တိုင်းပြည်အတွက် အသက်စွန့်ခဲ့သူ မြန်မာ့လက်ဝှေ့ ဂန္ထဝင်သူရဲကောင်း တူးတူး (သတင်းဆောင်းပါး)
ဆောင်းပါးရှင် - ဆလိုင်းသန့်စင်
ဇူလိုင်လ ၁၇ ရက်
“တူးတူး”ဟုဆိုလျှင် မြန်မာ့ရိုးရာလက်ဝှေ့ပရိတ်တိုင်း သိကြသည်။ ရိုးရာလက်ဝှေ့ပြိုင်ပွဲများတွင် တူးတူး၏ တွဲဆိုင်းပါသည့်ပွဲဆိုလျှင် ပရိတ်သတ်က ရုံပြည့်ရုံလျှံအားပေးကြသည်။
တူးတူးသည် ကြိုးဝိုင်းအတွင်း၌ ပြိုင်ဘက်ကို လေးလေးစားစား ယှဉ်ပြိုင်သည်။ ရေသာခို၍ ဟန်ပြထိုးလေ့မရှိဘဲ ပါဝါအပြည့်၊ အားမာန်အပြည့် ပညာကုန်သုံး၍ ထိုးလေ့ရှိသည်။ ထို့ကြောင့် တူးတူးကို ပရိတ်သတ်များ တခဲနက် အားပေးကြသည်။ ၂၀၁၃ ခုနှစ်နောက်ပိုင်း မြန်မာ့လက်ဝှေ့လောက၌ “တူးတူး (နဂါးမာန်)” ဟူသည့်နာမည်က အရှိန်အဝါကြီးမားလာခဲ့ပြီး WLC ၏ မစ်ဒယ်ဝိတ်တန်း ကမ္ဘာ့လက်ဝှေ့ချန်ပီယံ အပါအဝင် အောင်မြင်မှုပေါင်းများစွာ ဆွတ်ခူးနိုင်ခဲ့သည်။
ငယ်ငယ်ရွယ်ရွယ်နှင့် မြန်မာ့လက်ဝှေ့လောက၏ ဂန္ထဝင်တစ်ဦးဖြစ်လာခဲ့သည့် တူးတူးသည် ၂၀၂၁ ခုနှစ်၊ စစ်တပ် အာဏာသိမ်းချိန်တွင် ပြည်သူလူထုနှင့်အတူ ရပ်တည်ခဲ့ပြီး စစ်အာဏာရှင်ဆန့်ကျင်ရေးလှုပ်ရှားမှုများတွင် အင်တိုက်အားတိုက် ပါဝင်ခဲ့သည်။ ပြီးခဲ့သည့် ဧပြီလ ၁၁ ရက်နေ့တွင် မင်းဘူးခရိုင်၊ စကုမြို့နယ်ရှိ စားသောက်ဆိုင်တစ်ခု၌ လူငယ် ၆ ဦးနှင့်အတူ တူးတူးကို စစ်ကောင်စီတပ်က ဖမ်းဆီးခဲ့သည်။
စစ်ကောင်စီက လက်ဝှေ့ကျော် တူးတူးကို စကုမြို့ရှိ စစ်တပ်စစ်ကြောရေးစခန်းတွင် ဖမ်းဆီးနှိပ်စက်ပြီး သတ်ဖြတ်ခဲ့သည့်အတွက် မြန်မာ့လက်ဝှေ့လောက၏ ဂန္ထဝင်လက်ဝှေ့သမား တူးတူးမှာ ဧပြီလ ၂၆ ရက်နေ့တွင်
ကြွေလွင့်ကျဆုံးခဲ့ရသည်။
"အခုခေတ်မှာ ရှားပါးနေပြီဖြစ်တဲ့ ရိုးရာလက်ဝှေ့ရဲ့ သရုပ်သကန် သတ်ကိုးသတ်စုံလင်အောင် ကစားနိုင်တဲ့ လက်ဝှေ့သမားတစ်ဦး ဆုံးရှုံးလိုက်ရခြင်းပါ။ အာဏာမသိမ်းခင်က နိုင်ငံတကာအထိဖောက်ထွက်ဖို့ ကြိုးစားခဲ့တဲ့ ရိုးရာလက်ဝှေ့လောကရဲ့ ရှေ့တန်းသမားတဦးကို ဆုံးရှုံးလိုက်ရတာက တော်တော်ကိုကြီးမားတဲ့ ဆုံးရှုံးမှုပါ"ဟု တူးတူး၏မိတ်ဆွေ ရိုးရာလက်ဝှေ့သမားတစ်ဦးက ဧရာ၀တီတိုင်းမ်ကို ပြောပြသည်။
