စစ်အာဏာရှင်အလွန် ပြည်ထောင်စုတည်ဆောက်ရေး တော်လှန်ရေးအဖွဲ့အားလုံး ညှိနှိုင်းဆွေးနွေးကြရန် KIO ဥက္ကဋ္ဌ ပြော

 စစ်အာဏာရှင်အလွန် ပြည်ထောင်စုတည်ဆောက်ရေး တော်လှန်ရေးအဖွဲ့အားလုံး ညှိနှိုင်းဆွေးနွေးကြရန် KIO ဥက္ကဋ္ဌ ပြော

▪️တော်လှန်ရေးအဖွဲ့အချင်းချင်း ပွတ်တိုက်မှုများကို စစ်ရေးဖြင့်ဖြေရှင်းရန်ဆန္ဒမရှိဘဲ သမိုင်းကြောင်း အခြေခံပြီးဆွေးနွေးဖြေရှင်းရန် ဆန္ဒရှိဟု အသိပေး

▪️KIO/KIA ရဲဘော်များအပါအဝင် ကျဆုံးတော်လှန်ရေးရဲဘော်အားလုံးကို ဂုဏ်ပြု

ဟန်နွေ/People’s Spring

စစ်အာဏာရှင်ချုပ်ငြိမ်းရေးလက်တွဲရန် အရေးကြီးသည့် အချိန်ဖြစ်ကြောင်း ကချင်လွတ်လပ်ရေးအဖွဲ့(KIO) ဥက္ကဋ္ဌ ဗိုလ်ချုပ်ကြီး အင်ဘန်လက ယနေ့ ပြောကြားလိုက်ပြီး စစ်အာဏာရှင်အလွန် ပြည်ထောင်စုတည်ဆောက်ရေးအတွက် တော်လှန်ရေးအဖွဲ့အားလုံး ညှိနှိုင်းဆွေးနွေးကြရန် တိုက်တွန်းလိုက်သည်။

ယနေ့ ဖေဖော်ဝါရီ ၅ရက်တွင် ကျရောက်သည့် ကချင်လွတ်လပ်ရေးတပ်မတော်(KIA) တည်ထောင်ခြင်းနှစ်ပတ်လည်နေ့ဖြစ်သည့် (၆၃)နှစ်မြောက် ကချင်တော်လှန်ရေးနေ့ မိန့်ခွန်း၌ ဗိုလ်ချုပ်ကြီး အင်ဘန်လက အထက်ပါအတိုင်း ထည့်သွင်း ပြောကြားခဲ့ခြင်းဖြစ်သည်။ ဗိုလ်ချုပ်ကြီး အင်ဘန်လ၏ ကချင်ဘာသာဖြင့် မိန့်ခွန်းပြောကြားချင်ကို KIO/KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ဘာသာပြန် ပြောပြသည်။

"စစ်ကောင်စီ အလွန်ပြည်ထောင်စုတည်ဆောက် ရေးအတွက် ကျနော်တို့ တော်လှန်ရေးအဖွဲ့အစည်းများ အားလုံးက ညှိနှိုင်းဆွေးနွေးပြီးမှ ဒီမိုကရေစီ ပြည့်၀တဲ့ ကျနော်တို့ရဲ့ ပြည်ထောင်စုတွေကို ပြန်လည်တည်ဆောက်ဖို့ အကြောင်း ကျနော်တို့ KIO ဥက္ကဋ္ဌရဲ့ မိန့်ခွန်းထဲမှာ ပါတာဖြစ်ပါတယ်"ဟု ဗိုလ်မှူးကြီးနော်ဘူက ပြောပြသည်။

လက်ရှိအချိန်သည် တော်လှန်ရေးအတွက် အလွန်အရေးကြီးသည့် အချိန်ဖြစ်ကြောင်းလည်း KIO ဥက္ကဋ္ဌကထည့်သွင်း ပြောကြားခဲ့သည်ဟုဆိုသည်။

"ဘာကြောင့်လဲဆိုတော့ ကျနော်တို့ မြန်မာနိုင်ငံကို စစ်အာဏာရှင်စနစ်နဲ့ အုပ်ချုပ်တဲ့ ဘ၀ကနေ လွတ်မြောက်ဖို့အတွက် ကျနော်တို့ တိုင်းရင်းသားတွေ နောက် ဗမာလူမျိုးတွေ ဗမာပြည်သူလူထုတွေကိုယ်တိုင် လက်နက်ကိုင်ပြီးမှ တော်လှန်နေတဲ့ နွေဦးတော်လှန်ရေးအင်အားစုတွေနဲ့ ကျနော်တို့ တိုင်းရင်းသားတော်လှန်ရေးလူမျိုးများရဲ့အင်အားစုတွေ အားလုံးပူးပေါင်းပြီးမှ စစ်အာဏာရှင်စနစ်ကို တွန်းလှန်ဖို့ ချုပ်ငြိမ်းဖို့ အတွက် ကျနော်တို့ အားလုံး လက်တွဲဖို့အရေးကြီးတဲ့ အချိန်အခါဖြစ်ပါတယ်။ ဒါကြောင့် ကျနော်တို့ ကချင်လူငယ် လူရွယ်တွေအားလုံးက မိမိဆန္ဒနဲ့ ဒီတော်လှန်ရေးတာဝန်တွေကိုထမ်းဆောင်ဖို့ တိုက်တွန်းနှိုးဆော် ဖိတ်ခေါ်တဲ့ အချက်တွေ ပါပါတယ်"ဟု ဗိုလ်မှူးကြီးနော်ဘူက KIO ဥက္ကဋ္ဌ၏ မိန့်ခွန်းပါ အချက်ကို ပြောပြသည်။

