ပြောဖြစ်ကြတဲ့ စကားတစ်ခု ရှိပါတယ်။ “ဘုရင်ရူးက တစ်ယောက်တည်း၊ ကျွန်ရူးတွေ များနေလို့ တော်လှန်ရေး နှောင့်နှေးနေရတာ” တဲ့။ အဲ့ဒီလိုပါပဲ၊ နိုင်ငံရေးပါတီတွေနဲ့ နိုင်ငံရေးသမားတွေကို စစ်ကျွန် မရူးကြစေချင်ပါဘူး။ ပြည်သူ့ဆန္ဒကို အလေးထားကြစေချင်တယ်၊ ပြည်သူကို မျက်နှာမူကြစေချင်တယ်ဗျာ။ ပြည်သူကို မျက်နှာမမူဘဲ၊ အကြမ်းဖက်စစ်အုပ်စု အလိုကျ အသုံးတော်ခံကြမယ့်၊ ဖက်ဆစ်ရွေးကောက်ပွဲမှာ ဝင်ပါကြမယ့် နိုင်ငံရေးပါတီနဲ့ နိုင်ငံရေးသမားတွေကို “ပြည်သူနဲ့ ဆန့်ကျင်ဘက်မှာ ရပ်တည်ကြသူ” တွေအဖြစ် လူထုက သတ်မှတ်ကြမှာပဲဖြစ်ပါတယ်။ ၂၀၀၈ စစ်ကျွန် ခြေ/ဥကို ပြန်လည် အသက်သွင်းကြရာမှာ အလိုတူအလိုပါဖြစ်ကြမယ့် နိုင်ငံရေးပါတီနဲ့ နိုင်ငံရေးသမားတွေကို “ပြည်သူနဲ့ ဆန့်ကျင်ဘက်မှာ ရပ်တည်ကြသူ” တွေအဖြစ် လူထုက သတ်မှတ်ကြမှာပဲဖြစ်ပါတယ်။

ဒီနွေဦးတော်လှန်ရေးကြီးဟာ အရင်းကြီးသလို အမြတ်ကြီးတာကိုလည်း ပြည်သူအားလုံး အသိပါပဲ။ ဥပမာအားဖြင့်ပြောရရင် ဒီတော်လှန်ရေးကြီးကို အကြောင်းပြုပြီး တောင်တန်းနဲ့ မြေပြန့်အကြား ရင်ခုန်သံချင်း ထပ်တူကျသွားကြတာ၊ ဗမာလူမျိုးနဲ့ အခြားညီနောင်လူမျိုးတွေအကြား ရင်ဘတ်ချင်း နီးသွားကြတာ၊ ဘုံရန်သူနဲ့ ဘုံပန်းတိုင် တူညီသွားကြတာ၊ အကြမ်းဖက်စစ်အုပ်စုကို ဗမာလူမျိုးတွေကိုယ်တိုင်က အပြင်းထန်ဆုံး ဆန့်ကျင်တော်လှန်လာကြတာ၊ ဖက်ဒရယ်ဝါဒနဲ့ ဖက်ဒရယ်ပြည်ထောင်စု တည်ဆောက်နိုင်ရေး အထူးအရေးကြီးလှတာကို ပြည်သူအားလုံးက နားလည်လက်ခံလာကြတာ စသဖြင့်။ အဲ့လို အကျိုးအမြတ်တွေအနက် ကျနော်တို့ ဒီပြည်သူ့နွေဦးတော်လှန်ရေးကြီးကနေ ပေါက်ဖွားရရှိလာတဲ့ အင်မတန် အဖိုးတန်တဲ့ ရတနာတစ်ပါး ရှိပါတယ်။ အဲ့ဒါက “ဖက်ဒရယ်ဒီမိုကရေစီပဋိညာဉ်” (Federal Democracy Charter – FDC) ဖြစ်ပါတယ်။