မြန်မာ့လက်ဝှေ့ကျော်ဖြစ်လာမည့် တူးတူးကို ၁၉၉၀ ခုနှစ်၊ အောက်တိုဘာလ ၆ ရက်နေ့တွင် မကွေးတိုင်း၊ ရေနံချောင်းမြို့နယ်၊ ဗူးကျွန်းရွာတွင် မွေးဖွားခဲ့သည်။ တူးတူး၏ ငယ်နာမည်မှာ မောင်တူး ဖြစ်သည်။
မူလတန်းပညာကို ဆင်ဖြူကျွန်းမြို့နယ်တွင် သင်ကြားခဲ့ပြီး အလယ်တန်းပညာကို မကွေးမြို့ အလက (၄) တွင် တက်ရောက်သင်ကြားခဲ့သည်။ ၈ တန်းအောင်မြင်ပြီးနောက် န၀မတန်းနှင့် ဒဿမတန်းကို မကွေး၊ အထက (၁) တွင် ပညာသင်ကြားခဲ့သူ ဖြစ်သည်။
ရင်းနှိးသူမိတ်ဆွေများ၏ပြောပြချက်အရ မောင်တူးသည် ငယ်စဉ်ကပင် တိုက်ခိုက်ရေးပညာကို စိတ်ဝင်စားခဲ့ပြီး ၈ တန်းနှစ်အရွယ်ကပင် မကွေးမြို့ရှိ ဆရာဦးတင်မောင်အေး၏ Rocky Tiger Kyokushin Karate သင်တန်းကျောင်းတွင် ကရာတေးပညာ စတင်သင်ကြားခဲ့သည်။
တူးတူးသည် ဝါသနာအရ မကွေးတိုင်းအတွင်းရှိ ဘုရားပွဲများတွင် အပျော်တမ်းလက်ဝှေ့လိုက်ထိုးခဲ့သည်။ ၂၀၁၀ ခုနှစ်တွင် ကျောက်ပန်းတောင်းမြို့ရှိ လက်ဝှေ့ပွဲတစ်ခု၌ လက်ဝှေ့ထိုးရင်း နဂါးမာန်လက်ဝှေ့ကလပ် တည်ထောင်သူ နည်းပြဆရာ ဦးကျော်စိုးကတွေ့ရှိပြီး ၎င်း၏ကလပ်သို့ ခေါ်ယူကာ လေ့ကျင်သင်ကြား ပေးခဲ့သည်။
"သူက မကွေးတိုင်းသား။ ရိုးရာလက်ဝှေ့ပွဲနည်းတဲ့သူ့ဇာတိမှာ ၂၀၁၀ တုန်းက ပွဲတစ်ပွဲကျင်းပတော့ လက်ရှိနဂါးမာန်နည်းပြချုပ်က သူ့ကိုသဘောကျပြီး ရန်ကုန်ခေါပြီး လေ့ကျင့်ပေးခဲ့တာ။ အဲဒီအချိန်မှာ လက်ဝှေ့ဂန္ထဝင် တွေ့မရှောင်နဲ့တွဲပြီး သူလေ့ကျင့်ခွင့်ရခဲ့တယ်။ မိသားစုနဲ့ခွဲပြီး ရန်ကုန်မှာ အခြေချ လေ့ကျင့်ခဲ့ရတဲ့ မအောင်မြင်ခင်ကာလတွေက လက်ဝှေ့သမားဘဝမှာ သူ့အတွက် အကြမ်းတမ်းဆုံး ဖြစ်မယ်ထင်တယ်"ဟု တူးတူး၏မိတ်ဆွေက ပြောပြသည်။
