မြေပြန့် ထိုးစစ် စတင်ခဲ့သော်
မြန်မာနိုင်ငံ အလယ်ပိုင်း ဒေသမှာ ကျယ်ပြန့်တဲ့ နယ်မြေတလျှောက် မြေပြန့်ထိုးစစ် ပေါ်ပေါက်လာရင် အကြမ်းဖက်စစ်တပ်တခုလုံး ပြိုကျသွားဖို့ ဒါမှမဟုတ် ချေမှုန်းခံရဖို့ ရာခိုင်နှုန်း အလွန်များပါတယ်။ စစ်ကိုင်းတိုင်း အောက်ပိုင်း၊ မကွေးတိုင်း၊ မန္တလေးတိုင်း၊ နေပြည်တော်၊ ပဲခူးတိုင်း အရှေ့ခြမ်း၊ အနောက်ခြမ်း၊ ဧရာဝတီ နဲ့ ရန်ကုန်တိုင်းတွေမှာ မြေပြန့် မဟာဗျူဟာ ထိုးစစ် စတင်လာတယ်လို့ တွက်ယူကြည့်ပါ။
မြို့ပေါင်းများစွာ၊ နယ်မြေများပေါင်းများစွာမှာရှိတဲ့ စစ်စခန်း၊ ရဲစခန်း၊ ပြည်သူ့စစ်စခန်း နဲ့ စစ်ယာဥ်တန်းသွားလာမှု၊ စစ်ကြောင်းလှုပ်ရှားမှုပေါင်းများစွာကို ပြည်သူ့ကာကွယ်ရေးတပ်မတော်၊ ပြည်သူ့ကာကွယ်ရေး အဖွဲ့ (ပကဖ)၊ ဒေသကာကွယ်ရေး အဖွဲ့ နဲ့ တချို့သော နယ်မြေတွေမှာ တိုင်းရင်းသားတော်လှန်ရေး အဖွဲ့တွေက ထိုးနှက်တိုက်ခိုက်ကြမှာဖြစ်ပါတယ်။ အထက်ဖော်ပြပါ နယ်မြေတချို့မှာ တော်လှန်ရေး အင်အားစုတွေဟာ စခန်းသိမ်းတိုက်ပွဲတွေ ကို ဖော်ဆောင်နိုင်နေကြပြီး တချို့ နယ်မြေတွေမှာ (ဥပမာ-ဧရာဝတီတိုင်း၊ ပဲခူးတိုင်း အနောက်ခြမ်း)တွေမှာ ဖော်ဆောင်နိုင်ခြင်းမရှိသေးပါဘူး။ ရန်ကုန်တိုင်းမှာဆိုရင် စစ်ရေးလှုပ်ရှားမှု ပုံစံဟာ မြို့ပြ ပြောက်ကျားစစ်ဆင်မှု ပုံစံ အဖြစ် ရှိနေပြီး ဆက်လက်ပြီးလဲ မြို့ပြ တိုက်ခိုက်မှု ပုံစံ အဖြစ် ရှိသင့်ပါတယ်။ တကယ်လို့ မြေပြန့်ထိုးစစ်သာ စတင်လာမယ်ဆိုရင် စစ်တပ်ဟာ နိုင်ငံရေး အရရော၊ စစ်ရေးအရပါ တော်တော်လေးကို အထိနာသွားမှာ ဖြစ်ပါတယ်။
မြေပြန့် ထိုးစစ် အလားအလာကို မကြည့်ခင် ၂၀၂၃ ခုနစ်တွင်း စစ်ရေး အခြေအနေတွေကို ပြန်လည် သုံးသပ်သင့်ပါတယ်။ ၂၀၂၃ ခုနစ် နှစ်စကာလ ဖေဖော်ဝါရီ နဲ့ မတ်လလောက်ကစတင်ပြီး အထက်အညာဒေသမှာရှိတဲ့ လေတပ်စခန်း၊ စစ်အခြေစိုက်စခန်း နဲ့ လက်နက်စက်ရုံပေါင်းများစွာကို