လောက်ကိုင် ဒကစမှ လက်နက်ချခဲ့သော
ဗိုလ်မှူးချုပ်ခြောက်ဦး စစ်ကောင်စီဖမ်းဆီးအချုပ်ချထား
ဇော်ရမ်း/People's Spring
လောက်ကိုင်တွင်လက်နက်ချပြီး လားရှိုးပြန်သွားသော ဒကစ-ဒေသကွပ်ကဲမှုစစ်ဌာနချုပ်မှ ဗိုလ်မှူးချုပ်ခြောက်ဦးအပါအဝင် အရာရှိများကို စစ်ကောင်စီက လားရှိုးရဲစခန်းအချုပ်တွင် ဖမ်းဆီးချုပ်နှောင်ထားကြောင်း ရှမ်းပြည်နယ်ရဲတပ်ဖွဲ့နှင့် နီးစပ်သည့် သတင်းရင်းမြစ်အချို့ကပြော
သည်။
"လောက်ကိုင်က ပြန်ရောက်ကတည်းက လားရှိုးအချုပ်ထဲ ထည့်ထားတာ။ ဘာဆက်လုပ်မလဲတော့ မသိဘူး။ ဒါပေမယ့် ဗိုလ်မှူးချုပ်ခြောက်ယောက်စလုံး အကုန်အချုပ်ထဲမှာ" ဟု အဆိုပါသတင်းရင်းမြစ်ကပြောသည်။
လောက်ကိုင်ဒကစမှ ဒကစမှူး ဗိုလ်မှူးချုပ်မိုးကျော်သူနှင့် ဗိုလ်မှူးချုပ်ထွန်းထွန်းမြင့်အပါအဝင် ဗိုလ်မှူးချုပ်ခြောက်ဦး၊ အရာရှိ ၂၂၈ဦး၊ရဲဘော်မှ အခြားအဆင့်ရှိသူ ၁၈၉၅ဦးတို့သည် မိသားစုဝင် ၁၆၀၁ ဦးနှင့်အတူ ဇန်နဝါရီ ၄ ရက်တွင် MNDAA ထံ လက်နက်ချခဲ့သည်။ထိုနောက် ဇန်နဝါရီ ၅ ရက်တွင်လည်း ပွိုင့် ၂၀၂၂ (ခေါ်) နမ်ထင်အိန်ရှန်း စခန်းကုန်းမှာ စစ်ကောင်စီ တပ်ဖွဲ့ဝင့် ၂၆၆ ဦးထပ်မံလက်နက်ချခဲ့သည်။ ထိုကြောင့် စစ်ကောင်စီတပ်သား ၂၄၀၀ ခန့်နှင့် မိသားစုဝင် ၁၆၀၁ ဦးဖြစ်၍ လောက်ကိုင်မှ စစ်သားနှင့်မိသားစု စုစုပေါင်း ၄၀၀၀ ခန့် လက်နက်ချခဲ့ခြင်းဖြစ်သည်။
သမိုင်းတွင် စစ်တပ်မှ တစ်နေရာတည်းတွင် စစ်သားထောင်နှင့်ချီ လက်နက်ချခြင်းသည် ပထမဆုံးအကြိမ်ဖြစ်သည်။၁၀၂၇ စစ်ဆင်ရေးတွင် စစ်ကြောင်းလိုက် ၊တပ်ရင်းလိုက် စစ်သား ရာနှင့်ချီလက်နက် ချ ခဲ့ခြင်းများရှိသော်လည်း ယခုအကြိမ်မှာအများဆုံးဖြစ်သည်။
ဒကစမှ လက်နက်ချသူများကို ဇန်နဝါရီ ၄ ရက် မွန်းလွဲ ၂ နာရီ ဝန်းကျင်တွင် ၎င်းတို့ပြန် လိုရာသို့ ပြန် နိုင်ရန် စီစဥ်ပေးခဲ့ကြောင်း MNDAA ပြောရေးဆိုခွင့် ရှိသူ လီကျာဝင်းက People's Spring သို့ ပြောသည်။
People's Spring ၏ စုံစမ်းမှုအရ ဇန်နဝါရီ ၄ ရက်နှင့် ၅ ရက်က လက်နက်ချသူများကို MNDAAက ကျိုင်းတုံနှင့် လားရှိုးမြို့သို့ ပို့ပေးခဲ့သည်ဟု သိရသည်။ ပြန်ရောက်လာသူများမှ အရာရှိများကို စစ်ကောင်စီက ဖမ်းထားပြီး အခြားအဆင့်များကို ရှေ့တန်းသို့ ပြန်လွှတ်နေကြောင်း သတင်းရရှိသည်။
