ရှမ်းကယားနယ်စပ်တိုက်ပွဲတွင် စစ်ကောင်စီ ဗျူဟာမှူးတဦး ကျ
ဧရာဝတီ
ရှမ်းပြည်နယ်တောင်ပိုင်းနှင့် ကယားပြည်နယ် နယ်စပ်သို့ စစ်ဆင်ရေး ဝင်နေသော အရှေ့ အလယ်ပိုင်းတိုင်း စစ်ဌာနချုပ် လက်အောက်ခံ အမှတ် (၂) စစ်ဆင်ရေးကွပ်ကဲမှု ဌာနချုပ် (စကခ-၂) မှ ခေတ္တဗျူဟာမှူး ဗိုလ်မှူးကြီးမျိုးမင်းညွန့်သည် တိုက်ပွဲတခု၌ ကျဆုံးသွားကြောင်း သတင်းရရှိသည်။
"ရွာမှာတော့ ပွဲကိုဖြစ်နေတာပေါ့။ ကိုယ့်ရွာသားတယောက် ကျသွားတော့ ဝမ်းသာတဲ့လူလည်း ရှိတယ်။ သူ့အ ကြောင်း သတင်းတွေတော့ တက်လာတာတော့ မတွေ့မိသေးဘူး။ ကောင်လေးက စစ်သွေးကြွတယ်။ သင်တန်းဆင်းပြီးတော့ ရာထူးတိုးပြီး ရှေ့တန်း ထွက်သွားတာမှာ တိုက်ပွဲကျတာ" ဟု ဗိုလ်မှူးကြီးမျိုးမင်းညွန့်နှင့် တရွာတည်းသားတဦးက ပြောသည်။
ဗိုလ်မှူးကြီး မျိုးမင်းညွန့်သည် စစ်ကိုင်းတိုင်း ဒေသကြီး မင်းကင်းမြို့နယ် မောက္ကတော် ကျေးရွာ ဇာတိဖြစ်ပြီး ဇနီးမှာ ကျောင်းဆရာမဖြစ်ကာ သားတဦးရှိသည်။
ကရင်နီ အမျိုးသားများ ကာကွယ်ရေး တပ်မတော် KNDF ဗဟိုသတင်းနှင့်ပြန်ကြားရေးဌာန၏ ထုတ်ပြန်ကြေညာချက်အရ ရှမ်းပြည်နယ် တောင်ပိုင်း ဖယ်ခုံမြို့နယ်နှင့် ပင်လောင်းမြို့နယ် အစပ် မြောက်စလုံးကျေးရွာ၊ မိုးဗြဲမြို့တွင် ဧပြီလ ၂၄၊ ၂၅ နှင့် ၂၆ ရက်များ၌ တိုက်ပွဲများ ဖြစ်ပွားခဲ့သည်။ စစ်ကောင်စီတပ်ဖက်မှ ၂၀ ဦးသေဆုံးကာ ၂ ဦး အရှင်ဖမ်းမိခဲ့ကြောင်း ထုတ်ပြန်ထားသည်။ ကရင်နီသတင်းရင်းမြစ်များက မြောက်စလုံးကျေးရွာတွင် ဖြစ်ပွားသော တိုက်ပွဲတွင် ဗိုလ်မှူးကြီးအဆင့် ရာထူးရှိသူတဦး ကျဆုံးကြောင်း အတည်ပြုသော်လည်း နာမည်အတိအကျ မပြောနိုင်ပေ။
ထိုဒေသတွင်း စစ်ဆင်ရေးတွင် စစ်ကောင်စီလက်အောက်ခံ တပ်မ ၅၅၊ တပ်မ ၆၆၊ စကခ ၂၊ ၇၊ ၁၄၊ ၁၈ စသည့် တပ်မ ၆ မ ထိ အသုံးပြု တိုက်ခိုက်နေခြင်းဖြစ်ကြောင်း သိရသည်။
ကျဆုံးသွားသော ဗိုလ်မှူးကြီးမျိုးမင်းညွန့်၏ မိဘများနေထိုင်သည့် မောက္ကတော်ကျေးရွာသို့ ဧပြီလ ၇ ရက်နေ့က စစ်တပ်က ဝင်ရောက်မီးရှို့ခဲ့ရာ ဗိုလ်မှူးကြီး မျိုးမင်းညွန့်မိဘများနေထိုင်သည့် အိမ်ပါ မီးလောင်သွားခဲ့ကြောင်း ဒေသခံရွာသားများက ပြောသည်။
ဗိုလ်မှူးကြီးမျိုးမင်းညွန့်သည် စစ်တက္ကသိုလ်အပတ်စဉ် ၄၆ သင်တန်းဆင်းတဦးဖြစ်ပြီး သူ၏နာမည်ပြောင်မှာ ဂေါ်ပြားဖြစ်ကာ စစ်အာဏာမသိမ်းခင်က ခမရ ၅၅၉ တွင် ဒုတပ်ရင်းမှူးတာဝန်ထမ်းဆောင်ခဲ့သူဖြစ်သည်။
ဓာတ်ပုံ - တိုက်ပွဲတွင် ကျဆုံးသွားသော ခေတ္တဗျူဟာမှူး ဗိုလ်မှူးကြီးမျိုးမင်းညွန့်
#WhatsHappeningInMyanmar
#RejectMilitaryCoup
No comments:
Post a Comment