NCA ကို ကျောခိုင်းခြင်း

 NCA ကို ကျောခိုင်းခြင်း

————————————

အကြမ်းဖက် စစ်တပ် အနေနဲ့ တနိုင်ငံလုံး ပစ်ခတ်တိုက်ခိုက်ရပ်စဲမှု သဘောတူညီချက် စာချုပ် NCA ကို အသုံးချပြီး လူမျိုးစု လက်နက်ကိုင်တချို့ကို တက်နိုင်သမျှ စည်းရုံးဖို့၊ တော်လှန်ရေး ကို သွေးခွဲဖို့ ကြိုးပမ်းနေပေမယ့်လဲ NCA စာချုပ် ပျက်ပြယ်သွားပြီလို့ ကရင် အမျိုးသား အစည်းအရုံး KNU အထွေထွေအတွင်းရေးမှူး ပဒိုစော တာဒိုမှူးက တရားဝင်ပြောကြားသွားပါတယ်။

တကယ်ဆိုရင်လဲ NCA စာချုပ်ဟာ နွေဦးတော်လှန်ရေးရဲ့ နိုင်ငံရေး၊ စစ်ရေး အခြေအနေတွေ နဲ့ ကိုက်ညီမှု မရှိတော့ပါဘူး။ တနိုင်ငံလုံး ပစ်ခတ် တိုက်ခိုက်မှု ရပ်စဲဖို့၊ နောက် ငြိမ်းချမ်းရေးဆွေးနွေးပွဲတွေ၊ သက်ဆိုင်ရာ အမျိုးသားရေးအုပ်စု အလိုက် ညီလာခံတွေ၊ ငြိမ်းချမ်းရေး ညီလာခံတွေ ကျင်းပဖို့၊ သဘောတူညီချက်တွေရယူပြီး လွှတ်တော်ကနေ တဆင့် အတည်ပြုဖို့ ဆိုတဲ့ ရည်ရွယ်ချက်နဲ့ ၂၀၁၅ ခုနစ် မှာ စာချုပ်ကို မြန်မာ အစိုးရ၊ စစ်တပ်၊ ကျောင်းသား တပ်မတော် ABSDF ၊ ရခိုင်ပြည် လွတ်မြောက်ရေးပါတီ ALP ၊ ချင်း အမျိုးသား တပ်ဦး CNF ၊ ကရင် ငြိမ်းချမ်းရေး ကောင်စီ KNU/KNLA PC ၊ ဒီမိုကရက်တစ် ကရင်အမျိုးပြု တပ်မတော် DKBA ၊ ကရင် အမျိုးသား အစည်းအရုံး KNU ၊ပအိုဝ်းအမျိုးသား လွတ်မြောက်ရေး အဖွဲ့ချုပ် PNLO ၊ သျှမ်းပြည် ပြန်လည်ထူထောင်ရေးကောင်စီ RCSS တို့ လတ်မှတ်ရေးထိုးခဲ့ကြပါတယ်။ ၂၀၁၈ ခုနစ်မှာ လားဟူ ဒီမိုကရတ်တစ် ယူနီယံ LDU နဲ့ မွန်ပြည်သစ်ပါတီ NMSP တို့ပါ လက်မှတ်ရေးထိုးခဲ့ပါတယ်။

လက်ရှိမှာတော့ စာချုပ် လက်မှတ်ရေးထိုးခဲ့တဲ့ အဖွဲ့တွေထဲက ကရင် အမျိုးသား အစည်းအရုံး KNU နဲ့ ချင်း အမျိုးသား တပ်ဦး CNF တို့ က နွေဦးတော်လှန်ရေးမှာ တက်တက်ကြွကြွပါဝင် တိုက်ခိုက်လျက်ရှိပါတယ်။ 

