ချင်းပြည်နယ်နဲ့ မကွေးတိုင်းရဲ့ ပေါင်းစည်းမှုအင်အား

 ချင်းပြည်နယ်နဲ့ မကွေးတိုင်းရဲ့ ပေါင်းစည်းမှုအင်အား 

————————————————————————

ဟိုးလက်နက်ကိုင် တော်လှန်ရေးကာလစခါစ၊ စစ်ရေးသဘောနဲ့ မကျွမ်းဝင်ချိန်ကာလမှာတုန်းက နေရာ ဒေသ အခြေခံ မတူညီကြတဲ့ တပ်ဖွဲ့တွေ ပူးပေါင်းပြီး စစ်တိုက်ဖို့ ဖြစ်နိုင်ရဲ့လားလို့ တွေးတောမိကြပါလိမ့်မယ်။ 

မြေပြင်မှာ အတူယှဉ်တွဲလို့ စစ်တိုက်ကြတဲ့အခါ ဆင့်ကဲ chain of command တွေ ၊ တာဝန်ခွဲဝေယူခြင်းတွေနဲ့ ဖြစ်လို့ မလွယ်ကူနိုင်သလို အချိန်လည်း အတော်ကို ယူခဲ့ရမှာ အမှန်ပါပဲ။ 

အခု တော်လှန်ရေးကာလ ၂ နှစ်ကျော်မှာ တွေ့လာရတဲ့ ချင်းပြည်နယ်က CNA /CDF တပ်ဖွဲ့တွေ နဲ့ အမှတ်(၁)စစ်ဒေသ၊ မကွေးတိုင်းက PDF တွေရဲ့ ပူးပေါင်းတိုက်ပွဲတွေက “ဖြစ်နိုင်ပါတယ်” လို့ အဖြေပေးနေသလို ရှိပါတယ်။ 

ဇူလိုင်လလယ်ကနေစပြီး စစ်ကောင်စီတပ်ဟာ ချင်းပြည်နယ်ကို ကုန်းလမ်း  ဝင်ရောက်နိုင်ဖို့ မကွေးတိုင်းနဲ့ ချင်းပြည်နယ်အစပ်မြို့ဖြစ်တဲ့ ကန်ပက်လက်မြို့နယ်ကို အပြင်းအထန်ထိုးစစ်ဆင်နေတာဖြစ်ပါတယ်။ သူတို့အနေနဲ့ အင်အားကျန်ရှိနေသေးတဲ့ ကန်ပက်လက်မြို့ နဲ့ ကျင်ဒွေးမြို့ပေါ်က စစ်စခန်းများကို ရီက္ခာဖြည့်တင်းဖို့နဲ့ တပ်ပြောင်းလဲဖို့ ရည်ရွယ်ပြီး မကွေးတိုင်းက မြို့နယ်တွေကို ဖြတ်သန်းပြီး စစ်ကြောင်း ၂ ကြောင်း သုံးကာ လာခဲ့တာ ဖြစ်ပါတယ်။ 

လက်ရှိမှာတော့ ဒီစစ်ကြောင်းတွေရဲ့ အသွားအပြန် လမ်းကြောတလျောက်မှာ CNA/CDF/PDFပူးပေါင်းတပ်များက လက်တွဲညီညီ ရင်ဆိုင်တိုက်ခိုက်လျက်ရှိပြီး ဇူလိုင်လ ၂၄ ရက်နေ့ တစ်ရက်ထဲရဲ့ တိုက်ပွဲတွေမှာ စစ်ကောင်စီတပ်သား၂၀ဦး သေဆုံးခဲ့ပါတယ်။ ယနေ့ထိလည်း ကန်ပက်လက်မြို့နဲ့ နယ်မြေဆက်စပ် မကွေးတိုင်း၊ ဆောမြို့နယ်မှာ ထိတွေ့မှုတွေ ရှိနေဆဲဖြစ်ပါတယ်။ 

ဒီလို အကြမ်းဖက် စစ်ကောင်စီတပ်သားတွေရဲ့ သေဆုံးအလောင်းများဟာလည်း သက်သေ တစ်ရပ်အဖြစ်ပြနေတာဖြစ်လို့ ပေါင်းစည်းမှုအင်အားနဲ့ စစ်ဆင်ရေးတွေ ညှိနှိုင်း လုပ်ဆောင်လာနိုင်တာ၊ စစ်မြေပြင် အဆင့်မှာ ချိတ်ဆက် ဆက်သွယ်နိုင်မှု အားကောင်းလာတာကို မီးမောင်းထိုးနေကြောင်း တင်ပြလိုက်ပါတယ်။

လက်ရှိစစ်ရေးအခြေအနေကို ခြုံငုံနားလည်စေဖို့ PDF Insight ကို ဖတ်ရှုပါ။

#PDFInsight