ကျောက်တော်၊ မြောက်ဦး ၊မင်းပြားမြို့များအား ရက္ခိုင့်တပ်တော်(AA) သိမ်းပိုက်ထိန်းချုပ်

 ကျောက်တော်၊ မြောက်ဦး ၊မင်းပြားမြို့များအား

ရက္ခိုင့်တပ်တော်(AA) သိမ်းပိုက်ထိန်းချုပ်

▪︎AA သိမ်းပိုက်ထိန်းချုပ်နိုင်သောမြို့ အနည်းဆုံး ၅ မြို့ရှိလာ

 ဇော်ရမ်း/People's Spring 

ရခိုင်ပြည်နယ် ရှိ ကျောက်တော်၊ မြောက်ဦး ၊မင်းပြားမြို့များမှ စစ်ကောင်စီစခန်းများအားလုံးကိုရက္ခိုင့်တပ်တော်(AA) က အပြီးသတ် တိုက်ခိုက်သိမ်းပိုက် ထိန်းချုပ်ထားပြီဖြစ်ကြောင်း AAနှင့် နီးစပ်သည့်စစ်ရေးသတင်းရင်းမြစ်တစ်ဦးကပြောသည်။

"သုံးမြို့စလုံးကို တပ်တော်က ရပြီ။ မကြာခင် လူကြီးတွေသတင်းထုတ်ပြန်ပါလိမ့်မယ်။ လောလောဆယ်မှာတော့ ပြည်သူတွေကိုဝင်ခွင့်မပေးသေးဘူး။ လေကြောင်းအန္တ

ရာယ်ကြောင့်ပါ" ဟု အထက်ပါစစ်ရေးသတင်းရင်းမြစ်ကPeople's Spring သို့ပြောသည်။

မင်းပြားမြို့မှ စစ်ကောင်စီ၏ နောက်ဆုံးကျန်သောတပ်ရင်းဖြစ်သည့် အမှတ် ၃၇၉ ခြေမြန်တပ်ရင်း ( ခမရ -၃၇၉) ကို ရက္ခိုင့်တပ်တော်-AAဖေဖော်ဝါရီ ၅ရက်တွင်လည်းကောင်း၊ မြောက်ဦးမြို့ရှိ နောက်ဆုံးလက်ကျန်ရှိနေသည့် ခမရ (၃၇၇)နှင့် ကျောက်တော်မြို့ရှိအမှတ်(၉) စစ်ဆင်ရေးကွတ်ကဲမှုဌာနချုပ်(စကခ -၉)နှင့် ခမရ (၃၇၅) တပ်ရင်းတို့ကို ယနေ့( ဖေဖော်ဝါရီ ၇ရက်)‌ညနေတွင် အပြီးသတ်တိုက်ခိုက်သိမ်းယူနိုင်ခဲ့ခြင်းဖြစ်ကြောင်း AA နှင့်နီးစပ်သောစစ်ရေးငတင်းရင်းမြစ်က ရှင်းပြသည်။

မြောက်ဦးမြို့ရှိ ခမရ (၃၇၇) စခန်းသိမ်းတိုက်ပွဲ၌ စစ်ကောင်စီအရာရှိများအပါအဝင် တပ်ဖွဲ့ဝင် ၁၀၀ ကျော် အရှင်ဖမ်းမိထားသည်ဟု သိရသည်။ 

ကျောက်တော်မြို့တိုက်ပွဲတွင် စစ်ကောင်စီက ဇက်ရေယာဥ် သုံးစီးသည် ကုလတန်မြစ်ကြောင်းအတိုင်း ဆုတ်ခွာထွက်ပြေးရာ AAက လိုက်လံတိုက်ခိုက်ခဲ့သောကြောင့် နှစ်စီးနစ်မြုပ်သွားကြောင်း ရခိုင်ဒေသအခြေစိုက် Border News Agency-BNA နှင့်Arakan Bay News( AB News) သတင်းဌာနတို့ကဖေည်ပြသည်။တိုက်ပွဲ အသေးစိတ်ကို People's Spring ကအတည်မပြုနိုင်သေးပေ။

မင်းပြား၊ ကျောက်တော်၊ မြောက်ဦးမြို့များသည် တဆက်တည်းရှိသော မြို့များဖြစ်ပြီး AAက ရခိုင်ပြည်နယ်၌ ၁၀၂၇ စစ်ဆင်ရေးစတင်ခဲ့သည့် ပြီးခဲ့သည့် ၂၀၂၃ နိုဝင်ဘာလကတည်းက ပိတ်ဆို့တိုက်ခိုက်နေခြင်းဖြစ်သည်။  

AA က ပလက်ဝဒေသတစ်ခုလုံး ၊ပေါက်တောမြို့ညတို့ကို သိမ်းယူပြီးဖြစ်ကာ ယခုမြို့သုံးမြို့ထပ်မံ သိမ်းပိုက်ထိန်း လိုက်၍ အနည်းဆုံး ၅ မြို့ကို ထိန်းချုပ်နိုင်ပြီဖြစ်သည်။ထိုအပြင် မောင်းတော မြို့နယ်ရှိ တောင်ပြို (လက်ဝဲ ၊လက်ယာ)ကိုလည်း သိမ်းပိုက်ထားပြီး ကျန်နေသောစစ်ကောင်စီတပ်စခန်းများကိုလည်းထိုးစစ်ဆင်တိုက်ခိုက်နေဆဲဖြစ်သည်။

(AA သိမ်းပိုက်ထားသောမြို့များနှင့် အနီးဝန်းကျင်ဒေသများပြမြေပုံ)