တပြိုင်နက်တည်း တိုက်ခိုက်တဲ့ ပေါင်းစပ်ညှိနှိုင်း လုပ်ဆောင်တဲ့ စစ်ဆင်ရေးတွေကို လုပ်ဆောင်နိုင်ခဲ့ပါတယ်။ အဲဒီနောက်မှာ မဟာဗျူဟာမြောက် တည်ရှိနေတဲ့ ပဲခူးရိုးမထိုးဖောက်ရေး ပထမခြေလှမ်းအဖြစ် ရိုးမ နဲ့ ရန်ကုန်-မန္တလေး အမြန်လမ်းဒေသဆီကို ပေါက်တဲ့ စစ်တောင်းမြစ်ဝှမ်း စိုးမိုးရေး စစ်ဆင်ရေး ပေါ်ထွက်လာပါတယ်။ အဲဒီကာလမှာ ရန်သူ အနေနဲ့ ကချင်လွတ်လပ်ရေး တပ်မတော် ဌာနချုပ် လိုင်ဇာဒေသကို စစ်ကြောင်းများစွာ နဲ့ ထိုးဖောက်ဝင်ရောက်လာပြီး ခုခံတော်လှန်စစ်ကို ထိန်းချုပ်ထားဖို့ ကြိုးပမ်းခဲ့ပါတယ်။ ရန်သူ့ စစ်ဆင်ရေးဟာ အရှုံးနဲ့ပဲ ရင်ဆိုင် ရပ်တန့်သွားပါတယ်။
အဲဒီလို ဖြစ်ပေါ်နေတဲ့ ကာလမှာ
- စစ်ကိုင်းအောက်ပိုင်း၊ မကွေးတိုင်း နဲ့ ပဲခူး အနောက်ခြမ်း ဒေသတွေမှာ ပြောက်ကျား စစ်ဆင်မှုတွေ၊ လက်နက်စက်ရုံတွေကို အလစ်အငိုက်ယူ ပစ်ခတ်တာတွေ၊ တချို့ နယ်မြေတွေမှာ စခန်းသိမ်းတိုက်ပွဲတွေ ဖော်ဆောင်နိုင်လာပါတယ်။ ဒီစစ်ရေးလှုပ်ရှားမှုတွေဟာ တော်လှန်ရေး အင်အားစုတွေရဲ့ စိုးမိုးနယ်မြေကို ချဲ့ထုတ်လိုက်မှုဖြစ်ပြီး အနာဂတ် ထိန်းချုပ်နယ်မြေတွေအတွက် ပနှက်ရိုက် လုပ်ဆောင်မှုတွေပဲ ဖြစ်ပါတယ်။
- ကရင် နဲ့ ကရင်နီ ဒေသ၊ တနင်္ဿာရီ ဒေသမှာလဲ တိုက်ပွဲတွေဟာ အဓိက ကုန်သွယ်ရေး လမ်းတွေ၊ မြို့ပြ ဒေသတွေထိ ရောက်ရှိလာခဲ့ပြီ ဖြစ်ပါတယ်။
- ရန်ကုန်မှာလဲ မြို့ပြ စစ်ဆင်တိုက်ခိုက်မှုတွေကို စနစ်တကျ နဲ့ ထိရောက်မှု ရှိအောင်လုပ်ဆောင်နိုင်လာပါတယ်။ နေပြည်တော်၊ မန္တလေးစတဲ့ မြို့ကြီးတွေ နားထိ တိုက်ပွဲတွေ ရောက်ရှိလာခဲ့ပါတယ်။
- သိသာ ထင်ရှားဆုံးကတော့ ၁၀၂၇ စစ်ဆင်ရေး အောက်တိုဘာလအတွင်း ပေါ်ထွက်လာမှု ဖြစ်ပြီး ရှမ်းမြောက် နဲ့ ရခိုင်ဒေသတခုလုံး မှာ စစ်တပ်ရဲ့ ထိန်းချုပ်နိုင်မှု သိသိသာသာ လျှော့နည်းသွားပါတယ်။ ရှမ်းမြောက်ဒေသ မြို့တွေ၊ စခန်းတွေ အများစုကို ညီနောင်မဟာမိတ် အဖွဲ့က ထိန်းချုပ်နိုင်လိုက်တယ်။ တရုတ်နယ်စပ် ကုန်သွယ်ရေး လမ်းကြောင်းအားလုံးကိုလဲ ထိန်းချုပ်နိုင်လိုက်ပြီလို့ ပြောလို့ရတယ်။