ဟုတ်ပါတယ်၊ FDC လို့ ကျနော်တို့တွေ အတိုကောက်ခေါ်ကြတဲ့ ဖက်ဒရယ်ဒီမိုကရေစီပဋိညာဉ်ဟာ ခေတ်သစ်မြန်မာ့ သမိုင်းတစ်လျောက် အလွန်ထူးခြားလှတဲ့ နိုင်ငံရေးရလဒ်ကြီးတရပ် ဖြစ်ပါတယ်။ ဒီပဋိညာဉ်ရဲ့ ဦးတည်၊ ရည်ရွယ်ချက်တွေကတော့ စစ်အာဏာရှင်စနစ်အပါအဝင် အာဏာရှင်စနစ်မှန်သမျှ ပ‌ပျောက်ရေး၊ ၂၀၀၈ ခြေ/ဥ အပြီးတိုင် ဖျက်သိမ်းရေး၊ ဖက်ဒရယ်ဒီမိုကရေစီပြည်ထောင်စု တည်ဆောက်ရေး၊ အရပ်သား ပြည်သူ့အစိုးရ ပေါ်ထွန်းရေးတို့ ဖြစ်ပါတယ်။

ပြောရရင် ဒီပဋိညာဉ်ကို အမျိုးသားညီညွတ်ရေးအတိုင်ပင်ခံကောင်စီ (NUCC) မှာ မတူညီသည့် နိုင်ငံရေး အင်အားစုများအကြား အပြင်းအထန်၊ အကြိတ်အနယ် ဆွေးနွေး၊ ငြင်းခုံ၊ ညှိနှိုင်းခဲ့ကြပြီးမှ ရရှိလာခြင်း ဖြစ်ပါတယ်။ ပဋိညာဉ်ကို စပြီးရေးဆွဲခဲ့ကြတာက ဖေဖော်ဝါရီလ ၂၀၂၁ ခုနှစ်ဖြစ်ပြီး နောက်ဆုံးပြန်လည်ပြင်ဆင်ပြီး ပြည်သူ့ညီလာခံကနေ အတည်ပြုခဲ့တဲ့ မတ်လ ၂၀၂၂ ခုထိတွက်မယ်ဆို အစအဆုံး အချိန် (၁) နီးပါးကြာ ဆွေးနွေး၊ ငြင်းခုံ၊ ညှိနှိုင်းခဲ့ရတယ်လို့ ဆိုနိုင်ပါတယ်။

မတူညီတဲ့ အဖွဲ့အစည်းများနှင့် နိုင်ငံရေးအင်အားစုများအနေဖြင့် မိမိတို့ လိုအင်ဆန္ဒများအားလုံးနဲ့ ဒီပဋိညာဉ်ပါ ပြဌာန်းချက်တွေဟာ ထပ်တူထပ်မျှ ဖြစ်နိုင်မယ်မဟုတ်သော်လည်း အများစု ကျေနပ်လက်ခံနိုင်တဲ့ ကြားအဖြေရလဒ်တခုအနေနဲ့ ဒီပဋိညာဉ်ကို သတ်မှတ်ကြပါတယ်။

ပဋိညာဉ်မှာက အစိတ်အပိုင်း (၂) ရပ် ရှိပါတယ်။ အစိတ်အပိုင်း (၁) မှာ လက်ရှိကျနော်တို့ တော်လှန်ရေးအတွက် နိုင်ငံရေးလမ်းပြမြေပုံ၊ နောက်ပြီး အနာဂတ် ဖက်ဒရယ်ဒီမိုကရေစီပြည်ထောင်စု တည်ဆောက်ရေးဆိုင်ရာ လမ်းညွှန်အခြေခံမူတွေကို ဖော်ပြထားပါတယ်။ အစိတ်အပိုင်း (၂) ကတာ့ လက်ရှိ ကြားကာလအတွက် ဖွဲ့စည်းပုံအခြေခံဥပဒေဆိုင်ရာ အစီအမံများ (Constitutional Arrangement) ဖြစ်ပါတယ်။

