ဆုတ်မိန့်မရဘဲ တပ်ဆုတ်ခဲ့တဲ့ အကြမ်းဖက်စစ်တပ်က တပ်ရင်းမှူးနဲ့ ဒုတပ်ရင်းမှူးကို အာဏာဖီဆန်မှုနဲ့ ထောင်ချထားတယ်လို့ KNU ဗဟိုထုတ်ပြန်
++++++++++++++++
ဇူလိုင် ၂၄
ကရင်အမျိုးသားလွတ်မြောက်ရေး တပ်မတော် (K.N.L.A) တပ်မဟာ (၆)၊ KNLA - ပူးပေါင်းတပ်ဖွဲ့များနဲ့ ဒရုန်းတပ်ဖွဲ့များက တိုက်ခိုက်သိမ်းပိုက်ခဲ့တဲ့ လက်ခတ်တောင်ဘုရားကုန်းနဲ့ တာဝါတိုင်ကုန်း စခန်းသိမ်းတိုက်ပွဲမှာ ဆုတ်မိန့်မရဘဲ ဆုတ်ခွါခဲ့တဲ့ အကြမ်းဖက်စစ်တပ်က တပ်ရင်းမှူးနဲ့ ဒုတပ်ရင်းမှူးကို အာဏာဖီဆန်မှုနဲ့ ထောင်ချထားတယ်လို့ KNU ဗဟိုက ဒီကနေ့ သတင်းထုတ်ပြန်ပါတယ်။
“ရန်သူထိခိုက် သေဆုံးမှု စာရင်းအား စိစစ်ဆဲဖြစ်ပြီး တိုက်ပွဲအတွင်း ဆုတ်မိန့် မရပဲ တပ်ဆုတ်ခဲ့ သော ခမရ−၂ မှ တပ်ရင်းမှူး အာကာအောင် နှင့် ဒု-တပ်ရင်းမှူး ကျော်သူမောင် တို့ နှစ်ဦးအား အာဏာ ဖီဆန်မှုဖြင့် မွန်ပြည်နယ် ကျိုက်ထိုမြို့ အကျဥ်းထောင်တွင် အပြစ်ပေး ထောင်ချခံနေရကြောင်း KNLA - ကော်ဘရာ စစ်ကြောင်း စစ်ဆင်ရေးမှူး ဗိုလ်ဒါဘော မှ ဒူးပလာယာခရိုင် သတင်းနှင့်ပြန်ကြားရေး သို့ အတည်ပြု ပြောကြား” လို့ ထုတ်ပြန်ချက်ထဲမှာ ဖော်ပြထားတာပါ။
ကေအဲန်ယူ− ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ဒူးပလာယာခရိုင် တပ်မဟာ (၆)၊ ကော့ကရိတ်မြို့နယ်၊ မြဝတီမြို့၊ လက်ခတ်တောင်ဘုရားကုန်း နဲ့ တာဝါတိုင်ကုန်းမှာရှိတဲ့ အကြမ်းဖက်စစ်တပ်ရဲ့ စခန်းတွေကို ဇူလိုင် ၂၁ ရက် မနက် ၅ နာရီခန့်မှာ KNLA ပူးပေါင်းတပ်ဖွဲ့တွေက သိမ်းပိုက်ခဲ့တာ ဖြစ်ပါတယ်။
အဲ့ဒီစခန်းသိမ်းတိုက်ပွဲအတွင်း အကြမ်းဖက်စစ်သား အင်အား ၆၀ ကျော်ရှိတဲ့ ခမရ ၂ တပ်ရင်းနဲ့ ခမရ ၁၁၈ တပ်ရင်းဘက်က ထိခိုက်သေဆုံးမှု များနိုင်တယ်လို့လည်း KNU ဗဟိုက ဆိုပါတယ်။
အကြမ်းဖက်စစ်တပ်ရဲ့စခန်းနှစ်ခုကို ခက်ခက်ခဲခဲ စီးနင်းသိမ်းပိုက်နိုင်ခဲ့တာဖြစ်ပြီး ပြည်သူတွေရဲ့ ဆုတောင်းမေတ္တာပို့သတဲ့အတွက် တော်လှန်ရေးရဲဘော်တွေဘက်က အသက်ဆုံးရှုံးမှုမရှိဘဲ မစိုးရိမ်ရတဲ့ ဒဏ်ရာနဲ့ ၆ ဦး ထိခိုက်ခဲ့တယ်လို့ ဖော်ပြထားပါတယ်။
ဓာတ်ပုံ− စစ်ကောင်စီတပ်စခန်းက သိမ်းဆည်းရမိတဲ့ လက်နက်ခဲယမ်းများနဲ့ ကော်ဘရာ စစ်ကြောင်း
No comments:
Post a Comment