EU စီးပွားရေးပိတ်ဆို့မှုကြောင့် ရေနံနှင့်သဘာ၀ ဓာတ်ငွေ့ ဝင်ငွေ ဒေါ်လာ သန်း ၂၀၀ စစ်ကောင်စီထံ မရောက်ဘဲ ပိတ်မိနေ

 EU စီးပွားရေးပိတ်ဆို့မှုကြောင့် ရေနံနှင့်သဘာ၀ ဓာတ်ငွေ့ ဝင်ငွေ ဒေါ်လာ သန်း ၂၀၀ စစ်ကောင်စီထံ မရောက်ဘဲ ပိတ်မိနေ 

■ စစ်တပ်နှင့် ပူးပေါင်းနေသော ထိုင်း PTTEP ကုမ္ပဏီကို NUG အစိုးရက တရားစွဲရန် ပြင်ဆင်နေ

ရန်ကုန်၊ မတ် ၂၀ 

စစ်ကောင်စီအတွက် ဝင်ငွေရလမ်းကြောင်း ရေနံနှင့် သဘာဝဓာတ်ငွေ့ရောင်း ချမှုများ သည် ဥရောပသမဂ္ဂ၏ စီးပွား ရေး ပိတ်ဆို့မှု ကြောင့် သက်ရောက် မှုရှိ ကာ ဒေါ်လာသန်း ၂၀၀ ဝန်းကျင် မြန်မာစစ်တပ်ထံ မရောက်တော့ဘဲ ပိတ်မိ သွားကြောင်း NUG စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီး ဦးတင်ထွန်း နိုင် က ပြောကြားသည်။

ယနေ့ ပြုလုပ်သည့် MOGE နှင့် စပ်လျဉ်းသည့် သတင်းစာရှင်း လင်းပွဲတွင် ၎င်း က အထက်ပါအတိုင်းပြောဆိုလိုက်ခြင်းဖြစ်သည်။ 

မြန်မာနိုင်ငံရှိ ရခိုင်ကမ်းလွန် ရွှေသဘာဝဓာတ်ငွေ့မှ ထွက်ရှိသဘာဝဓာတ်ငွေ့ များကို ကိုရီးယား POSCO က တရုတ်နိုင်ငံကိုတင်ပို့ရာတွင်ငွေပေးချေမှုကို ယူရိုငွေဖြင့် သတ်မှတ်ခဲ့ကြောင်း၊ စစ်အာဏာသိမ်းမှုကြောင့် ဥရောပသမဂ္ဂက မြန်မာနိုင်ငံကို စီးပွားရေးပိတ်ဆို့သောအခါ ယင်းငွေကြေးများ စစ်ကောင်စီထံ မရောက်နိုင်တော့ဘဲ ပိတ်မိသွားခြင်း ဖြစ်ကြောင်း သိရှိရသည်။ 

“EU Sanction က လွှမ်းမိုးပြီးတော့ POSCO က ယူရိုငွေတွေဟာ စစ်ကောင်စီ ထံ မစီးဆင်းတော့ပါ၊ ရွှေသဘာဝ ဓာတ်ငွေ့ က ရရန်ရှိတဲ့ ‌ငွေတွေက Escrow Account (ထိန်းသိမ်းခံရမှု) ထဲရောက်နေပါတယ်”ဟု NUG လျှပ်စစ်နှင့်စွမ်းအင် ဝန်ကြီး ဦးစိုးသူရထွန်းက ယ​နေ့ပြုလုပ်​သောသတင်းစာရှင်းလင်း ပွဲတွင် ပြော သည်။ 

