မိုးမိတ်နှင့် မိုးကုတ်ရှိ စစ်ကောင်စီတပ်စခန်း လေးခု TNLAထပ်မံသိမ်းပိုက်

 မိုးမိတ်နှင့် မိုးကုတ်ရှိ စစ်ကောင်စီတပ်စခန်း လေးခု TNLAထပ်မံသိမ်းပိုက်

▪️စစ်ဆင်ရေးလဝက်အတွင်း စစ်ကောင်စီတပ်စခန်း ၄၀ထိ သိမ်းပိုက်နိုင်ဟု TNLA ပြော

ဟန်နွေ/People’s Spring

မိုးမိတ်နှင့် မိုးကုတ်မြို့နယ်ရှိ စစ်ကောင်စီတပ်စခန်းလေးခုကို ထပ်မံသိမ်းပိုက်ရရှိခဲ့ကြောင်း တအာင်းတပ်မတော်(TNLA)က ၁၀၂၇စစ်ဆင်ရေး အပိုင်း(၂) ၁၅ရက်မြောက် စစ်ရေးသတင်းဖော်ပြချက်တွင် အသိပေးထားသည်။

မိုးမိတ်မြို့နယ် စစ်ကောင်စီတပ်စခန်းများဖြစ်ကြသည့် သရက်တောစခန်းနှင့် မိုင်တိုင်(၆)တပ်စခန်းတို့ကို TNLAက သိမ်းပိုက်နိုင်ခဲ့ကြောင်းဖော်ပြသည်။ သိမ်းပိုက်ရရှိခဲ့သည့် နေ့ရက်ကို ဖော်ပြမထားသော်လည်း လက်နက်ခဲယမ်းများ ရရှိခဲ့ကြောင်း အသိပေးသည်။

မိုးကုတ်မြို့နယ်ရှိ မိုင်တိုင်(၅) စစ်ကောင်စီတပ်စခန်းနှင့် ယောမူးစခန်းတို့ကိုလည်း ယနေ့ (ဇူလိုင် ၉ရက်) မွန်လွဲပိုင်းတွင် TNLAက သိမ်းပိုက်နိုင်ခဲ့ကြောင်း ထုတ်ပြန်သည်။

TNLAနှင့် မဟာမိတ်တပ်များသည် ၁၀၂၇ စစ်ဆင်ရေးကို ဇွန်လ ၂၅ရက်တွင် စတင်ခဲ့ပြီး သီပေါ၊ မိုးကုတ်၊ နောင်ချို၊ ကျောက်မဲ၊ မိုးမိတ် ရှိ စစ်ကောင်စီတပ်စခန်းများကို တိုက်ခိုက်ခဲ့သည်။

စစ်ဆင်ရေးစတင်ချိန်မှ ယနေ့(ဇူလိုင် ၉ရက်)အထိ စစ်ကောင်စီတပ်စခန်း ၄၀ခုထိ သိမ်းပိုက်ရရှိပြီးဖြစ်ကြောင်း TNLA ပြောရေးဆိုခွင့်ရှိသူ လွေးယေဦးက ယနေ့ ညပိုင်း၌ ပြောပြသည်။

နောင်ချိုမြို့နယ် သဲခေါ်ရွာအနီးတဝိုက်တွင်လည်း TNLAနှင့် စစ်ကောင်စီတပ်တို့ တိုက်ပွဲဖြစ်ပွားခဲ့သည်။ တိုက်ပွဲဖြစ်ပွားခဲ့ကြောင်း TNLAက ထုတ်ပြန်သည်။ သဲခေါ်ရွာသို့ ဘန့်ဘွေးအခြေစိုက် စစ်ကောင်စီတပ်မှ အတွဲလိုက်ဒုံး (၃၁)လုံး၊ ဒရုန်းဖြင့် (၁)ကြိမ် ပစ်ခတ်တိုက်ခိုက်ခဲ့ကြောင်း၊ 

ထို့ပြင် တိုက်ပွဲဖြစ်ပွားလျက်ရှိသော နောင်ချိုမြို့ ဒုံးတပ် (၆၀၆)စခန်း အနီးတဝိုက်သို့ စစ်ကောင်စီတပ်မှ Jet Fighterဖြင့် တစ်ကြိမ် လေကြောင်းတိုက်ခိုက်မှုပြုလုပ်ခဲ့ကြောင်း ဖော်ပြသည်။