တူးတူးသည် ၂၀၁၀ ခုနှစ်မှစ၍ ပရော်ဖက်ရှင်နယ်လက်ဝှေ့သမားဘ၀ကို စတင်ခဲ့ပြီး ၂၀၁၂ ခုနှစ်တွင် ဗီယက်နမ်နိုင်ငံ၊ ဟိုချီမင်းမြို့၌ကျင်းပသည့် အာရှမွေ့ထိုင်းပြိုင်ပွဲတွင် မြန်မာနိုင်ငံကိုယ်စားပြု ယှဉ်ပြိုင်ပြီး ရွှေတံဆိပ်ဆု ဆွတ်ခူးခဲ့သည်။
၂၀၁၃ ခုနှစ်ကစတင်၍ လက်ဝှေ့လောက၌ တူးတူး (နဂါးမာန်) ဟူသည်နာမည်က ထင်ရှားခဲ့ပြီး အောင်မြင်မှုများ ဆက်တိုက် ဆွတ်ခူးနိင်ခဲ့သည်။ ယင်းနှစ်တွင် မကွေးတိုင်းဝန်ကြီးချုပ်ဖလား လက်ဝှေ့ပြိုင်ပွဲတွင် ရွှေတံဆိပ်ရရှိခဲ့သလို ၂၀၁၃ ခုနှစ်၏ ဒဂုံရွှေအောင်လံဆုကိုလည်း ပြိုင်ဘက်အားလုံးကို အနိုင်ယူ၍ ဆွတ်ခူးခဲ့သည်။
ထို့ပြင် ၂၀၁၃ ခုနှစ်က မြန်မာနိုင်ငံ၌ လက်ခံကျင်းပခဲ့သည့် ၂၇ ကြိမ်မြောက် အရှေ့တောင်အာရှအားကစား ပြိုင်ပွဲတွင် တူးတူးက မွေ့ထိုင်းလက်ဝှေ့ပြိုင်ပွဲ ၇၁ ကီလိုတန်းတွင် ပြိုင်ဘက်များကို အနိုင်ယူပြီး မြန်မာနိုင်ငံအတွက် ရွှေတံဆိပ်ဆု ရယူပေးခဲ့သည်။
ထိုမျှမကသေး ၂၀၁၃ ခုနှစ်၊ ဇွန်လက တောင်ကိုရီးယားနိုင်ငံ၊ အင်ချွန်းမြို့၌ ကျင်းပခဲ့သည့် အာရှ ကိုယ်ခံပညာပြိုင်ပွဲ၌ မွေ့ထိုင်း ၆၇ ကီလိုတန်းကို ၀င်ရောက်ယှဉ်ပြိုင်ခဲ့ပြီး မြန်မာနိုင်ငံ အတွက် အာရှအဆင့်ပြိုင်ပွဲတွင် ကြေးတံဆိပ်ရယူပေးခဲ့သူ ဖြစ်သည်။
၂၀၁၃ ခုနှစ်ထဲမှာပင် ရွှေခါးပတ် ၄ ဆုရှင် ဝါရင့်လက်ဝှေ့သမား ဝင်းထွန်း (လယ်/ဆည်) နှင့် တူးတူး (နဂါးမာန်) တို့ ထိုးသတ်ခဲ့သည်။ ထိုပွဲစဉ်တွင် ဝါရင့်လက်ဝှေ့ကျော် ဝင်းထွန်းကို အသာစီးထိုးသတ်ကာ တတိယအချီတွင် အလဲထိုးဖြင့် တူးတူးက အနိုင်ယူခဲ့သည်။ ယင်းနိုင်ပွဲကြောင့် မြန်မာ့ရိုးရာ လက်ဝှေ့လောက၌ ပထမတန်း လက်ဝှေ့ကျော် တူးတူး ဟူသည့် နာမည်က ပို၍ထင်ရှားလာခဲ့သည်။