- ရခိုင်ဒေသမှာဆိုရင် အိန္ဒိယ နယ်စပ် ပလက်ဝ မြို့နယ်တခုလုံးကို ရက္ခိုင့်တပ်တော်က သိမ်းပိုက်နိုင်လိုက်သလို ရခိုင်မြောက်ပိုင်းဒေသမှာလဲ စစ်ရေးလှုပ်ရှားမှုတွေ၊ စခန်းသိမ်းတိုက်ပွဲတွေ ဆင်နွှဲခဲ့တယ်။
- စစ်ကိုင်းအထက်မှာရှိတဲ့ ခရိုင်အဆင့်မြို့ ကောလင်းကိုလဲ ပြည်သူ့တော်လှန်ရေး တပ်ပေါင်းစုက သိမ်းပိုက်နိုင်ခဲ့ပြီး ဧရာဝတီမြစ်ဘေးမှာရှိတဲ့ အချက်အခြာ ကျတဲ့ ထီးချိုင့်မြို့ကိုလဲ ဝန်းရံ တိုက်ခိုက်နိုင်ခဲ့တယ်။
၂၀၂၃ ခုနစ် တွင်း ဖြစ်ပေါ်ခဲ့တဲ့ ဒီစစ်ရေး အောင်ပွဲတွေက ပြသတာကတော့ စစ်တပ်ရဲ့ ထိန်းချုပ် လှုပ်ရှားမှု နယ်မြေဟာ နယ်စပ်တောင်တန်း ဒေသမှာ သေးကျုံ့သွားပြီ၊ စစ်တပ်ဟာ တိုက်စွမ်းရည် မရှိသလို အင်အား လုံလောက်မှု မရှိတော့ဘူးဆိုတဲ့ အချက်ပဲ ဖြစ်တယ်။
တောင်တန်း ဒေသ စစ်ရေးအောင်ပွဲတွေ ပေါ်ထွက်လာပြီးတဲ့နောက်မှာ လိုအပ်နေတာကတော့ မြေပြန့်ဒေသ ထိုးစစ်ဆင် တိုက်ခိုက်မှုပဲ ဖြစ်တယ်။ ပထမ အဆင့်ဖြစ်တဲ့ နယ်စပ်တောင်တန်းဒေသမှာ စစ်အုပ်စုကို ချေမှုန်းစိုးမိုးရေးဆိုတဲ့ ရည်မှန်းချက်ပြည့်ဝသွားပြီ ဖြစ်ပါတယ်။ မြေပြန့်ဒေသမှာ ကျယ်ပြန့်တဲ့ စစ်ဆင်တိုက်ခိုက်မှု ပေါ်ထွက်လာရင် စစ်တပ်ဟာ လက်ရှိထက် ပိုပြီး အထိနာမှာ ဖြစ်ပါတယ်။ စစ်တပ်ရဲ့ စစ်တိုင်းဌာနချုပ်၊ တပ်မဌာနချုပ်၊ တပ်ရင်းဌာနချုပ်၊ လေတပ်စခန်း၊ လက်နက်စက်ရုံ၊ ထောက်ပို့ ယာဥ်တန်းပေါင်းစုံဟာ ပုံမှန် နှောင့်ယှက်ပစ်ခတ်ခံရမှာဖြစ်ပါတယ်။ ဒီလို မြေပြန့် ဒေသ စစ်ဆင်တိုက်ခိုက်မှုဟာ တောင်တန်း ဒေသမှာ ရရှိထားတဲ့ စစ်ရေး အောင်ပွဲ နဲ့ နယ်မြေတွေ တည်တန့်ခိုင်မြဲရေး၊ အခိုင်အမာ ပေါ်ထွက်လာစေရေး အတွက်လဲ အထောက်အကူ ပေးပါတယ်။ တောင်တန်း ဒေသကို သွားရောက်မယ့် ရန်သူ့ စစ်အင်အားကို လှမ်းပြီး ထိန်းထားနိုင်မှာ ဖြစ်တယ်။ ဒီလို လုပ်ဆောင်မှုကြောင့် စစ်ဘောင် ကို နယ်ကျယ်ကျယ် ဖြန့်ထုတ်ရခြင်း ဆိုတဲ့ အချက် နဲ့ ရင်ဆိုင်ရမှာ ဖြစ်တယ်။ ပေါ်ထွက်လာတဲ့ စစ်နယ်ကျယ် ဝန်းမှု နဲ့ အတူ အရပ်သားတွေ အပေါ် ရန်သူ ရဲ့ ဖိနိုပ်မှု၊ သတ်ဖြတ်မှု တွေလဲ ပေါ်ပေါက်လာနိုင်တဲ့ အတွက်၊ ပြည်သူလူထု ဘေးကင်းရေး၊ အန္တရာယ် အနည်းဆုံး ဖြစ်ရေးကိုလဲ ကြိုတင် ပြင်ဆင်ထားသင့်ပါတယ်။
🔺မြေပြန့် ထိုးစစ်ဟာ လက်နက်ကြီး နဲ့ ခဲယမ်း ထောက်ပို့ပိုင်း လိုအပ်ချက် ရှိနေမှာဖြစ်တဲ့ အတွက် ခဲယမ်းအမြောက်အမြားလိုအပ်တဲ့ စခန်းသိမ်းတိုက်ပွဲ၊ မြို့သိမ်းတိုက်ပွဲတွေ ဆင်နွှဲလို့မဖြစ်ပါဘူး။ အောင်ပွဲရမှာ သေချာမှ ခဲယမ်းပြန်လည် သိမ်းပိုက်မှု တွက်ချေကိုက်မှ စခန်းသိမ်းပွဲ ဖော်ဆောင်သင့်ပါတယ်။
🔺မြေပြန့်ထိုးစစ်ရဲ့ အရေးကြီးတဲ့ အချက်ကတော့ အောင်ပွဲ မလောရန်၊ ရန်သူကို ကျယ်ပြန့်တဲ့ နယ်မြေတလျှောက် ဖိအားပေး၊ နှောင့်ယှက်ပြီး အားနည်းပင်ပန်းစေရန် တို့ပဲ ဖြစ်ပါတယ်။ မြေပြန့်ထိုးစစ်ရဲ့ စစ်ရေးလမ်းညွှန်ဟာာ ပြောက်ကျားစစ် ပါရဂူ မော်စီတုန်း ရဲ့ လမ်းညွှန်ချက်ဖြစ်တဲ့ အမာရှောင် အမွတိုက် ဆိုတဲ့ လမ်းညွှန် အတိုင်းရှိသင့်ပါတယ်။ လူအင်အား အနည်းငယ်နဲ့သွားလာနေတဲ့ စစ်ကြောင်းငယ်တွေ၊ စစ်ယာဥ်တန်းတွေ၊ မြို့ပြ ဒေသတွင်းမှာ သေချာတဲ့ စစ်ရေး ပစ်မှတ်တွေကို တိုက်ခိုက်တဲ့ ပုံစံ ပဲဖြစ်သင့်ပါတယ်။
🔺လက်တွေ့ မြေပြန့် ထိုးစစ်ပေါ်ထွက်လာရင် အကျိုးကျေးဇူး (၃) ချက် ရရှိနိုင်ပါတယ်။ နံပတ် (၁) ကတော့ မြေပြန့်ဒေသမှာပါ စိုးမိုး နယ်မြေကြီးတခု ထူထောင်နိုင်ခြင်း၊ စစ်တပ် လှုပ်ရှားသွားလာနိုင်တဲ့ နယ်မြေကို ချုံ့လိုက်နိုင်ခြင်း၊ နံပတ် (၂) ကတော့ တောင်တန်းက စစ်ရေးအောင်ပွဲတွေကို ခိုင်မာစေရန် သွယ်ဝိုက် ပံ့ပိုးပေးနိုင်ခြင်း၊ နံပတ် (၃) အချက်ကတော့ စစ်အုပ်စုက ဘက်ပြောင်းလိုသူများ လက်တကမ်း အကွာမှာ ဘက်ပြောင်းနိုင်တဲ့အတွက် ပြည်သူ့ရင်ခွင်ခိုလှုံမှု များပြားလာနိုင်ခြင်းတို့ ဖြစ်ပါတယ်။
