ဖယ်ခုံတွင် စစ်တပ် ထောက်ပို့ယာဥ် ၁ စီးကို မိုင်းဆွဲ ပစ်ခတ် တိုက်ခိုက်မှု စစ်သား ၄ ဦးသေဆုံးပြီး လက်နက်၊ ခဲယမ်းများ သိမ်းဆည်းရမိ

 ဖယ်ခုံတွင် စစ်တပ် ထောက်ပို့ယာဥ် ၁ စီးကို မိုင်းဆွဲ ပစ်ခတ် တိုက်ခိုက်မှု စစ်သား ၄ ဦးသေဆုံးပြီး လက်နက်၊ ခဲယမ်းများ သိမ်းဆည်းရမိ

ရန်ကုန်၊ ဇူလိုင် ၁၃

ရှမ်းပြည်နယ်၊ ဖယ်ခုံမြို့နယ်တွင် အကြမ်းဖက် စစ်တပ်၏ ထောက်ပို့ယာဥ် ၁ စီးကို မိုင်းဆွဲ ပစ်ခတ် တိုက်ခိုက်ရာ စစ်သား ၄ ဦးသေဆုံးခဲ့ကြောင်း PDF 1008 တပ်ရင်း (SSRY) က ထုတ်ပြန်ထားသည်။

ဇူလိုင်လ ၉ ရက်နေ့ ည ၈ နာရီခန့်က ဖယ်ခုံမြို့မှ ထွက်ခွာလာသော အကြမ်းဖက် စစ်တပ်၏ လက်နက်ခဲယမ်း တင်ဆောင်လာသော ထောက်ပို့ယာဥ် ၁ စီးကို ညွှန်တော်မူဘုရားနှင့် ထိုင်တော်မူ ဘုရားအကြား လမ်းဆုံ၌ ကရင်နီတော်လှန်ရေးတပ်ဖွဲ့များက မိုင်းဆွဲ ပစ်ခတ်တိုက်ခိုက်ခဲ့ကြောင်း သိရသည်။

ယင်း တိုက်ခိုက်မှုကြောင့် အကြမ်းဖက် စစ်တပ်ဘက်မှ တပ်ခွဲတပ်ကြပ်ကြီး CQ ၊ တပ်ကြပ် ၊ ဒုတပ်ကြပ် အပါအဝင် ၄  ဦး သေဆုံးခဲ့ကြောင်း၊ ထို့ပြင် အကြမ်းဖက် စစ်တပ်ထံမှ MA1 သေနတ် ၁ လက်၊ စက်လက် (ငါးကြင်းမြီး)  ၁ လက်၊ ၆၀ မမ ဗုံးသီး ၁၆ လုံး၊ ၁၈ မိုင်း ၁ လုံး၊ Tecno mobile Phone ၁ လုံး၊ ခဲယမ်းများနှင့် စစ်ရိက္ခာပစ္စည်းများကို သိမ်းဆည်းရမိခဲ့ကြောင်း သိရသည်။

အဆိုပါ တိုက်ခိုက်မှုကို PDF 1008 တပ်ရင်း(SSRY) ၊ PDF ၁၀၀၅ တပ်ရင်း (SSLRU) ၊ NPT (ပ.က.ဖ)၊ KRU ၊ ဖယ်ခုံ PDF 1002တပ်ရင်းနှင့် ရှမ်းတောင် မဟာမိတ် တပ်ပေါင်းစုများမှ ပူးပေါင်းလုပ်ဆောင်ခဲ့​ကြောင်း သိရှိရသည်။