“ကျွန်တော်က တူးတူးကို ဝင်းထွန်းနဲ့ ထိုးတဲ့ပွဲမှာ စပြီးသဘောကျတာ။ ဝင်းထွန်းက သမ္ဘာရင့်ဝါရင့်၊ ရွှေခါးပတ် ချန်ပီယံ ၄ ဆုရှင်၊ တူးတူးက တက်သစ်စ။ အဲ့ပွဲမှာ ဝင်းထွန်းကို အသာစီးနဲ့လှလှပပ အလဲထိုးပြသွားတာ”ဟု ပုသိမ်မြို့မှ တူးတူး၏လက်ဝှေ့ပရိတ်သတ်တစ်ဦးက ပြောဆိုသည်။
ပထမတန်းလက်ဝှေ့ကျော်ဖြစ်လာသည့် တူးတူးသည် ၂၀၁၄ ခုနှစ်တွင် ထိုင်းနိုင်ငံရှိ နာမည်ကျော် Thai Fight မွေ့ထိုင်းပြိုင်ပွဲတွင် သူငယ်ချင်းဖြစ်သူ ထွန်းထွန်းမင်းနှင့်အတူ ပွဲစဉ်တချို့ ထိုးသတ်ခဲ့သည်။ နောက်ပိုင်းတွင် မြန်မာနိုင်ငံသို့ပြန်လာ၍ မြန်မာ့ရိုးရာလက်ဝှေ့လောက၏ ရှုံးပွဲမရှိသော ထိပ်တန်းလက်ဝှေ့သမားတစ်ဦးအဖြစ် ထိုင်း၊ အမေရိကန်၊ ကနေဒါ၊ ဆလိုဗက်ကီးယား၊ ဂျပန်၊ ဩစတြေးလျ၊ ပြင်သစ်၊ ယူကရိန်း၊ ရုရှား၊ ဘရာဇီး၊ ပီရူးစသောနိုင်ငံများမှ ဖိုက်တာများကို ဧည့်ခံထိုးသတ်ခဲ့သူဖြစ်သည်။
၂၀၁၅ ခုနှစ်တွင် မြန်မာ့ရိုးရာလက်ဝှေ့၏ ၇၅ ကီလိုတန်း ကမ္ဘာ့လက်ဝှေ့ချန်ပီယံဆုကို ဆွတ်ခူးနိုင်ခဲ့သလို ၂၀၁၇ ခုနှစ်တွင် WLC ၏ မစ်ဒယ်ဝိတ်တန်း ကမ္ဘာ့လက်ဝှေ့ချန်ပီယံဖြစ်လာခဲ့သည်။ ၂၀၁၉ ခုနှစ်တွင်လည်း Air Kanbawza ချန်ပီယံဆုကို ဆွတ်ခူးခဲ့ပြီး ရိုးရာလက်ဝှေ့တွင် ရှုံးပွဲမရှိချန်ပီယံအဖြစ် မှတ်တမ်းစိုက်ထူ နိုင်ခဲ့သည်။
"တူးတူးက ရိုးရာလက်ဝှေ့လောကမှာ အရှိန်အဝါကြီးတဲ့ လက်ဝှေ့သမားတယောက်ပါ။ အာဏာမသိမ်းခင်က ရိုးရာလက်ဝှေ့အလွတ်တန်းရဲ့ နံပါတ် ၂ ကစားသမားဖြစ်ခဲ့ပေမယ့် ပြည်တွင်းအလွတ်တန်းချန်ပီယံက သူငယ်ချင်းအရင်းဖြစ်တဲ့ ထွန်းထွန်းမင်းဖြစ်နေလို့ အလွတ်တန်းချန်ပီယံဘွဲ့ကို စိန်မခေါ်ခဲ့သူပါ။
သူက ဆိုင်ကယ်စီးတာ ဝါသနာကြီးတယ်။ ဂျပန်မှာ ပွဲသွားထိုးပြီး ဆိုင်ကယ်တစီးဝယ်လာခဲ့ဖူးတယ်။ တောလိုက်၊ တောလည်တာလည်း ဝါသနာပါတယ်”ဟု တူးတူး၏မိတ်ဆွေ ရိုးရာလက်ဝှေ့သမားက ပြောပြသည်။