🔺မြေပြန့် ထိုးစစ်သာ စတင်မယ်ဆိုရင် နေပြည်တော်၊ မန္တလေး၊ ရန်ကုန် ကဲ့သို့ မြို့ကြီးတွေ နားထိပါ တော်လှန်ရေး တပ်တွေ အလုံးအရင်း နဲ့ ဝန်းရံ တိုက်ခိုက်နိုင်မှာ ဖြစ်ပါတယ်။ 🔺လက်တွေ့မှာ မြေပြန့်ထိုးစစ် စတင်နိုင်ပြီဆိုရင် နိုင်ငံတကာရဲ့ အမြင် အထူးသဖြင့် အိမ်နီးချင်း တရုတ် နိုင်ငံရဲ့ တော်လှန်ရေး အပေါ်ထားရှိတဲ့ အမြင်၊ စစ်အုပ်စု ရဲ့ နိုင်ငံထိန်းချုပ်နိုင်မှု အပေါ် အမြင် သိသိသာသာ ပြောင်းလဲသွားမှာ ဖြစ်ပါတယ်။ ဘာလို့လဲဆိုတော့ နိုင်ငံတည်ငြိမ်မှု နဲ့ နိုင်ငံကို လက်တွေ့ ထိန်းချုပ်ထားတာ တော်လှန်ရေး အင်အားစုတွေပဲဆိုတာ ငြင်းမရအောင် ပေါ်ထွက်လာမှာ ဖြစ်ပါတယ်။ အဲဒီလက်တွေ့ အခြေအနေအောက်မှာ နိုင်ငံတကာ အနေနဲ့ အမျိုးသားညီညွတ်ရေးအစိုးရ နဲ့ တော်လှန်ရေး အင်အားစုတွေကို ပိုမို အသိအမှတ်ပြုတာ၊ ထိတွေ့ဆက်ဆံတာ လုပ်ဆောင်ရမှာဖြစ်ပါတယ်။ လက်တွေ့ မြေပြင်စိုးမိုးမှုကနေ တရားဝင် အသိအမှတ်ပြုမှုကို မဖြစ်မနေ ပေးအပ်ရမှာ ဖြစ်တယ်။
🔺စီးပွားရေးပိုင်းအရဆိုရင်လဲ အရေးပါတဲ့ ကုန်ထုတ်နယ်မြေတွေ၊ စိုက်ပျိုးရေး နယ်မြေတွေ၊ ဆက်သွယ်ရေး လမ်းကြောင်းတွေ အားလုံးနီးပါးကို တော်လှန်ရေး အင်အားစုတွေ ထိန်းချုပ်နိုင်မှာ ဖြစ်ပြီး စစ်အုပ်စုရဲ့ ဝင်ငွေ ရင်းမြစ် ထိထိသာသာ ယိုင်လဲသွားမှာဖြစ်ပြီး တော်လှန်ရေး အင်အားစုရဲ့ အခွန် ရရှိရာ နယ်မြေ ကျယ်ပြန့်လာမှာဖြစ်တယ်။
🔺🔺တကယ်လို့ မြေပြန့် ထိုးစစ်သာ ပေါ်ပေါက်လာမယ်ဆိုရင် စစ်အာဏာရှင် နဲ့ စစ်အုပ်စု ပြိုလဲရေးဟာ ဝေးတော့မှာ မဟုတ်ပါဘူး။
လက်ရှိစစ်ရေးအခြေအနေကို ခြုံငုံနားလည်နိုင်ဖို့ PDF insight ကို ကြည့်ရှုပါ။
#PDFInsight
