အင်းတော်ရဲစခန်းကို PDFနှင့် ပူးပေါင်းတပ်များသိမ်းပိုက်၊ အချုပ်သားအချို့ကယ်ထုတ်

 ▪︎Breaking News 

အင်းတော်ရဲစခန်းကို PDFနှင့် ပူးပေါင်းတပ်များသိမ်းပိုက်၊ အချုပ်သားအချို့ကယ်ထုတ်

မိထက်/People's Spring 

အင်းတော်မြို့ရဲစခန်းကို ပြည်သူ့ကာကွယ်ရေးတပ်မတော် (PDF) နှင့် ပူးပေါင်းတပ်များက

 သိမ်းပိုက်လိုက်ပြီး အချုပ်သားအချို့ကယ်ထုတ်နိုင်ကာ ထွက်ပြေးသွားသည့်စစ်ကောင်စီတပ်ဖွဲ့က အချုပ်သားအချို့ကို ဖမ်းဆီးခေါ်ဆောင်သွားသည်။

အင်းတော်မြို့ရဲစခန်းကို ယမန်နေ့(ဩဂုတ်လ ၂၄ရက်) မွန်းလွဲပိုင်း၌ သိမ်းယူနိုင်ခဲ့ခြင်းဟု People's Spring က စုံစမ်းသိရှိရသည်။

"အချုပ်သား ၁၆ ယောက်ရှိတာ တချို့ကို ကယ်ထုတ်နိုင်တယ်။ တချို့က စစ်တပ်က ဖမ်းခေါ်သွားတယ်" ဟု မြေပြင်စစ်ရေးသတင်းမြစ်တစ်ဦးကပြောသည်။

တိုက်ပွဲအခြေအနေနှင့် စစ်ကောင်စီဘက်မှ ထိခိုက်မှုများကို စစ်‌ဒေသ(၁)မှ မကြာမီတရားဝင်သတင်းထုတ်ပြန်မည်ဟု သိရသည်။

အင်းတော်မြို့တွင် ဂျပန်ဆေးရုံ၌ တပ်စွဲထားသည့်စစ်ကောင်စီတပ်ဖွဲ့နှင့် စစ်ကောင်စီဗျူဟာကုန်းနှစ်နေရာကျန်ရှိနေသေးသည်။ ယင်းနှစ်နေရာစလုံး၌ စစ်ကောင်စီတပ် တပ်မ(၇၇)လက်အောက်ခံစစ်ကောင်စီတပ်ရင်းများ တပ်စွဲထားကြောင်း သိရသည်။

လက်ရှိတိုက်ခိုက်နေဆဲ အင်းတော်မြို့သိမ်းတိုက်ပွဲအတွင်း စစ်ရေးအရာအချက်အချာကျသော နဘားလမ်းဆုံကိုလည်း KIA ၊ PDF နှင့် ပူးပေါင်းတပ်ဖွဲ့များကဩဂုတ်လ ၂၂ရက်တွင် သိမ်းယူခဲ့သည်။

စစ်ကိုင်းနှင့် ကချင်အစပ်ရှိ အင်းတော်အပါအဝင် ပင်လယ်ဘူး ၊ထီးချိုင့် စသော မြို့သိမ်းတိုက်ပွဲများကို NUG ၊အမှတ် (၁)စစ်ဒေသ ကွတ်ကဲမှုဖြင့် PDF ၊ပကဖ ၊ KIA နှင့် ပူးပေါင်းတပ်များကထိုးစစ်ဆင်တိုက်ခိုက်နေခြင်းဖြစ်သည်။တော်လှန်

ရေးတပ်ဖွဲ့များသည် အင်းတော်မြို့သိမ်းတိုက်ပွဲအတွက် ပြီးခဲ့သည့် ဇွန်လကတည်းက ကြိုတင်ပြင်ဆင်ခဲ့ခြင်းဖြစ်သည်။ 

တပ်မ-၇၇ လက်အောက်ခံ ခလရ(၆)မှ စစ်ကောင်စီတပ်ဖွဲ့ဝင်များတပ်ဆွဲထားပြီး အင်တော်မြို့အား ကာထားသည့်နံ့သာရွာစခန်းကို ဇွန်လ ၂၈ရက်တွင် PDF ၊ကသာခရိုင် တပ်ရင်း-၂၊KIA နှင့် အင်းတော်မြို့နယ် ပကဖ ပူးပေါင်းအဖွဲ့တို့က တိုက်ခိုက်သိမ်းပိုက်ခဲ့သည်။ ထို့နောက် ဩဂုတ်လ တတိယလပတ်ထဲတွင် အင်းတော်၊ထီးချိုင့်၊ ပင်လယ်ဘူးမြို့သိမ်းတိုက်ပွဲများ တပြိုင်နက်စတင်ခဲ့ပြီး လက်ရှိအချိန်အထိတိုက်ပွဲများပြင်းထန်နေသည်။

စစ်ကိုင်းတိုင်းအထက်ပိုင်းဒေသတွင် အမှတ်(၁)

စစ်ဒေသ ဦးဆောင်မှုဖြင့် ဆင်နွှဲနေသော မြို့သိမ်းတိုက်ပွဲများမှာ စစ်ရေးအရ အလွန်အရေးပါကြောင်း အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဦးမောင်မောင်ဆွေက လူထုနွေဦးသို့ ပြောကြားထားသည်။

"စစ်ကိုင်းတိုင်းအထက်ပိုင်း မြို့သိမ်းတိုက်ပွဲတွေက မဟာဗျူဟာအရရော၊ ပထဝီအ‌နေ အထားအရရော၊ စစ်ရေးအရရော အင်မတန်အရေးပါတယ်လို့ ပြောလို့ရပါတယ်”ဟု ဦးမောင်မောင်ဆွေက ပြောသည်။

(အင်းတော်မြို့ရဲစခန်းသိမ်းပြီးနောက် တော်လှန်ရေးတပ်ဖွဲ့ဝင်များကို တွေ့ရစဥ်။ဓါတ်ပုံ-CJ)