အရှေ့ဒဂုံနှင့်မြောက်ဒဂုံတို့တွင် ရာအိမ်မှူးနှင့် ပျူစောထီးဟု သတ်မှတ်ခံရသူတို့ ပစ်ခတ်ခံရပြီး သေဆုံး
ရန်ကုန်၊ ဇူလိုင် ၂၁
ရန်ကုန်တိုင်း၊ အရှေ့ဒဂုံမြို့နယ်နှင့် ဒဂုံမြို့သစ်မြောက်ပိုင်းမြို့နယ်တို့တွင် စစ်ကောင်စီခန့် ရာအိမ်မှူး ၁ ဦးနှင့် ပျူစောထီးဟု နာမည်ထွက်သူတို့ ပစ်ခတ်ခံရပြီး သေဆုံးသွားကြောင်း ဒေသပြည်သူများထံမှ သိရှိရသည်။
ယနေ့ ဇူလိုင်လ ၂၁ ရက်နေ့ နံနက် ၈ နာရီ ဝန်းကျင်အချိန် ဒဂုံမြို့သစ်အရှေ့ပိုင်းမြို့နယ်၊ ၁၀၈ရပ်ကွက် ဦးမြူလမ်းရှိ အောင်သပြေရောင်ခြည်သစ်လက်ဖက်ရည်ဆိုင် ထိုင်၍ ပြန်လာသော စစ်ကောင်စီခန့် ရာအိမ်မှူး ကျော်လွင်ကို သေနတ်သမား ၁ ဦးက သေနတ်ဖြင့် ပစ်ခတ်သဖြင့် ပွဲချင်းပြီး သေဆုံးသွားကြောင်း သိရှိရသည်။
"ဆိုင်ကယ်စီးနေတဲ့ ရာအိမ်မှူးကို ဆိုင်ကယ်ပေါ်ကနေပဲ ပစ်သွားတာ။ ပွဲချင်းပြီး ဆုံးတယ်" ဟု ဒေသပြည်သူတစ်ဦး က ပြောဆိုသည်။
အလားတူ ဇူလိုင်လ ၂၀ ရက်နေ့ ည ၇ နာရီဝန်းကျင်အချိန် ဒဂုံမြို့သစ်မြောက်ပိုင်းမြိုနယ်၊ ၃၈ ရပ် ကွက်၊ ရာဇဓိရာဇ်လမ်းနှင့် ခရေလမ်းထောင့်တွင် ဘေးတွဲဆိုင်ကယ်မောင်းသူ ကျော်ဆန်းဝင်း သေနတ်ဖြင့် ပစ်ခတ်ခံရပြီး သေဆုံးသွားကြောင်း သိရှိရသည်။
"ပစ်ခတ်မှုက ရာဇဓိရာဇ်လမ်းနှင့်ခရေလမ်းထောင့်မှာ ဖြစ်တာ။ ပစ်သတ်ခံရတာက ပျူစောထီးလို့ ပြောတယ်။ သတင်းပေးလုပ်နေတဲ့သူလို့လည်းပြောတယ်။ အတိအကျတော့မသိရဘူး။ ပစ်သွားတာကလည်း ဆိုင်ကယ်နဲ့ ပစ်သွားတာပဲ" ဟု ဒေသပြည်သူတစ်ဦးက ရှင်းပြသည်။
လက်ရှိတွင် အရှေ့ဒဂုံနှင့်မြောက်ဒဂုံဘက်ကတွင် စစ်ကောင်စီတပ်များက လမ်းဆုံလမ်းခွများကို ပိတ်ဆို့ စစ်ဆေးမှုများ လုပ်ဆောင်နေပြီး ဆိုင်ကယ်များကို ဖမ်းဆီးနေကြောင်း၊ ဘေးတွဲဆိုင်ကယ်နှင့် ဆိုင်ကယ်စီးသူများကို ရိုက်နှက် ဖမ်းဆီးသည်အထိ လုပ်ဆောင်နေကြောင်း သိရှိရသည်။
No comments:
Post a Comment