အာဏာသိမ်း စစ်တပ်ကို ပြန်တိုက်ပြီဟု ကလလတ တရားဝင်ကြေညာ

 အာဏာသိမ်း စစ်တပ်ကို ပြန်တိုက်ပြီဟု ကလလတ တရားဝင်ကြေညာ

ဧရာဝတီ၊ ဇူလိုင် ၁၊ ၂၀၂၃

စစ်တပ်လက်အောက်ခံ နယ်ခြားစောင့်တပ်(BGF)အဖြစ် ရပ်တည်ခဲ့သည့် ကရင်နီပြည်လူမျိုးပေါင်းစု ပြည်သူ့လွတ်မြောက်ရေးတပ်ဦး (ကလလတ) က အာဏာသိမ်းစစ်အုပ်စုအား ပြန်လည်တိုက်ခိုက်နေပြီဖြစ်ကြောင်း ယနေ့တွင် တရားဝင်ကြေညာလိုက်သည်။

၎င်းတို့အနေဖြင့် စစ်အုပ်စု၊ စစ်အာဏာရှင်စနစ်၊ စစ်အစိုးရနှင့် ၂၀၀၈ အခြေခံဥပဒေ အကုန်အစင်တိုက်ဖျက်ရေး ရည်မှန်းချက်ထားရှိပြီး ထိုသို့တိုက်ဖျက်နိုင်မှသာ အားလုံးမျှော်မှန်းတောင့်တလိုလားကြသည့် ဒီမိုကရေစီရေး၊ တန်းတူရေးနှင့် ကိုယ်ပိုင်ပြဌာန်းခွင့် အပြည့်အဝရှိသော ဖက်ဒရယ်ပြည်ထောင်စု(သို့) စစ်မှန်သည့်ပြည်ထောင်စုအား တည်ဆောက်နိုင်ရန် အခြေခံကောင်းများ ပေါ်ပေါက်လာနိုင်မှာဖြစ်ကြောင်းလည်း ပြောထားသည်။

နွေဦးတော်လှန်ရေးတွင်လည်း ၎င်းတို့အနေဖြင့် တတ်နိုင်သမျှနည်းလမ်းများဖြင့် ပါဝင်ခဲ့ပြီးနောက် ယခုအခါတွင် ပြည်ထောင်စုလွှတ်တော်ကိုယ်စားပြုကော်မတီ(CRPH)၊ အမျိုးသားညီညွှတ်ရေးအစိုးရ(NUG)တို့နှင့် နီးနီးကပ်ကပ်လက်တွဲပြီး တော်လှန်ရေးလုပ်ငန်းတာဝန်များ ပူးတွဲလုပ်ဆောင်သွားဖို့လည်း အဆင်သင့်ဖြစ်နေကြောင်းလည်း ကလလတ ကပြောထားသည်။

ယင်းအပြင် အာဏာသိမ်းစစ်အုပ်စုအား တော်လှန်တိုက်ခိုက်နေကြသည့် တောင်ပေါ်မြေပြန့်ဒေသအနှံက မည်သည့်တော်လှန်ရေးအဖွဲ့အစည်းနှင့်မဆို အပြန်အလှန်နားလည်မှု၊ သွေးစည်းညီညွတ်မှု၊ မဟာမိတ်တပ်ပေါင်းစုဖွဲ့စည်းမှုများအား အဆင့်ဆင့်တည်ဆောက်သွားနိုင်ရေးအတွက် စိတ်ရောကိုယ်ပါ အဆင်သင့်ရှိနေကြောင်းလည်း ၎င်းတို့ကပြောထားသည်။

ကရင်နီပြည်လူမျိုးပေါင်းစု ပြည်သူ့လွတ်မြောက်ရေးတပ်ဦး (ကလလတ)သည် ကရင်နီအမျိုးသားတိုးတက်ရေးပါတီ(KNPP)ထံမှ ၁၉၇၈ ခုနှစ်တွင် ခွဲထွက်ကာ ၁၉၉၄ ခုနှစ်တွင် န..အ.ဖ အစိုးရနှင့် အပစ်အခတ်ရပ်စဲရေး သဘောတူညီမှုရယူခဲ့ပြီး ၂၀၀၉ ခုနှစ်တွင် နယ်ခြားစောင့် တပ်အဖြစ် ဖွဲ့စည်းခဲ့သည့်အဖွဲ့ဖြစ်သည်။

ထိုသို့ စစ်အုပ်စုနှင့် အပစ်အခတ်ရပ်စဲထားသည့် ကာလများအတွင်း ပြည်သူလူထု မနှစ်သက်၊ မလိုလားသည့် အပြုအမှုတချို့၊ ဖြစ်ရပ်တချို့ ဖြစ်ပွားခဲ့မှုများ ရှိခဲ့သည်ကိုလည်း ပွင်းလင်းစွာဝန်ခံကြောင်းနှင့် ထိုသို့ တိမ်းစောင်းမှားယွင်းမှုများအတွက် ပြည်သူလူထုအား အလေးအနက် ဝန်ချတောင်းပန်ပါကြောင်းလည်း ၎င်းတို့ကပြောထားသည်။

လက်ရှိတွင်မူ ဇွန်လ ၁၃ ရက်နေ့ဖြစ်ပွားခဲ့သည့် ကရင်နီပြည်နယ်၊ သံလွင်မြစ်အရှေ့ခြမ်း၊ မယ်စဲ့မြို့နယ်ပတ်ဝန်းကျင်ရှိ စစ်ကောင်စီ တပ်စခန်းများအား တိုက်ခိုက်သိမ်းပိုက်မှုမှစတင်ကာ ကလလတ ၏ သမိုင်းစာမျက်နှာသစ်အား တရားဝင်ဖွင့်လှစ်ခဲ့ပြီး စစ်အုပ်စု၏ အဆွယ်အပွားတပ်တခုဖြစ်သည့် နယ်ခြားစောင့်တပ်ဖွဲ့ဘဝမှ စစ်အုပ်စုအား ပြန်လည်ခုခံတော်လှန်သည့် တပ်အဖြစ် အောင်မြင်စွာ ရုန်းထွက်နိုင်ခဲ့ပြီးဖြစ်ကြောင်းလည်း ကလလတ ကြေညာထားသည်။

စစ်ကောင်စီဘက်ကလည်း လတ်တလောတွင် ၎င်းတို့အား ပုန်ကန်တိုက်ခိုက်နေသည့် ဖားဆောင်းမြို့နယ်နှင့် ဘော်လခဲမြို့နယ်တို့အတွင်းရှိ နယ်ခြားစောင့်တပ် အခြေစိုက်တပ်စခန်းများအား လေကြောင်းအင်အားအသုံးပြုကာ အပြင်းအထန်တိုက်ခိုက်လျှက်ရှိရာ တိုက်ပွဲများပြင်းထန်လျှက်ရှိသည်။

ဓာတ်ပုံ - ၂၀၂၁ ခုနှစ် လွိုင်ကော်တွင် ဆန္ဒထုတ်ဖော်စဉ်က ပြည်သူ့ဘက်မှ ရပ်တည်ပေးနေသည့် ကလလတ တပ်ဖွဲ့ဝင်များ / The Kayan Time

#WhatsHappeningInMyanmar 

#RejectMilitaryCoup

#Karenni

#SpringRevolutionMyanmar