အထူးသဖြင့် တော်လှန်ရေးအလွန် အနာဂတ်မှာ မျှော်ရည်တည်ဆောက်မယ့် နိုင်ငံသစ်နှင့်ပတ်သက်ပြီး ဖော်ပြထားတဲ့ ပဋိညာဉ် အစိတ်အပိုင်း (၁) အပေါ် NUCC ရဲ့ ပြင်ပမှ နိုင်ငံရေးအင်အားစုတွေကတောင် ယေဘုယျအားဖြင့် သဘောတူ၊ လက်ခံကြတယ်လို့ ကြားရ၊ သိရပါတယ်။ ဒီအချက်က အလွန်အရေးကြီးသလို မြန်မာ့သမိုင်းတစ်လျောက် အလွန်ကြီးမားသည့် နိုင်ငံရေးသဘောတူညီချက် မှတ်တိုင်ကြီးတရပ်လည်း ဖြစ်ပါတယ်။

ကျနော်တို့နိုင်ငံဟာ နှစ်ပေါင်း (၇၀) ကျော် လက်နက်ကိုင်ပဋိပက္ခများစွာကို ပုံစံမျိုးစုံနဲ့ ကြုံတွေ့ခံစားနေရတဲ့ နိုင်ငံဖြစ်ပါတယ်။ မတူညီတဲ့ နိုင်ငံရေးအမြင်တွေ၊ သဘောထားတွေ၊ လူမျိုးတွေ၊ ယဉ်ကျေးမှု ဓလေ့ထုံတမ်းတွေ၊ ပထဝီဝင်အခြေခံတွေ စသဖြင့် စုံလင်ကွဲပြားမှု အလွန်များပြားတဲ့ နိုင်ငံလည်း ဖြစ်ပါတယ်။ ကျနော်တို့ နိုင်ငံရဲ့ အရေးပါတဲ့ နိုင်ငံရေးအင်အားစုတွေကြားမှာ ကျယ်ကျယ်ပြန့်ပြန့် သဘောတူလက်ခံနိုင်တဲ့ နိုင်ငံရေးကတိကဝတ်၊ သဘောတူညီချက်ဆိုတာ အလွန်ရှားပါးလှပါတယ်။

“ဖက်ဒရယ်ဒီမိုကရေစီပဋိညာဉ်” (Federal Democracy Charter – FDC) ဟာ ပြည်သူ့နွေဦးတော်လှန်ရေးကြီးကနေ အရင်းအနှီးကြီးမားစွာနဲ့ ပေါက်ဖွားရရှိလာတဲ့ ရှားပါး၊ ထူးခြား၊ မွန်မြတ်လှတဲ့ “နိုင်ငံရေးသဘောတူညီချက်” ကြီး ဖြစ်ပါတယ်။ တနည်းပြောရရင် ဒီပဋိညာဉ်ဟာ လက်ရှိ တော်လှန်ရေးကာလ (ကြားကာလ) အတွက် ကိုင်စွဲချီတက်ရမယ့် မူဝါဒလမ်းစဉ်ဖြစ်သလို အနာဂတ်မှာ ဖက်ဒရယ်ဒီမိုကရေစီ ပြည်ထောင်စုသစ် တည်ဆောက်ရေးအတွက် အခြေခံမူဘောင်လည်း ဖြစ်ပါတယ်။

ဒါ့ကြောင့် ကျနော်တို့ လူထုတရပ်လုံးအနေနဲ့ ဖက်ဆစ်ရွေးကောက်ပွဲကို တညီတညွတ်တည်း တိုက်ဖျက်ကြပြီး ဖက်ဒရယ်ဒီမိုကရေစီပဋိညာဉ်ကို ကိုင်စွဲကာ တော်လှန်ခရီးပန်းတိုင်အထိ အတူချီတက်ကြပါစို့ တိုက်တွန်း နှိုးဆော်လိုက်ပါတယ်ခင်ဗျား/ရှင်။

❝ ဖက်ဆစ်ရွေးကောက်ပွဲကို တိုက်ဖျက်

ဖက်ဒရယ်ဒီမိုကရေစီပဋိညာဉ် ကိုင်စွဲချီတက် ❞

❐ ၂၀၀၈ ခြေ/ဥ ပြန်အသက်သွင်းသူ_____ပြည်သူ့ရန်သူ

❐ ဖက်ဆစ်ရွေးကောက်ပွဲ လက်ခံသူ_____ပြည်သူ့ရန်သူ

ဖက်ဆစ်စစ်တပ် အမြစ်ဖြတ်။

အရေးတော်ပုံ အောင်ရမည်။

CRD: Tayzar San FB