ကျန်ရှိနေသေးတဲ့ အဖွဲ့တွေထဲမှာ သျှမ်းပြည် ပြန်လည် ထူထောင်ရေး ကောင်စီ RCSS နဲ့ မွန်ပြည်သစ် ပါတီ NMSP တို့ပဲ အင်အားကောင်းတဲ့ အဖွဲ့တွေပါ။ မွန်ပြည်သစ် ပါတီ စစ်ကြောင်းတွေဟာလဲ လက်ရှိကာလမှာ ရေး နဲ့ သံဖြူဇရပ်မြို့နယ်တွေ မှာ စတင် ကင်းလှည့်လျက်ရှိသလို ကျန် လူမျိုးစု အဖွဲ့တွေ အားလုံး တိုက်ခိုက်ရင် စစ်ကောင်စီကို တိုက်ခိုက်မယ်ဆိုတဲ့ သဘောထားကိုလဲ ပြောကြားလျက်ရှိပါတယ်။ ရှမ်းပြည်တပ်မတော် (တောင်ပိုင်း) လို့ လူသိများတဲ့ RCSS အဖွဲ့ကသာလျင် ထုတ်ဖော်ပြောကြားမှု မရှိသေးတာ ဖြစ်ပါတယ်။ NCA စာချုပ် လက်မှတ်ရေးထိုးထားတဲ့ အဖွဲ့တွေထဲက အင်အားကောင်းတဲ့ အဖွဲ့အားလုံး နီးပါးက စစ်ကောင်စီ ကို ဆန့်ကျင် နေတဲ့ သဘောမှာ ရှိပါတယ်။ 

နေပြည်တော်ကို သွားရောက်ပြီး ဆွေးနွေးလျက်ရှိတဲ့ အဖွဲ့တချို့ဟာဆိုရင် လက်တွေ့ အင်အား သိပ်မရှိတဲ့ အဖွဲ့ငယ်လေးတွေသာ ဖြစ်ပါတယ်။ လူမျိုးစုတွေ နဲ့ လူထု ကောင်းကျိုး အတွက် ရေရှည်တည်တံ့ ခိုင်မြဲတဲ့ ငြိမ်းချမ်းရေး တည်ဆောက်ရေး ၂၀၀၈ ခုနစ် အခြေခံ ဥပဒေ နဲ့ ၂၀၁၅ ခုနစ် NCA စာချုပ်ကို အခြေခံ ရမယ်လို့ စစ်ကောင်စီ ခေါင်းဆောင် မင်းအောင်လှိုင်က ပြောကြားနေပေမယ့် အဲဒီ အခြေခံ ဥပဒေ နဲ့ စာချုပ်ကို ဘယ် လူမျိုးစု အဖွဲ့ကမျှ အလေးထားခြင်း မရှိတော့ပါဘူး။ ၂၀၂၁ ခုနစ် စစ်အာဏာသိမ်းလိုက်ပြီးကတည်းက အဲဒီ သဘောတူ စာချုပ်တွေ ပျက်ပြယ်သွားပြီ ဖြစ်ပါတယ်။

‌NCA လက်မှတ် မထိုးအဖွဲ့များ

——————————————

မူလ ကတည်းက မြောက်ပိုင်း လူမျိုးစု အဖွဲ့တွေ ဖြစ်တဲ့ ဝပြည်သွေးစည်း ညီညွတ်ရေးပါတီ UWSP၊ အမျိုးသား ဒီမိုကရက်တစ် မဟာမိတ် အဖွဲ့ NDAA၊ ရှမ်းပြည် တိုးတက်ရေး ပါတီ SSPP၊ ကချင် လွတ်လပ်ရေး အဖွဲ့ KIO တို့က NCA စာချုပ်ကို လက်မှတ်ရေးထိုးထားခြင်း မရှိပါဘူး။ စစ်အာဏာသိမ်းပြီးတဲ့နောက်မှာလဲ အခြေအနေအရ နေပြည်တော်ကို သွားရောက်ဆွေးနွေးနေတဲ့ အဖွဲ့တွေထဲမှာ ဝ၊ မိုင်းလား၊ ရှမ်းပြည် တိုးတက်ရေးပါတီ တို့ပါဝင်ပေမယ့်လဲ စစ်ကောင်စီက ဖိတ်ကြားတဲ့ ငြိမ်းချမ်းရေး ညီလာခံ တက်မှာ မဟုတ်ဘူးလို့ ငြင်းဆိုထားပါတယ်။ ဒီရက်ပိုင်းမှာဆိုရင် ရှမ်းပြည်တပ်မတော် (မြောက်ပိုင်း)လို့ လူသိများတဲ့ SSPP နဲ့ စစ်တပ် ကြားမှာပါ မြေပြင်တိုက်ပွဲတွေ ဖြစ်လာပါတယ်။ ဒါတွေက ဘာကိုပြလဲဆိုတော့ စစ်တပ်ရဲ့ NCA အတုအယောင် စာချုပ်ကို အင်အားကြီး မြောက်ပိုင်း လူမျိုးစု လက်နက်ကိုင် အဖွဲ့တွေကလဲ လက်မခံဘူးဆိုတာ ကို ပြပါတယ်။

