မော်လမြိုင်-ရေး-ထားဝယ် ပြည်ထောင်စု လမ်းပိုင်းကို KNLA၊ PDF ပူးပေါင်းတပ်ဖွဲ့က လုံခြုံရေး ယူကာ စစ်ဆေးမှုများ ပြုလုပ်
ရန်ကုန်၊ ဇူလိုင် ၁၃
မော်လမြိုင်-ရေး-ထားဝယ် အမှတ် ၈ ပြည်ထောင်စု လမ်းပိုင်းကို KNLA၊ PDF ပူးပေါင်းတပ်ဖွဲ့က လုံခြုံရေးယူကာ စစ်ဆေးမှုများ ပြုလုပ်ခဲ့ကြောင်း တောင်ပိုင်းစစ်ဒေသ၊ စစ်ဒေသခွဲ အမှတ် ၃၊ ဒုစစ်ဆင်ရေးမှူးရုံးမှ တာဝန်ရှိသူတစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ယနေ့ ဇူလိုင်လ ၁၃ ရက်နေ့ နံနက် ၉ နာရီ ၄၁ မိနစ်မှ စတင်ကာ နံနက် ၁၁ နာရီအထိ ပြည်ထောင်စုလမ်းမကြီးတစ်လျှောက် လုံခြုံရေးယူကာ စစ်ဆေးမှုများ လုပ်ဆောင်ခဲ့ပြီး ခရီးသွားပြည်သူတွေဘက်ကလည်း အပြည့်အဝပူးပေါင်း ဆောင်ရွက်ခဲ့ကြောင်း သိရသည်။
ယင်း စစ်ဆေးမှုများကို ဇွန်လ ၁၅ ရက်နေ့ကစတင်ကာ KNLA၊ PDF ပူးပေါင်းတပ်ဖွဲ့က နေ့စဉ်ဆောင်ရွက်လျက်ရှိကြောင်း၊ အကြမ်းဖက် စစ်တပ်၏ လက်အောက်ခံ တပ်ရင်း၊ တပ်ဖွဲ့များ အရပ်သားကားဖြင့် ခရီးသည်တင်ကားများကို အသုံးပြုပြီး လက်နက်ခဲယမ်းတွေအပါအဝင် စစ်အင်အားတိုးချဲ့တာတွေ ဆောင်ရွက်နေသည့် အတွက် မော်လမြိုင်၊ မုဒုံ၊ ရေး၊ သံဖြူဇရပ်၊ ထားဝယ်၊ မြိတ်လမ်းပိုင်းကို စစ်ဆေးလျက်ရှိကြောင်း သိရသည်။
အဆိုပါ လမ်းပိုင်းကို ဖြတ်သန်း သွားလာမည့် မော်တော်ယာဉ်များ အနေဖြင့် စစ်တပ်နှင့် ပတ်သက်သည့် လူများ၊ ပစ္စည်းများ တင်ဆောင်ခြင်းမျိုး မပြုလုပ်ရန်၊ ပြည်သူများအနေဖြင့် စစ်တပ်ယာဉ်များနှင့် လိုက်ပါ စီးနင်းခြင်း မပြုလုပ်ရန်နဲ့ အခြား တိုင်းရင်းသား လက်နက်ကိုင်အဖွဲ့များက အသုံးပြုတဲ့ယာဉ်များ အနေဖြင့်လည်း ပူးပေါင်းတပ်ဖွဲ့ဝင်များ စစ်ဆေးသည့်အခါ ကြည်ဖြူစွာအစစ်ဆေးခံရန် ထပ်မံတိုက်တွန်းအပ်ကြောင်း တောင်ပိုင်းစစ်ဒေသ၊ စစ်ဒေသခွဲ အမှတ် ၃၊ ဒုစစ်ဆင်ရေးမှူးရုံးက ထုတ်ပြန်ထားသည်။
No comments:
Post a Comment