သံတွဲရှိ နောက်ဆုံးလက်ကျန် တပ်ရင်း ခလရ ၅၅ ကို AA သိမ်းယူခဲ့ပြီး မြို့သိမ်းရန် အတွက် ကစဉ့်ကလျား ထွက်ပြေးနေသော စစ်ကောင်စီတပ်ဖွဲ့ဝင်များကို ဆက်လက် တိုက်ခိုက်နေ

 သံတွဲရှိ နောက်ဆုံးလက်ကျန် တပ်ရင်း ခလရ ၅၅ ကို AA သိမ်းယူခဲ့ပြီး မြို့သိမ်းရန် အတွက် ကစဉ့်ကလျား ထွက်ပြေးနေသော စစ်ကောင်စီတပ်ဖွဲ့ဝင်များကို ဆက်လက် တိုက်ခိုက်နေ

ဧရာဝတီတိုင်းမ်

ဇူလိုင် ၁၂ရက်

ရခိုင်ပြည်နယ်၊ သံတွဲမြို့နယ်ရှိ စစ်ကောင်စီ၏ နောက်ဆုံးလက်ကျန်တပ်ရင်းဖြစ်သည့် ခလရ-၅၅ ကို အာရက္ခတပ်တော်(AA) က သိမ်းပိုက်နိုင်ခဲ့ကြောင်း သိရသည်။

သံတွဲမြို့နယ်အတွင်း၌ စစ်ကောင်စီ၏ သံတွဲအခြေစိုက်တပ်ရင်းများထဲမှ လက်ကျန် စခန်းတစ်ခုဖြစ်သော ခလရ-၅၅ တပ်ရင်းကို ဇူလိုင် ၉ ရက်နေ့၊ နံနက် ၉ နာရီ ၄၅ မိနစ်တွင် AA က အပြီးသတ်သိမ်းပိုက်နိုင်ခဲ့‌ကြောင်း သိရသည်။ 

အဆိုပါတပ်ရင်းကို ထိုးစစ်ဆင်တိုက်ခိုက် သိမ်းပိုက်ရာတွင် စစ်ကောင်စီ၏ စစ်အသုံး အဆောင်ပစ္စည်း၊ လက်နက်ခဲယမ်းအများအပြားကို သိမ်းဆည်းရမိခဲ့‌ကြောင်း AA က ထုတ်ပြန်သည်။ 

ရခိုင်ပြည်နယ်အတွင်းမှ စစ်ကောင်စီ၏ လက်ကျန်တပ်စခန်းများကို AA က တစ်ခုပြီး တစ်ခု ဆက်လက် ထိုးစစ်ဆင်တိုက်ခိုက်လျက်ရှိရာ ယခုရက်များ၌ အဓိကတိုက်ပွဲ ဖြစ်ပွားလျက်ရှိသော နေရာများထဲမှ သံတွဲမြို့နယ် နှင့် မောင်တောမြို့နယ်အတွင်းမှ စစ်ကောင်စီ၏ တပ်စခန်းနှစ် ခုကို ထပ်မံသိမ်းဆည်းရမိခဲ့ကြောင်း သိရသည်။

သံတွဲအခြေစိုက်တပ်ရင်းတစ်ခုဖြစ်သော ခမရ-၅၆၆ ကို ဇွန် ၂၇ ရက်၊နေ့ ညနေပိုင်းတွင် အာရက္ခတပ်တော် (AA) က သိမ်းပိုက်ခဲ့ပြီးနောက် ထွက်ပြေးလွတ်မြောက်နေသော စစ်ကောင်စီတပ်ဖွဲ့ဝင်များ၊ စစ်ကူလာသူများ နှင့် သံတွဲမြို့အတွင်းရှိ လက်ကျန် တပ်ဖွဲ့ဝင်များသည် သံတွဲမြို့ နှင့် သံတွဲမြို့အနီး ပတ်ဝန်းကျင်မှ ခုခံစစ်များကိုဆင်နွှဲရန် ပြင်ဆင်နေသောကြောင့် သံတွဲမြို့တစ်ခုလုံးကို အပြီးသတ် သိမ်းပိုက်ရယူနိုင်မည့် ထိုးစစ် များကို ဆက်လက်လုပ်ဆောင်ရမည် ဖြစ်ကြောင်းသိရသည်။

စစ်ကောင်စီသည် ၎င်းတို့စီးပွား‌ရေးအရ ရင်းနှီးမြှုပ်နှံမှုများစွာရှိနေသည့် ငပလီ ဟိုတယ်ဇုံရှိရာ သံတွဲမြို့မကျစေရန်အတွက် ကြည်း၊ ရေ၊ လေမှ ခုခံတိုက်ခိုက်နေပြီး နယ်မြေအစုံမှ တပ်ရင်းတပ်ဖွဲ့များကို အင်အားအလွန်အကျွံသုံး၍ ခုခံလျက်ရှိသည်။

ထို့ကြောင့် သံတွဲမြို့သိမ်းတိုက်ပွဲသည် ယခုအချိန်တွင် အမြင့်ဆုံးနှင့်အပြင်းထန်ဆုံးသို့ ရောက်ရှိနေပြီး မြို့သိမ်းတိုက်ပွဲများတွင် အခက်ခဲဆုံးတိုက်ပွဲဖြစ်ကြောင်း AA က ဆိုထားသည်။

ဓာတ်ပုံ-AA Info Desk

#သံတွဲ #စစ်ကောင်စီ #ခလရ၅၅ #AA #သိမ်းပိုက် #မြို့သိမ်းတိုက်ပွဲ #ဆက်လက်ထိုးစစ်ဆင် #Ayeyarwaddy_Times