စစ်တပ်အာဏာသိမ်းချိန်တွင် မဟုတ်မခံစိတ်ရှိပြီး မတရားမှုကို တွန်းလှန်လိုသောတူးတူးသည် ၎င်း၏ဇာတိနယ် မကွေးတိုင်းအတွင်းသို့ ပြန်ခဲ့ပြီး စစ်အာဏာရှင် ဆန့်ကျင်ရေးဆန္ဒပြမှုများ ပါဝင်လှုပ်ရှားခဲ့သလို ပြည်သူလူထုအား အကြမ်းဖက်သတ်ဖြတ်နေသည့် စစ်ကောင်စီတပ်ကို လက်နက်ကိုင်တော်လှန်ရန် ကြိုးပမ်းမှုများ ပြုလုပ်ခဲ့သည်။
"အာဏာသိမ်းပြီး ဆန္ဒပြကြတော့ သူလည်းဆန္ဒပြတာတွေမှာ ပါဝင်နေမှန်း ဆိုရှယ်မီဒီယာက ပုံတွေအရ သိခဲ့ရတယ်။ ၂၀၂၁ မေလမှာ သူက ကေအန်ယူ တပ်မဟာ ၁ ထဲရောက်နေပြီ။ စစ်သင်တန်းတက်ဖို့ လုပ်နေတာ တွေ့ခဲ့တယ်။ နောက်ပိုင်းမတွေ့ဖြစ်တော့ဘဲ အောက်တိုဘာလောက်ကျတော့ သူမကွေးပြန်ရောက်နေကြောင်း၊ လက်နက်ကိုင်တော်လှန်ရေးအတွက် လိုအပ်တဲ့ ရန်ပုံငွေရှာနေကြောင်း အွန်လိုင်းက လာပြောပြတယ်။ လွတ်မြောက်နယ်မြေကို သူပြန်လာမယ်ပြောပေမယ့် ဧပြီလမှာ သူအဖမ်းခံလိုက်ရတယ်"ဟု တူးတူးနှင့် နောက်ဆုံးအဆက်အသွယ်ရခဲ့သည့်အခြေအနေကို မိတ်ဆွေဖြစ်သူက ပြောပြသည်။
စစ်ကောင်စီက လက်ဝှေ့ကျော် တူးတူးနှင့်အတူ လူငယ် ၆ ဦးကို ယခုနှစ် ဧပြီလ ၁၁ ရက်နေ့တွင် စကုမြို့၊ မင်းချောင်းတံတားအနီးရှိ ရွှေအိမ်သစ်စားသောက်ဆိုင်တွင် ဖမ်းဆီးခဲ့သည်။ ၎င်းတို့နှင့်အတူ ပစ္စတို သေတန် ၅ လက်၊ လက်ပစ်ဗုံး ၂ လုံးနှင့် ကျည်ဆံတချို့ သိမ်းဆည်းရမိခဲ့ကြောင်း စစ်တပ်ထောက်ခံသည့် တယ်လီဂရမ် ချန်နယ်များတွင် ဖော်ပြသည်။
စစ်ကောင်စီတပ်၏ စစ်ကြောရေး၌ညှဉ်းပန်းနှိပ်စက်မှုဖြင့် လက်ဝှေ့ကျော် တူးတူး သေဆုံးပြီဖြစ်ကြောင်း ဧပြီလကုန်ပိုင်းက သတင်းများထွက်ပေါ်ခဲ့သော်လည်း စစ်တပ်က မည်သည့်ထုတ်ပြန်မှုကိုမျှ မပြုလုပ်ခဲ့ချေ။ ပြီးခဲ့သည့် ဇူလိုင်လ ၁၃ ရက်နေ့တွင် စစ်ကောင်စီတပ်က လက်ဝှေ့ကျော်တူးတူးမှာ ဧပြီလ ၂၆ ရက်နေ့က သေဆုံးပြီ ဖြစ်ကြောင်း မိသားစုထံ အကြောင်းကြားခဲ့သည်။
“သူက မဟုတ်မခံစိတ်အပြည့်ရှိသလို စိတ်ဓာတ်ကြံ့ခိုင်တဲ့ လက်ဝှေ့သမားဖြစ်လို့ စစ်ကြောရေးမှာလည်း ဦးမကျိုးခဲ့တဲ့ တော်လှန်ရေးသမားဆိုတာ သေချာပါတယ်"ဟု တူးတူး၏မိတ်ဆွေလက်ဝှေ့သမားက မှတ်ချက်ပြုသည်။