တိုက်ပွဲဖြစ်ပွားခြင်းမရှိသော ကျောက်မဲမြို့နယ် တော့ဆန်ရွာကိုလည်း စစ်ကောင်စီတပ်မှ Jet Fighter ဖြင့် တစ်ကြိမ်နှင့် လက်နက်ကြီးဖြင့် နှစ်ကြိမ်တိုက်ခိုက်ခဲ့ကြောင်း၊ လားရှိး၊ တန့်ယန်းမြို့နယ် စစ်ကောင်စီတပ် မန်ကတ်စခန်းမှ နားဆောင်ရွာသို့ လက်နက်ကြီးဖြင့် ရှစ်ကြိမ် ပစ်ခတ်တိုက်ခိုက်ခဲ့ကြောင်း ထုတ်ပြန်သည်။

မိုးမိတ်မြို့နယ်တွင် စစ်ကောင်စီမှ ဂျက်ဖိုက်တာဖြင့် ‌‌ခြောက်ကြိမ်နှင့် ဗုံးကြဲတိုက်ခိုက်ရာမှာ ရွှေတောင်ဉီးရှိ နေအိမ်ပေါ်သို့ ကျရောက်ပေါက်ကွဲမှုကြောင့် (၁၁)နှစ်အရွယ် ကလေးငယ် တစ်ဦး ပွဲချင်းပြီးသေဆုံးပြီး၊ နှစ်ဦး ထိခိုက်ဒဏ်ရာ ရရှိခဲ့သည်ဟု ဆိုသည်။

ထို့အပြင် သရက်တောဘုန်းကြီးကျောင်းတွင် စစ်ကောင်စီလက်နက်ကြီး ကျရောက်ပေါက် ကွဲမှုကြောင့် ဘုန်းကြီး တစ်ပါး ဒဏ်ရာပြင်းထန်စွာရရှိခဲ့ဟု အသိပေးသည်။

စစ်ကောင်စီတပ်က လက်နက်ကြီး၊ လေကြောင်း တိုက်ခိုက်မှုများကြောင့် စစ်ဆင်ရေးကာလအတွင်း အရပ်သားသေဆုံးမှုများ ဆက်တိုက်ဖြစ်ပေါ်လျက်ရှိရာ ဇွန်လ ၂၅ရက်မှ ယနေ့အထိ ၁၅ရက်တာအတွင်း အရပ်သား ပြည်သူ ၅၀ဦး သေဆုံးကာ ၇၀ဦး ဒဏ်ရာရခဲ့ကြောင်း TNLAက ထုတ်ပြန်ထားသည်။

TNLA၏ ထုတ်ပြန်ချက်၌ လားရှိုးတိုက်ပွဲသတင်းဖော်ပြထားခြင်းမရှိသော်လည်း လားရှိုးမြို့နယ်အတွင်း ယနေ့ တိုက်ပွဲဆက်လက်ဖြစ်ပွားခဲ့ဟု ဒေသခံက ပြောသည်။

"တိုက်ပွဲက မြို့ပေါ်တော့ မဟုတ်ပါဘူး။ မြို့ပြင်ဘက်တွေမှာပါ"ဟုဒေသ သတင်းရင်းမြစ်က ပြောပြသည်။ 

လက်နက်ကြီး၊ လက်နက်ငယ်ပစ်ခတ်သံများ မြို့ပေါ်က ကြားနေရသည်ဟု ဆိုသည်။ ရပ်ကွက်အချို့အတွင်း လက်နက်ကြီးကျရောက်မှုရှိပြီး လူနှင့် နေအိမ်ထိခိုက်ပျက်စီးမှုရှိသည်ဟုလည်း သတင်းရင်းမြစ်က အသိပေးထားသည်။

(၁၀၂၇ စစ်ဆင်ရေး အပိုင်း(၂)တွင် စစ်ကောင်စီအား တိုက်ခိုက်နေသော TNLA ရဲဘော်များအား တွေ့ရစဥ်။ ဓာတ်ပုံ - TNLA)