စစ်ကောင်စီ တပ်ဖွဲ့ဝင်များမှာ ကား ၊ဆိုင်ကယ် တို့ဖြင့် လောက်ကိုင်မှ ပြန်ကြသော်လည်း ဗိုလ်မှူးချုပ် ၆ ဦးမှာ တန်ယန်းမှ ရဟတ်ယာဥ်ဖြင့် လာရှိုးသို့သွားခဲ့ခြင်းဖြစ်ကြောင်း သိရသည်။
လောက်ကိုင်ဒကစ လက်နက်ချခြင်းမှာ တရုတ်နိုင်ငံဘက် သို့ကျည်မကျရေးနှင့် တပ်မိသားစုများလုံခြုံရေးတို့ကြောင့်ဖြစ်ကြောင်း စစ်ကောင်စီပြန်ကြားရေးအရာရှိ ဇော်မင်းထွန်းက စစ်ကောင်စီသတင်းများကိုသာဦးစားပေးဖော်ပြသောသတင်းဌာနများကို ပြောထားသည်။
လက်နက်ချသော ဗိုလ်မှူးချုပ်များကို စစ်ကောင်စီက ဖမ်းချုပ်ထားသည့်သတင်းသည် တပ်တွင်း၌လည်း ပြန့်နှံ့
နေပြီး တပ်မိသားစုဝင်များအကြား စိုးရိမ်မှုများ ရှိနေသည်။ TNLA ၏ ထိုးစစ်ဆင်တိုက်ခိုက်ခံနေရသည့် ကွတ်ခိုင်
ဗျူဟာမှ အရာရှိများသည်လည်း လက်နက်ချလိုသော်လည်း လောက်ကိုင်ဒကစမှ ဗိုလ်မှူးချုပ်များ ဖမ်းချုပ်ခံထားရသည့် သတင်းကြောင့် လက်နက်မချသေးဘဲ ခံတိုက်နေခြင်းဖြစ်သည်ဟု ကွတ်ခိုင်ဒေသခံအချို့ကပြောသည်။
" လက်နက်ချအညံ့ခံသောသူများနှင့် ပြည်သူ့ရင်ခွင်ခိုလှုံ
ကြသောသူများကို မြန်မာပြည်သူလူထုတစ်ရပ်လုံးမှ သူရဲကောင်းများအဖြစ် သတ်မှတ်ထားပြီးဖြစ်သည်" ဟု MNDAA က ထုတ်ပြန်ထားသည်။
မြန်မာနိုင်ငံ၏ အခြားသော မည်သည့်နေရာ၌မဆို မိမိတို့ထံ လက်နက်ချအလင်းဝင်လိုသည်ဖြစ်စေ၊ ပြည်သူ့ရင်ခွင်ထဲ ဝင်ရောက်ခိုလှုံလိုသည်ဖြစ်စေ အချိန်မရွေး ဆက်သွယ်နိုင်ကြောင်းလည်း ညီနောင် မဟာမိတ် သုံးဖွဲ့က အသိပေးထားသည်။
"စစ်တပ်ခေါင်းဆောင်တွေက သူတို့အတွက်ပဲသူတို့ကြည့်တာ။ အခုအခြေအနေက ထွက်ပြေးတာပဲ အကောင်းဆုံးပဲ။ ဒါပေမယ့် မိသားစုဝင်တွေက တပ်ထဲမှာဆိုတော့ ခက်နေတာ" ဟု စစ်ကောင်စီ ဒုဗိုလ်မှူးတစ်ဦး၏ ဇနီးကပြောသည်။
(လောက်ကိုင် ဒကစ မှ ဗိုလ်မှူးချုပ်များနှင့် ညီနောင်သုံးဖွဲ့မှ တာဝန်ရှိသူများ စစ်တပ်ကလက်နက်ချရန် သဘောတူပြီးနောက် အတူစားနေစဥ် /လောက်ကိုင် ဒကစ မှ သိမ်းဆည်းရရှိသော လက်နက်ခဲယမ်းများ ။ဓါတ်ပုံ-CJ )
No comments:
Post a Comment