စစ်ဆေးမှုကြမ်းသည့် ဖားအံ သံလွင်တံတားဂိတ်ပေါက်ကွဲမှုဖြစ်၊ ထိခိုက်မှုရှိ
ဇူလိုင်လ ၃၁ ရက်၊ ၂၀၂၃ ခုနှစ်။ ကေအိုင်စီ
ဝင်ထွက်သွားလာနေသည့် ပြည်သူများကို စစ်ဆေးမှုကြမ်းပြီး လူငယ်များမကြာခဏ ဖမ်းဆီးခံရလေ့ရှိသည့် ကရင်ပြည်နယ်၊ ဖားအံမြို့သံလွင်တံတားစစ်ဆေးရေးဂိတ်တွင် ယနေ့ ဇူလိုင်လ ၃၁ရက်နေ့ နံနက် (၇)နာရီအချိန်ခန့်က ပေါက်ကွဲမှုဖြစ်ပွားသည်ဟု ဒေသခံများထံမှ သိရသည်။
အဆိုပါ ပေါက်ကွဲမှုကြောင့် စစ်ဆေးရေးပြုလုပ်နေသည့် စစ်ကောင်စီလက်အောက်ခံ တပ်ဖွဲ့ဝင် အချို့ထိခိုက်မှုရှိသည်ဟုသိရပြီး ပေါက်ကွဲမှုဖြစ်ပွားသည့်နေရာတွင် အရေးပေါ်ကယ်ဆယ်ရေး ကားများလည်း သွားလာနေသည်ဟု တွေ့ရှိရသည်ဟု ဒေသခံတစ်ဦးက ပြောသည်။
ဗုံးပေါက်ကွဲမှုဖြစ်စဉ်အသေးစိတ်ကို စုံစမ်းနေဆဲဖြစ်သလို လက်ရှိအချိန်တွင် သံလွင်တံတား ဖြတ်သန်း သွားလာမှုကို စစ်ကောင်စီဘက်မှ ပိတ်ထားလိုက်ကာ စစ်ဆေးမှုများလုပ်ဆောင်လျက်ရှိသည်ဟု ၎င်းဒေသခံက ဆက်ပြောသည်။
သံလွင်တံတားပေါ်တွင် ဖမ်းဆီးစစ်ဆေးမှုများနှင့်ပတ်သက်၍ နာမည်ကြီးသည့် စစ်ဆေးရေးဂိတ်တစ်ခုဖြစ်သလို တံတားပေါ်တွင် ဖြတ်သန်းသွားလာသည့် ပြည်သူလူထုယာဉ်များအားလုံးကို ယာဉ်ပေါ်မှ ဆင်းခိုင်းကာ မှတ်ပုံတင် နှင့်လက်ကိုင်ဖုန်းထဲရှိ အချက်အလက်များကို စစ်ဆေးလေ့ရှိသည့် ဂိတ်တစ်ခုလည်းဖြစ်သည်။
ထို့အပြင် လက်ကိုင်ဖုန်းထဲတွင် နိုင်ငံရေး Post များကို တွေ့ရှိခဲ့ပါက ငွေညစ်တောင်းခံနေသည့်အပြင် နည်းပညာနှင့်ဖုန်းများ စစ်ဆေးနေသည့်အတွက် လူငယ်အမြောက်အများလည်း မကြာခဏ ဖမ်းဆီးခံခဲ့ရသည့် ဂိတ်တစ်ခုဖြစ်ကြောင်းလည်း သိရသည်။
#KIC
No comments:
Post a Comment