စစ်ကူလာသည့် စစ်ကောင်စီတပ်ကို TNLA ကြားဖြတ်တိုက်၊ လက်နက်ခဲယမ်းများ သိမ်းဆည်းရမိ
ဧရာဝတီ၊ စက်တင်ဘာ ၉၊ ၂၀၂၃
ရှမ်းပြည်နယ်၊ ကျောက်မဲမြို့နယ်အတွင်းသို့ အင်အားဖြည့်တင်းရန် စစ်ကူလာသော စစ်ကောင်စီတပ်ကို တအာင်း(ပလောင်)အမျိုးသားလွတ်မြောက်ရေးတပ်မတော် (TNLA)က ကြားဖြတ်တိုက်ခဲ့ရာ စစ်တပ်ဘက်မှ သေဆုံးမှုများရှိပြီး လက်နက်ခဲယမ်းများလည်း သိမ်းဆည်းရမိခဲ့ကြောင်း TNLA က သတင်းထုတ်ပြန်သည်။
စက်တင်ဘာ ၈ ရက်၊ နံနက် ၇ နာရီခွဲတွင် TNLA တပ်မဟာ-၂ စစ်ဒေသ၊ ကျောက်မဲမြို့နယ်၊ လဲကြီးနှင့်တောင်နီကြားသို့ အင်အားဖြည့်တင်းလာသည့် စစ်ကောင်စီ၏ တပ်မ ၈၈၊ လပခ-ခလရ (၇၁) စစ်ကြောင်းနှင့် TNLA တပ်မဟာ(၄) တပ်ရင်း-၅၉၃ တို့ကြား တိုက်ပွဲပြင်းထန်ခဲ့ပြီး စစ်ကားတစီး ချောက်အတွင်းသို့ ထိုးကျပျက်စီးခဲ့သလို MA1 ၃ လက်၊ MA2 ၁ လက်နှင့် လက်နက်ခဲယမ်းများ သိမ်းဆည်းရမိခဲ့ကြောင်း သိရသည်။
ထိုတိုက်ပွဲအတွင်း စစ်ကောင်စီတပ်ဘက်က အသေအဆုံးများ ရှိခဲ့သော်လည်း အသေးစိတ်အခြေအနေများကို မသိရှိရသေးဘဲ တိုက်ပွဲ ဆက်လက်ဖြစ်ပွားနေဆဲဖြစ်ကြောင်း TNLA က ဆိုထားသည်။
ပြီးခဲ့သည့် စက်တင်ဘာ ၇ ရက်ကလည်း TNLA တပ်မဟာ(၄)စစ်ဒေသ လားရှိုးမြို့နယ် မုန်းလီနှင့် ကောင်းဆာကြားတွင် စစ်ကောင်စီတပ်နှင့် TNLA တို့ တိုက်ပွဲအပြင်းအထန် ဖြစ်ပွားခဲ့သေးသည်။
စစ်ကောင်စီသည် ဇူလိုင်လအတွင်းမှစတင်ကာ TNLA ထိန်းချုပ်နယ်မြေများသို့ စစ်အင်အားအလုံးအရင်း ဖြည့်တင်းလာပြီး ထိုးစစ်ဆင်မှုများ ဆက်တိုက်ပြုလုပ်လျက်ရှိရာ TNLA နှင့် စစ်ကောင်စီတပ်ကြား နေ့စဉ်တိုက်ပွဲပြင်းထန်နေပြီး ဇူလိုင် ၂၃ ရက်မှ စက်တင်ဘာ ၈ ရက်ထိ တိုက်ပွဲပေါင်း ၃၆ ကြိမ် ဖြစ်ပွားခဲ့ကြောင်း သိရသည်။
ဓာတ်ပုံ - PSLF/TNLA သတင်းနှင့် ပြန်ကြားရေးဌာန
#WhatsHappeningInMyanmar
#RejectMilitaryCoup
No comments:
Post a Comment