ထို့ပြင် တိုင်းရင်းသားလက်နက်ကိုင်အဖွဲ့အစည်းများ အနေဖြင့် တော်လှန်ရေးကာလ၌ နေရာတစ်ခုတည်း၌ ပူးပေါင်းပြီး နေထိုင်တော်လှန်နေသည့် ကာလဖြစ်၍ အချင်းချင်း ပွတ်တိုက်မှု ရှိခဲ့သည့် အခြေအနေအပေါ် KIO/KIA၏ သဘောထားကိုလည်း ဗိုလ်ချုပ်ကြီး အင်ဘန်လက အသိပေးခဲ့ကြောင်း ရှင်းပြသည်။

"အဲဒီ နေရာနဲ့ပတ်သက်လို့ ဒေသနဲ့ပတ်သက်လို့တော့ ကျနော်တို့ KIO အနေနဲ့တော့ နယ်မြေစိုးမိုးရေးနဲ့ ပတ်သက်လို့ ကျနော်တို့ခိုင်မာတဲ့ သမိုင်းကြောင်းတွေ ရှိတဲ့ ဌာနေတိုင်းရင်းသားတွေဖြစ်ပါတယ်။ ဒါကြောင့် သမိုင်းကြောင်းကို အခြေခံပြီးမှ ကျနော်တို့ဆွေးနွေးအဖြေရှာပြီးမှ ဖြေရှင်းဖို့ပဲ ကျနော်တို့ KIOက ဆန္ဒရှိပါတယ်။ စစ်ရေးပဋိပက္ခနဲ့ ဖြေရှင်းဖို့ဆိုတာ ကျနော်တို့ KIOရဲ့ဆန္ဒ မရှိပါဘူး။ဒါကြောင့် ကျနော်တို့ ဌာနေတိုင်းရင်းသားတွေ အားလုံး အချင်းချင်းညှိနှိုင်းတိုင်ပင်ပြီးမှ သမိုင်းကြောင်း ခိုင်ခိုင်မာမာရှိတာကို အခြေခံပြီးမှ ဖြေရှင်းဖို့ ပဲ ကျနော်တို့ ဆန္ဒရှိတဲ့အကြောင်းတွေ ပါပါတယ်”ဟု ဗိုလ်မှူးကြီးနော်ဘူက ပြောသည်။

ထို့ပြင် ကျဆုံးတော်လှန်ရေးရဲဘော်များကို ဂုဏ်ပြုကြောင်းလည်း KIO ဥက္ကဋ္ဌ၏ မိန့်ခွန်း၌ ထည့်သွင်း ပြောကြားခဲ့သည်။

"ရှေ့တန်းမှာ တာဝန်ထမ်းဆောင်ပြီးမှ ကိုယ့်တိုင်းရင်းသားတွေ ပြည်သူလူထုတွေ ကိုယ့်တိုင်းပြည်အတွက် ကိုယ့်ရဲ့အသက်ကို သမာဓိရှိရှိနဲ့ပေါ့နော် အသက်စတေးခံရတဲ့ ရဲဘော်တွေအားလုံးကိုလည်း ချီးကျူးဂုဏ်ပြုတဲ့ အကြောင်းတွေ ၊ ကျနော်တို့ KIO/KIA ရဲဘော်တွေသာမကဘူး အခြားသော တော်လှန်ရေး အဖွဲ့အစည်း အသီးသီးမှာ ပါဝင်ပြီးမှ အခုလိုမျိုးအသက်စတေးခံရတဲ့ ရဲဘော်တွေအားလုံးကိုလည်း ဂုဏ်ပြုတဲ့ အကြောင်းတွေ ပါပါတယ်"ဟု ဗိုလ်မှူးကြီးနော်ဘူက ပြောပြသည်။

ထို့ပြင် မြန်မာပြည်သူများအပေါ် စစ်ကောင်စီက ရန်သူကဲ့သို့ ပစ်မှတ်ထား သတ်ဖြတ်၊ မီးရှို့၊နှိပ်စက်ခြင်းများ နှင့်ပတ်သက်ပြီး KIOက စိတ်မကောင်းဖြစ်ရကြောင်း ၊ ဝမ်းနည်းကြောင်း အသိပေး ပြောကြားခဲ့သည်ဟု ဆိုသည်။

ကချင်လွတ်လပ်ရေးတပ်မတော် (KIA)ကို ၁၉၆၁ ခုနှစ် ဖေ‌ဖော်ဝါရီ ၅ ရက်တွင် စတင်ဖွဲ့စည်းခဲ့သည်။ ယနေ့ ကျရောက်သည့် (၆၃)နှစ်ပြည့် ကချင်တော်လှန်ရေးနေ့ကို KIOအုပ်ချုပ်ရာဒေသရှိ စစ်ဘေးရှောင်စခန်းအသီးသီး၌ ပြုလုပ်ခဲ့သည်ဟု ဒေသ သတင်းရင်းမြစ်အချို့က ဓာတ်ပုံမှတ်တမ်းနှင့်အတူ ဖော်ပြထားသည်။

(ယနေ့ ကျရောက်သည့် (၆၃)နှစ်ပြည့် ကချင်တော်လှန်ရေးနေ့ကို KIOအုပ်ချုပ်ရာဒေသ၌ ပြုလုပ်နေစဉ်။ ဓာတ်ပုံ - Kachinnews)