သမိုင်းရဲ့ ပျက်ရယ်ပြုမှု လို့ ပြောလို့ရတဲ့ အချက်ကတော့ NCA စာချုပ်ချုပ်ဖို့ ဆွေးနွေးတော့ ဆွေးနွေးပွဲ တက်ဖို့ တောင်းဆိုခဲ့တဲ့ ရခိုင် AA၊ ကိုးကန့် MNDAA၊ နဲ့ တအာင်း TNLA အဖွဲ့တွေ ကို စစ်တပ်က လက်မခံခဲ့တဲ့ ၂၀၂၁ နောက်ပိုင်း အခင်းအကျင်းမှာမှ ညီနောင် ၃ ဖွဲ့ လို့ နာမည်ကျော်တဲ့ အဲဒီအဖွဲ့တွေ နဲ့ ငြိမ်းချမ်းရေး ဆွေးနွေးဖို့ စစ်တပ်က အသည်းအသန် ကြိုးပမ်းနေရပါတယ်။ အဲဒီ ၃ ဖွဲ့ကလဲ ရှမ်းမြောက်မှာ တိုက်ပွဲတွေ အရှိန်မြှင့်ပြီးတော့ဘဲ လက်တွေ့ အဖြေပေးထားပါတယ်။

NCA နိဂုံးချုပ်သွားခြင်း

————————————

မူလ NCA လက်မှတ်ထိုးထားတဲ့ အဖွဲ့တွေရော၊ ယခင်ကတည်းက လက်မှတ်ထိုးမထားတဲ့ အဖွဲ့တွေပါ စစ်ကောင်စီ ကို တိုက်ခိုက်တာ၊ ဆန့်ကျင်တာတွေ လုပ်နေတဲ့ အတွက် NCA စာချုပ် ပျက်ပြယ်သွားပြီလို့ ပြောလို့ရပါတယ်။ NCA ထဲမှာ ဆက်လက် ပါဝင်နေတဲ့ အင်အားကြီး အဖွဲ့ ဆိုလို့ ရှမ်း RCSS နဲ့ မွန်ပြည်သစ် NMSP တို့ပဲ ကျန်ပါတယ်။ အဲဒီ အဖွဲ့တွေဟာလဲ မကြာခင်မှာ တော်လှန်ရေးမှာ ပူးပေါင်းလာဝင်လာမယ့် အလားအလာတွေ အများကြီးတွေ့နေရပါတယ်။ 

အသိသာဆုံးကတော့ ဒီရက်ပိုင်းမှာ မွန်ပြည်သစ် ပါတီရဲ့ စစ်ကြောင်းတွေ လှုပ်ရှားလာမှု ဖြစ်ပါတယ်။ NCA ကို လူမျိုးစု အဖွဲ့တွေ ကျောခိုင်းသွားမှု နဲ့ အတူ တောင်တန်း ‌တော်လှန်ရေး နဲ့ မြေပြန့်တော်လှန်ရေး သွေးခွဲဖို့ ကြိုးစားတဲ့ စစ်တပ်ရဲ့ အကြံဟာလဲ ပျက်ပြယ်သွားရပြီ ဖြစ်ပါတယ်။

လက်ရှိစစ်ရေးအခြေအနေကို ခြုံငုံနားလည်စေဖို့ PDF Insight ကို ဖတ်ရှုပါ။

#PDFInsight