စစ်ကောင်စီကို အသိအမှတ်မပြုနိုင်ကြောင်း မလေးရှား နိုင်ငံခြားရေး ဝန်ကြီးသစ်ပြော
မြန်မာစစ်ကောင်စီကို မလေးရှားနိုင်ငံက အသိအမှတ်ပြုမည်မဟုတ်ဘဲ အာဆီယံ ဘုံသဘောတူညီချက်များ အကောင်အထည်ပေါ်လာရန် ဘက်ပေါင်းစုံမှ ဖိအားပေးသွားမည်ဟု မလေးရှား နိုင်ငံခြားရေးဝန်ကြီးသစ် Dr Zambry Abdul Kadir က ပြောဆိုကြောင်း မလေးရှားအခြေစိုက် Bernama သတင်းက မတ်လ ၂၀ ရက်တွင် ဖော်ပြသည်။
“ဘုံသဘောတူညီချက်များ အကောင်အထည်ပေါ်လာဖို့ စေ့စပ်ညှိနှိုင်းရေးတစ်ခုတည်းသာမကဘဲ တခြား အာဆီယံနိုင်ငံတွေကပါ ဖိအားပေးနေပါတယ် ဒီကိစ္စဟာ မြန်မာတစ်နိုင်ငံတည်းက ဖြေရှင်းလို့ မရတော့ပါဘူး” ဟု Dr Zambry Abdul Kadir က ပြောသည်။
Dr Zambry Abdul Kadir နိုင်ငံခြားရေးဝန်ကြီးအဖြစ် ၂၀၂၂ ခုနှစ် ဒီဇင်ဘာ ၃ ရက်တွင် စတင် တာဝန်ထမ်းဆောင်ခဲ့သည်။ သူက မြန်မာစစ်ကောင်စီကို “တပ်မတော်” ဟု မတ်လ ၂၀ ရက် လွှတ်တော်အတွင်း ဆွေးနွေးမှုတွင် ရည်ညွှန်းပြောဆိုသွားသည်။
မလေးရှား နိုင်ငံခြားရေးဝန်ကြီးသစ်ယင်း တာဝန်စတင်ထမ်းဆောင်ချိန် ၄ လပြည့်တော့မည့်အချိန်တွင် စစ်ကောင်စီကို အသိအမှတ်မပြုနိုင်ကြောင်း မလေးရှားနိုင်ငံ၏ ရပ်တည်မှုကို တရားဝင် ထပ်မံပြောဆိုခြင်းဖြစ်သည်။
မြန်မာနိုင်ငံနှင့် ပတ်သက်သည့် များစွာသော အစည်းအဝေးများ ဆက်တိုက်လုပ်ဆောင်နေပြီး “နောက်ဆုံးမှာတော့ မြန်မာနိုင်ငံအနေနဲ့ ပြီးပြည့်စုံတဲ့ အဖြေတစ်ခုရနိုင်ဖို့ ဆက်လက်ဖိအားပေးနေပါတယ်”ဟုလည်း မလေးရှား နိုင်ငံခြားရေးဝန်ကြီးက ပြောသည်။
မြန်မာ့အရေးဖြေရှင်းရာတွင် အာဆီယံနိုင်ငံများအနေဖြင့် သတိကြီးစွာထား ကိုင်တွယ်ရန်လိုအပ်ပြီး အဖြေသည် မြန်မာကို အာဆီယံအဖွဲ့ဝင်နိုင်ငံမှ ဖယ်ထုတ်ခြင်းမဟုတ်ဟုလည်း Dr Zambry Abdul Kadir ကဆိုသည်။
မလေးရှားနိုင်ငံခြားရေးဝန်ကြီးဟောင်း Saifuddin Abdullah သည်လည်း ယင်းတာဝန်ယူသည့်ကာလအတွင်း မြန်မာနိုင်ငံနှင့် ပတ်သက်၍ ပြင်းပြင်းထန်ထန် ဝေဖန်ခဲ့သည်။ ထို့အပြင် အမျိုးသားညီညွတ်ရေးအစိုးရ NUG ၏ နိုင်ငံခြားရေးဝန်ကြီး ဒေါ်ဇင်မာအောင်နှင်လည်း ၂၀၂၂ ခုနှစ် မေလ ဒုတိယပတ်အတွင်း တွေ့ဆုံဆွေးနွေးခဲ့သေးသည်။ နိုင်ငံရေးတက်ကြွလှုပ်ရှားသူ ဦးဂျင်မီ၊ လွှတ်တော်ကိုယ်စားလှယ်ဟောင်း ဦးဖြိုးဇေယျာသော်တို့ကို စစ်ကောင်စီက ကြိုးပေးကွက်မျက်မှုနှင့် ပတ်သက်၍ လူသားမျိုးနွယ်အပေါ် ကျူးလွန်သည့် ရာဇ၀တ်မှုဟု Saifuddin Abdullah က ဝေဖန်ခဲ့သည်။
စစ်ကောင်စီသည် အာဆီယံ ဘုံသဘောတူညီချက်များကို ပျက်ရယ်ပြုနေသည်ဟုလည်း မလေးရှား နိုင်ငံခြားရေးဝန်ကြီးဟောင်းက ပြောဆိုထားသည်။
(ပုံစာ − စစ်ကောင်စီကို အသိအမှတ်မပြုကြောင်း ထပ်မံပြောဆိုလိုက်သည့် မလေးရှားနိုင်ငံခြားရေးဝန်ကြီး Dr Zambry Abdul Kadir)
No comments:
Post a Comment