စစ်ကောင်စီ၏ သွေးစွန်းအကယ်ဒမီပွဲအား သပိတ်မှောက်ကြရန် တိုက်တွန်းနှိုးဆော်လွှာ
မြန်မာ့ရုပ်ရှင်လောကမှ အနုပညာရှင်များနှင့် တတ်သိပညာရှင်များ ခင်ဗျာ....။
ယခုအချိန်ကာလတွင် အကြမ်းဖက်စစ်ကောင်စီမှ နိုင်ငံတော်၏ အာဏာကို လက်နက်အားကိုးဖြင့် မတရားသိမ်းပိုက်ရယူထားပြီး၊ အပြစ်မဲ့ ရဟန်းရှင်လူ ကျောင်းသားပြည်သူများကိုလည်း အကြမ်းဖက် ညှင်းပန်းနှိပ်စက် သတ်ဖြတ်လျက်ရှိသည်။ ထို့အပြင် မြန်မာ့ရုပ်ရှင်လောကကို အစဉ်တစိုက် အားပေးခဲ့ကြသော ကျေးလက်ဒေသရှိ ပြည်သူများစွာတို့၏ အသက်၊ အိုးအိမ်၊ စည်းစိမ်တို့ကို ခြိမ်းခြောက်လျက်ရှိပြီး ကုန်းကောက်စရာ တစမှမရှိ၊ သဂြိုလ်စရာ အလောင်းပင်မရှိသည်အထိ အရက်စက်ဆုံး နည်းများဖြင့် စစ်ရာဇာဝတ်မှုများကို ကျူးလွန်နေပါသည်။ ရုပ်ရှင်၊ စာပေ၊ သဘင်၊ ဂီတ စသည်တို့မှ အနုပညာရှင်၊ အတတ်ပညာရှင်များကိုလည်း မတရားပုဒ်မများစွာဖြင့် ဖမ်းဆီးတရားစွဲဆိုခဲ့ပြီး ဖိနှိပ်ထားလျက်ရှိသည်။
တိုင်းပြည်နှင့် အနုပညာဟူသည် ရေကန်နှင့် ကြာကဲ့သို့ တည်ရှိသည်ဖြစ်ရာ ခေတ်အဆက်ဆက် စစ်အာဏာရှင်လက်အောက်တွင် အနုပညာ၏အဆင့်အတန်းသည်လည်း နိမ်ပါ့ယိုးယွင်းနေခဲ့ရသည့် အခြေအနေကို ရုပ်ရှင်လောကသားများ အသိဆုံးပင်ဖြစ်ပါသည်။ အနုပညာ၏ အခြေခံအကျဆုံးဖြစ်သော လွပ်လပ်စွာထုတ်ဖော်ပြသခွင့်များကို ဖိနှိပ် ပိတ်ပင်ထားပြီး၊ ရုပ်ရှင်ချစ် ပရိသတ်ပြည်သူများကို ညှဥ်းပန်းသတ်ဖြတ်နေသည့် စစ်ကောင်စီမှ ကျင်းပလာမည့် သွေးစွန်းသည့် အကယ်ဒမီပေးပွဲသည် ရုပ်ရှင်လောက၏ အနုပညာအဆင့်အတန်းကို မှတ်ကျောက်တင် အကဲဖြတ်ပေးနိုင်မည်ဟု ယုံကြည်ဖွယ်ရာ၊ လက်ခံဖွယ်ရာ မရှိဟု မိမိတို့မှ ယုံကြည်ပါသည်။
သို့ဖြစ်ရာ အနုပညာရှင်အပေါင်းတို့ကို ခုတုံးလုပ်၊ ရုပ်ရှင်လောကသားများ အမြတ်တနိုးတန်ဖိုးထားရာ အကယ်ဒမီရွှေစင်ရုပ်တု၏ ဂုဏ်သရေကို ညှိုးလျော်စေရန် ကြံရွယ်နေသည့် အကြမ်းဖက်စစ်ကောင်စီ၏ သွေးစွန်းအကယ်ဒမီပေးပွဲအား သပိတ်မှောက် မတက်ရောက်ကြပါရန် လေးနက်စွာ မေတ္တာရပ်ခံအပ်ပါသည်။ ပြည်သူ့ရင်မှ ပေါက်ဖွားသော၊ ပြည်သူ့မေတ္တာ ပြည်သူ့လက်ခုပ်သံဖြင့် ရှင်သန်ရပါသော အနုပညာရှင်၊ အတတ်ပညာရှင်များအနေဖြင့်လည်း ပြည်သူ့ဘက်သို့သာ တည့်တည့်ရပ်တည်၍၊ ပြည်သူ့အကျိုးကိုသာ ရှေးရှု၍ အကြမ်းဖက်စစ်ကောင်စီ၏ သွေးစွန်း အကယ်ဒမီပေးပွဲအပါအဝင် ဝါဒဖြန့်ချိရေးလုပ်ငန်းစဥ်များတွင် မပူးပေါင်း၊ မပါဝင်ကြရန် အနူးအညွှတ်မေတ္တာရပ်ခံတိုက်တွန်းလိုက်သည်။
“ပြည်သူချစ်လျှင် ကမ္ဗည်းတင်မည်၊ ပြည်သူမုန်းလျှင် ပျောက်ပျက်သုန်းမည်”
စစ်အာဏာရှင်ဆန့်ကျင်ရေး ရန်ကုန်အင်အားစု
စစ်ဖိနပ်အောက်ကအနုပညာ ပြည့်သူ့အားနဲ့တိုက်ဖျက်ကြ✊
ReplyDelete