မော်လိုက်ရှိ စစ်တပ် စခန်း သိမ်းပိုက်ခံလိုက်ရသည့် တောင်အင်းရွာကို စစ်တပ်က ၁၂၀ မမ လက်နက်ကြီးများဖြင့် ပစ်ခတ်ပြီး အင်အား အလုံးအရင်းဖြင့် စစ်ကြောင်းထိုးနေ
ရန်ကုန်၊ ဇူလိုင် ၆
စစ်ကိုင်းတိုင်း၊ မော်လိုက်မြို့နယ်တွင် စစ်တပ် စခန်း သိမ်းပိုက်ခံလိုက်ရသည့် တောင်အင်းရွာကို အကြမ်းဖက် စစ်တပ်က ၁၂၀ မမ လက်နက်ကြီးများဖြင့် ပစ်ခတ်ပြီး အင်အား အလုံး အရင်းဖြင့် စစ်ကြောင်းထိုးလျက်ရှိကြောင်း ဒေသပြည်သူများထံမှ သိရသည်။
ယနေ့ဇူလိုင်လ ၆ ရက် နံနက် ၇ နာရီခန့်ကစတင်ပြီး မော်လိုက်မြို့နယ်၊ ညောင်သပြေကျေးရွာ၊ ပေါ် တော်မူကုန်း၌ အင်အား ၄၀ ခန့်ဖြင့် ၁၂၀ မမ လက်နက်ကြီးများ အထိုင်ချတပ်စွဲကာ တောင်တွင်း ကျေးရွာ၊ တောင်အင်းကျေးရွာ၊ တနန်းတောကျေးရွာများဘက်သို့ ပစ်ခတ်ကာ ခြေလျင်အင်အား ၁၂၀ ခန့်ဖြင့် တောင်အင်းကျေးရွာဘက်သို့ ပြန်လည် ဝင်ရောက်နေခြင်း ဖြစ်ကြောင်း သိရသည်။
“ပြီးခဲ့တပတ်လောက်က စခန်းသိမ်းခံလိုက်ရတဲ့ တောင်အင်းရွာ၊ တနန်းတောရွာဘက်ကို ၁၂၀ မမ လက် နက်ကြီးတွေနဲ့ လှမ်းထုပြီး တောင်အင်းကျေးရွာဘက်ကို စစ်ကြောင်းထိုးနေတယ်၊ တောင်အင်းရွာကို တော့ ၄၀ ၊ ၅၀ လောက်ရောက်နေပြီလို့ သိရတယ်၊ လက်နက်ကြီးနဲ့ထုနေတာ ၁၂ ချက်လောက်ရှိပြီ၊ တောင်အင်းရွာထဲအထိ ကျတယ်လို့ ပြောတယ်၊ ညောင်သပြေရွာနဲ့ တောင်အင်းရွာက ၇ မိုင်လောက် ဝေးတယ်ဗျ၊အခုမှ စစ်ကြောင်းထိုးနေ တာဆိုတော့ တိုက်ပွဲပြင်းပြင်းထန်ထန်ဖြစ်တာမရှိသေးဘူး။” ဒေသနေပြည်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ ဇူလိုင်လ ၅ ရက်နေ့က ကလေးမြို့မှ ရဟတ်ယာဉ် ၂ စီးဖြင့် အကြမ်းဖက်စစ်သား ၈၀ ခန့် မော် လိုက်မြို့သို့ ပို့ဆောင်ခဲ့ကြောင်း၊ အလားတူ ကလေးဝဘက်မှလည်း ကားကြီး၊ ကားငယ်များဖြင့် မော် လိုက် မြို့သို့ ပို့ဆောင်ခဲ့ကြောင်း၊ ထိုသို့ ပို့ဆောင်မှုကြောင့် ကလေးဝနှင့်မော်လိုက်ကြားရှိ ပလူဇဝကျေး ရွာ အနီးရှိ တံတားကို ပြည်သူ့ကာကွယ်ရေးတပ်ဖွဲ့များမှ မိုင်းခွဲ ဖျက်ဆီးဖြတ်တောက်ခဲ့သော်လည်း ထိရောက်မှုနည်းခဲ့ပြီး ကားကြီးများ သွားလာနိုင်ခြင်းမရှိသော်လည်း ကားငယ်များသွားလာနိုင်သဖြင့် ကားငယ်များဖြင့် ပို့ဆောင်နေခြင်းဖြစ်ကြောင်း သိရသည်။
ပြီးခဲ့သည့် ဇွန်လ ၃၀ ရက်နေ့က အကြမ်းဖက်စစ်တပ် ခမရ ၃၆၅ ၊ ခမရ ၃၆၆ ၊ ရဲနှင့် ပျူစောထီးပူးပေါင်း အခြေချတပ်စွဲထားသော တောင်အင်းကျေးရွာစခန်းကုန်းကို ပြည်သူ့ကာကွယ်ရေးတပ်မတော်၊ အမှတ် ၁ စစ်ဒေသ၊ မော်လိုက်ခရိုင်တပ်ရင်း ၂ ၊ တပ်ရင်းမှူး ဦးစီးပြီး ဝင်ရောက်တိုက်ခိုက်သိမ်းပိုက်ခဲ့ရာ အကြမ်း ဖက်စစ်တပ်မှ ဗိုလ်ကြီး ၁ ဦးအပါအဝင် ၁၀ ဦးထက်မနည်းသေဆုံးပြီး စိန်ပြောင်း ၂ လက်အပါအဝင် လက်နက်ခဲယမ်းအမြောက်အများ သိမ်းဆည်းရရှိခဲ့သည်။
No comments:
Post a Comment