စစ်ကောင်စီတပ်သည် လက်ဝှေ့ကျော်တူးတူးကို စစ်ကြောရေး၌ နှိပ်စက်သတ်ဖြတ်ခဲ့သလို အလောင်းကိုလည်း မိသားစုထံ ပြန်ပေးခြင်းမရှိခဲ့ကြောင်း မိသားစုနှင့်နီးစပ်သူများထံမှ သိရသည်။
“မိသားစုက ကိုတူးတူးအလောင်းလည်း ပြန်မရပါဘူး။ ဖမ်းသွားကတည်းက ဘယ်မှာဖမ်းတယ်၊ ဘာပုဒ်မတပ်ပြီး အရေးယူထားတယ်ဆိုတာကို မသိရတာ။ အခုကျမှ သေပြီဆိုပြီး အကြောင်းကြားလာတာ”ဟု မိသားစုနှင့်နီးစပ်သူတစ်ဦးက ပြောဆိုသည်။
မြန်မာ့ရိုးရာလက်ဝှေ့လောက၏ ဂန္ထဝင်တစ်ဦးဖြစ်သူ တူးတူး (နဂါးမာန်) သည် ကျဆုံးချိန်တွင် အသက် ၃၂ နှစ် ရှိပြီဖြစ်သည်။ ဇနီးသည်နှင့်အတူ သားတစ်ယောက်၊ သမီးတစ်ယောက် ကျန်ရစ်ခဲ့သည်။ ၎င်း၏ ရိုးရာ လက်ဝှေ့သမားဘ၀တလျှောက် ၆၆ ပွဲထိုးသတ်ခဲ့ပြီး ၃၉ ပွဲနိုင်၊ ၂၆ ပွဲသရေကျခဲ့ပြီး ၁ ပွဲသာ ရှုံးနိမ့်ခဲ့သည်။
ယင်းပွဲစဉ်မှာ ၂၀၂၀ ခုနှစ်က တူးတူး နောက်ဆုံးထိုးသတ်ခဲ့သည့် WLC မစ်ဒယ်ဝိတ် ကမ္ဘာ့ချန်ပီယံကာကွယ်ပွဲ ဖြစ်ပြီး ပြိုင်ဘက် တူတာဗိုယက်ကို အမှတ်ဖြင့်ရှုံးနိမ့်ခဲ့ခြင်း ဖြစ်သည်။ တူးတူးမှာ မွေ့ထိုင်းပွဲစဉ် ၉ ပွဲ ထိုးသတ်ခဲ့ရာ ၇ ပွဲနိုင် ၂ ပွဲ ရှုံးနိမ့်ခဲ့သည့်မှတ်တမ်း ပိုင်ဆိုင်ခဲ့သည်။
လက်ဝှေ့ကြိုးဝိုင်းအတွင်း၌ ပြိုင်ဘက်ကို သွေးအေးအေးနှင့် နည်းဗျူဟာကျကျ ထိုးသတ်တတ်သူ တူးတူး၊ မြန်မာနိုင်ငံဂုဏ်ဆောင်၍ ဆုတံဆိပ်များစွာဆွတ်ခူးပြီး အောင်မြင်မှုမှတ်တိုင်များစွာ စိုက်ထူခဲ့သူ တူးတူး (နဂါးမာန်) ကြွေလွင့်ခဲ့ရသည့်အပေါ် လက်ဝှေ့လောကသားများနှင့် ပရိတ်သတ်များက နှမျောတသ ဖြစ်လျှက်ရှိသည်။
တူးတူးနှင့်ထိုးသတ်ခဲ့သူ မြန်မာ့ရိုးရာလက်ဝှေ့သမား ဒေဝ (Dave Leduc) က “တူးတူး၊ ညီအကို။ မင်းက တိုက်ခိုက်ရေးသမား၊ လက်ဝှေ့ဂန္ထဝ၀ငတစ်ယောက်ဖြစ်ပြီးတော့ ငါ ထိုးခဲ့သမျှ အကြမ်း ဆုံးထဲ က တစ်ယောက် ဖြစ်ပါတယ်။ တူးတူးဟာဆိုရင် ကျွန်တော့်ကို