ထို့ပြင် NUG အစိုးရအနေဖြင့် စစ်ကောင်စီနှင့်အတူ စီးပွားရေးပူးတွဲဆောင်ရွက် နေ သော ထိုင်း PTTEP ကုမ္ပဏီကို မတ်လ ၂၀ ရက်နေ့မှ စ၍ ရတနာစီမံကိန်း နှင့်ပတ်သက်သည့် တရားဝင်တောင်းဆိုချက်စာ Demand Letter ပို့လိုက် ကြောင်း၊ ရက်ပေါင်း ၃၀ အတွင်း တုံ့ပြန်မှု မရှိပါက စင်ကာပူနိုင်ငံရှိ Arbitration Tribunal (ခုံသမာဓိရုံး) သို့ တိုင်ကြား၍ ဥပဒေလမ်းကြောင်း အ တိုင်း ဆောင်ရွက်မည်ဖြစ်ကြောင်း NUG အမျိုးသားညီညွတ်ရေးအစိုးရ၏ လျှပ် စစ်နှင့် စွမ်းအင်ဝန်ကြီး ဦးစိုးသူရထွန်းမှ ပြောကြားသည်။ 

ရတနာစီမံကိန်းမှ ရရှိငွေများသည် စစ်တပ်အတွက် မြန်မာပြည်သူများကို အကြမ်း ဖက်သတ်ဖြတ်ရန် အာဏာသိမ်းစစ်အုပ်စုကို အထောက်အပံ့ ဖြစ်နေ ကြောင်း၊ ရေနံနှင့် သဘာဝ ဓာတ်ငွေ့မှ ရရှိသည့် ရန်ပုံငွေများကို အာဏာ သိမ်း စစ်အုပ်စုကို မပေးဆောင်ရန် ယခင်ကတည်းက ကုမ္ပဏီများသို့ သတိပေး စာ များထုတ်ပြန်ခဲ့သော်လည်း PTTEP က လိုက်နာခြင်း မရှိခဲ့ကြောင်း ၎င်းက ဆက် ပြောသည်။

"ကျွန်တော်တို့က မြန်မာနိုင်ငံတော် အစိုးရနေရာမှာ နေပြီးတော့ PTTEP အနေနဲ့ ကတော့ လက်ရှိစစ်ကောင်စီကို ပေးနေတဲ့ ရေနံနဲ့ သဘာဝဓာတ်ငွေ့ကနေ ဝင်နေ တဲ့ ပြည်သူတွေရဲ့ အခွန်ဘဏ္ဍာတွေကို ၊ သူတို့ဆီ လွှဲဝင်နေတဲ့ ဟာတွေ က တရားဥပဒေလမ်းကြောင်းအရ မှားနေတယ်ဆိုတဲ့ဟာ၊ နောက်တစ်ခုက ဒီဟာ တွေကို ဆုံးဖြတ်နိုင်ဖို့ရာက ဥပဒေလမ်းကြောင်းအရ ဒီ Arbitration ကို စာချုပ်ထဲမှာ ပါတဲ့အတိုင်း ကျွန်တော်တို့ သွားတာဖြစ်ပါတယ်" ဟု NUG လျှပ် စစ် နှင့် စွမ်းအင်ဝန်ကြီးဌာန ဒုတိယဝန်ကြီး လဖိုင်မော်ထွန်းအောင်က သတင်း စာရှင်းလင်းပွဲတွင် ပြောကြားသည်။

စစ်ကောင်စီအတွက် ရေနံနှင့် သဘာဝဓာတ်ငွေ့ စီမံကိန်းမှ ဝင်ငွေသည် တစ်လ လျှင် ဒေါ်လာ သန်းပေါင်း ၉၀ နှင့် ၁၀၀ ကြားရှိပြီး ရတနာစီမံကိန်းသည် အများ ဆုံးဖြစ်ကြောင်း သိရှိရသည်။ 

ထိုင်း PTTEP ကုမ္ပဏီကို စတင်၍ Demand Letter ပေးပို့ခဲ့ပြီး နောက်ပိုင်းတွင် အခြား ရေနံနှင့် သဘာဝဓာတ်ငွေ့လုပ်ကိုင်နေသည့် ကုမ္ပဏီများသို့ အလားတူ လုပ်ဆောင် သွားမည်ဖြစ်ကြောင်း NUG က ပြောဆိုသည်။