မန္တလေးနှင့် ၁၀ မိုင်ခန့်သာ ဝေးသည့် စစ်ကောင်စီတပ်စခန်းနှစ်ခုကို MDY-PDF ထပ်မံသိမ်းပိုက်

 မန္တလေးနှင့် ၁၀ မိုင်ခန့်သာ ဝေးသည့် စစ်ကောင်စီတပ်စခန်းနှစ်ခုကို MDY-PDF ထပ်မံသိမ်းပိုက်

------------

မန္တလေးနှင့် ၁၀ မိုင်ကျော် အကွာအဝေးသာရှိသော Alpha ဘိလပ်မြေစက်ရုံမှ စစ်ကောင်စီတပ်စခန်းနှင့် မန္တလေး-မိုးကုတ်ကားလမ်းပေါ်ရှိ တံငါ (တောင်) တပ်စခန်းတို့ကို ပြီးခဲ့သည့် တနင်္ဂနွေနေ့က အပြီးသတ်သိမ်းပိုက်ရရှိခဲ့ကြောင်း ပြည်သူ့ကာကွယ်ရေးတပ်မတော်-မန္တလေး (MDY-PDF) ၏ ပြောခွင့်ရ ကိုအော်စမွန်က Myanmar Now ကို ပြောသည်။

စစ်ကောင်စီတပ်ဖွဲ့ဝင်များသည် Alpha ဘိလပ်မြေစက်ရုံတပ်စခန်းမှ ဆုတ်ခွာပြေးချိန်တွင် စက်ရုံကို မီးရှို့ဖျက်ဆီးသွားပြီး၊ လေကြောင်းတိုက်ခိုက်မှုများလည်း နေ့စဉ် ဆယ်ကြိမ်ထက်မနည်း ပြုလုပ်ခဲ့သည်ဟု ဆိုသည်။

“ကျွန်တော်တို့ အပြီးသတ်ရရှိတဲ့အချိန်မှာပဲ ရန်သူက ဆုတ်ခွာပြေးတယ်။ ဆုတ်ခွာပြေးတဲ့အချိန်မှာ သူတို့က စက်ရုံဝင်းအတွင်းမှာရှိတဲ့ အဆောက်အအုံတွေကို မီးရှို့သွားတယ်။ အဆောက်အအုံတွေက ခိုင်ခံ့ကောင်းမွန်တာကြောင့် အများကြီးတော့ မီးလောင်သွားတာမရှိပါဘူး” ဟု ကိုအောင်စမွန်က ဆိုသည်။

MDY-PDF အနေဖြင့် မတ္တရာမြို့နယ်အတွင်း သတ်မှတ်ထားသည့် စစ်ရေးပစ်မှတ်များကို ဆက်လက်ထိုးစစ်ဆင် တိုက်ခိုက်နေဆဲဖြစ်ပြီး၊ မတ္တရာမြို့နယ်အတွင်း ကျောက်တံတားကျေးရွာတပ်စခန်းတွင်လည်း တိုက်ပွဲပြင်းထန်လျက်ရှိကြောင်း ဆိုသည်။

၁၀၂၇ စစ်ဆင်ရေးအပိုင်း ၂ စတင်သည့် နေ့မှစ၍ ဖမ်းဆီးရမိသည့် သုံ့ပန်းအရေအတွက် ၁၅၀ ကျော်ရှိလာပြီး တပ်မိသားစုဝင်များအပါအဝင် ၃၀၀ ဝန်းကျင် ရှိနေပြီဖြစ်ကြောင်း ကိုအော်စမွန်က ဆိုသည်။

MDY-PDF က သိမ်းပိုက်ရရှိသည် ကြေညာသော Alpha ဘိလပ်မြေစက်ရုံတပ်စခန်းသည် အာဏာသိမ်းပြီးလအနည်းငယ် အကြာကတည်းက စစ်ကောင်စီက အင်အား ၅၀ ခန့်ဖြင့် တပ်စွဲအထိုင်ချထားခြင်းဖြစ်သည်။

ပြီးခဲ့သည့် မေလ ၂၉ ရက်နေ့က အဆိုပါစက်ရုံမှ ပစ်ခတ်သည့် လက်နက်ကြီးတစ်လုံး အောင်သပြေကျေးရွာအတွင်းသို့ ကျရောက်ပေါက်ကွဲခဲ့ပြီး အသက် ၆၅ နှစ်အရွယ် ဒေါ်တင်လှ သေဆုံးခဲ့သည်။ ယင်းမှစကာ အောင်သပြေကျေးရွာ ရွာသူရွာသားအားလုံး ဘေးလွတ်ရာသို့ ထွက်ပြေးတိမ်းရှောင်နေကြရကြောင်း သိရသည်။

ထို့နောက် ဇွန်လ ၁ ရက်နေ့တွင် ကျေးရွာနေအိမ်သို့ ခေတ္တသွားရောက်ကာ လိုအပ်သည့်အသုံးအဆောင်များ ယူဆောင်သည့် အသက် ၂၀ အရွယ် ကိုဝင်းလွင်ဦးနှင့် ကိုသန်းကိုဝင်းတို့နှစ်ဦး ဖမ်းဆီးခံလိုက်ရပြီး သေသည်ရှင်သည်မသိရဘဲ အဆက်အသွယ်ပြတ်တောက်သွားကြောင်း ဒေသခံများက ပြောသည်။

ရွာလုံးကျွတ်တိမ်းရှောင်နေရသည့် အောင်သပြေကျေးရွာမှ ဒေသခံအမျိုးသားတစ်ဦးကလည်း “ဟုတ်တယ်၊ တော်လှန်ရေးအဖွဲ့က သိမ်းလိုက်ပါပြီ။ မနေ့ကစပြီး ပစ်သံခတ်သံ လုံးဝမကြားရတော့ဘူး။ လေယာဉ်လာတိုက်တာပဲ ရှိတယ်။ ဘယ်သူမှတော့ ရွာပြန်မကပ်ရဲသေးဘူး။ အကုန်စစ်ရှောင်နေရတုန်းပဲ” ဟု ယနေ့ ဇူလိုင် ၁၆ ညပိုင်းတွင် ပြောသည်။

ဇွန် ၂၅ မှ စတင်ကာ ၁၀၂၇ စစ်ဆင်‌ရေးအပိုင်း (၂) နှင့်အတူ ဟန်ချက်ညီစစ်ဆင်ရေး ဖော်ဆောင်နေသည့် MDY-PDF က မတ္တရာမြို့နယ်အတွင်း ရေနံ့သာရဲစခန်းအပါအဝင် စစ်ကောင်စီတပ်စခန်း ၂၈ ခုကို သိမ်းပိုက်ရရှိပြီးဖြစ်သည်။

၎င်းတို့၏ စစ်ဆင်ရေးသည် မြန်မာပြည်အလယ်ပိုင်း စီးပွားရေးအချက်ချာကျပြီး အလယ်ပိုင်းတိုင်းစစ်ဌာနချုပ် (လပခ) အခြေစိုက်ရာ မန္တလေးမြို့နှင့် အင်မတန်နီးကပ်လာသောကြောင့် စစ်ကောင်စီသည် မန္တလေးမြို့ကို ခံစစ်ပြင်ကာ လုံခြုံရေးအထူးတင်းကျပ်ထားသည်။