မြန်မာလက်ဝှေ့ကမ္ဘာထဲ ကို ကြိုဆိုပြီး ကျွန်တော်နှင့် ပထမဆုံး ထိုးသတ်ခဲ့တဲ့လူပဲဖြစ်ပါတယ်။ သမိုင်းတင်လောက်တဲ့ပွဲတစ်ပွဲလဲ ဖြစ်ခဲ့ပါတယ်။ ကျွန်တော်တို့ အွန်လိုင်းပေါ်မှာ အဆင်မပြေငြင်းခုန်မှုတွေ ရှိခဲ့ပေမယ့် မင်းကို ငါ လေးစားပါတယ်။ မင်းနှင့်အတူ ကြိုးဝိုင်းထဲ မှာ ဆုံဆည်းခွင့် ရခဲ့တာကို ဝမ်းသာမိပါတယ်။ အေးချမ်းစွာ အနားယူပါ”ဟု သူ၏လူမှုကွန်ရက် Facebook တွင် ရေးသားခဲ့သည်။
ရန်ကုန်မြို့မှ ရိုးရာလက်ဝှေ့ပရိသတ်တဦးကလည်း "ကိုတူးတူးက ကျွန်တော်အကြိုက်ဆုံး ရိုးရာလက်ဝှေ့ သမားပါ။ အခုလို စစ်ကောင်စီက နှိပ်စက်သတ်ဖြတ်တာ ခံလိုက်ရတယ်ကြားတော့ တော်တော့်ကို ရင်နာမိတယ်ဗျာ။ သူက ရိုးရာလက်ဝှေ့မှာတင်မဟုတ်ဘဲ Thai Fight လို အထင်ကရမွေထိုင်းပွဲမှာတောင် အစွမ်းပြခဲ့တဲ့သူမို့ သူ့အတွက် တော်တော်လေး ယူကျုံးမရဖြစ်မိ၊ နှမြောမိတယ်"ဟု မှတ်ချက်ပေး ပြောဆိုသည်။
၂၀၁၉ ခုနှစ်က လက်ဝှေ့ကျော် တူးတူးသည် သူအမြဲသုံးသည့် Facebook ၌ ယခုလို မှတ်ချက်ကို ရေးသားခဲ့သည်။
“ရိုးရာလက်ဝှေ့လောကမှာ တူးတူးဆိုတဲ့နာမည်တစ်လုံးရလာဖို့ လျှောက်ခဲ့ရတဲ့လမ်းတွေက အရမ်းကြမ်းခဲ့တယ်။ တတ်ခဲ့တဲ့တောင်တွေ လည်းအရမ်းမြင့်လွန်းခဲ့တယ်။ ခက်ခက်ခဲခဲ စိုက်ထူခဲ့ရတဲ့မှတ်တိုင်တွေကတော့ တချိန်ကျ လှပတဲ့သမိုင်းတခုအဖြစ် နောက်လူတွေကိုပြောပြနိုင်ဖို့ပေါ့”
ယခုလည်း လူ့လောက၌ တူးတူး မရှိတော့သော်လည်း မြန်မာနိုင်ငံ စစ်အာဏာရှင်လက်အောက်မှ လွတ်မြောက်ရေးနှင့် ဖက်ဒရယ်ဒီမိုကရေစီရရှိရေးအတွက်၊ တိုင်းပြည်နှင့်လူထုအတွက် အသက်စွန့် ပေးဆပ်ခဲ့သော မြန်မာ့လက်ဝှေ့ဂန္ထဝင် တူးတူး၏သမိုင်းကို မြန်မာနိုင်ငံသားများက အမြဲအမှတ်ရ၍ လက်ဆင့်ကမ်းပြောဆိုနေကြမည်မှာ မြေကြီးလက်ခတ်မလွဲဖြစ်သည်။
ဓာတ်ပုံ - WLC and Social Media
#တူးတူး #မြန်မာ့လက်ဝှေ့ #သူရဲကောင်း #နဂါးမာန်ကလပ် #Ayeyarwaddy_Times
